Sagre dal Patriarcjāt
Sants Ermacure e furtunât
(Aquilee, ai 12 di Lui)|
Miniature dal Messâl Aquileiês, |
|
(379 Kb)
|
Discjame La Messe grande di Avôt di dut il Friûl |
|
(19Kb)
|
Discjame La riflesion di Pre Antoni Beline
dal 2005 |
Benvignûts a ducj i Furlans, ai Slovens e ai Todescs ch'a àn
condividût e a condividin la liende de vite tal non e tes idealitâts
de Glesie Mari di Aquilee.
Ancje lis lenghis ch'a vegnin dopradis in cheste
Messe di Avôt a marchin l'intindiment di fâsi onôr un cul
altri e di continuâ la strade insieme.
Dobrodoslico zelimo vsem Furlanom, Slovencem in Nemcem,
ki danes, kot v preteklosti, delijo isto zivljensko usodo v
imenu in v duhu idealov Matere Cerkve iz Ogleja.
Tudi raba treh jezikov na danasnjem masevanju
odraza voljo po medsebojnem spostovanju in po nadaljevanju
skupne zivljenske poti.
Herzlich willkommen allen Friaulern, Slowenen und
Deutschen die miteinander das Ereignis des Lebens in der
Name und in den Idealen der Aquileiesichen Kirche teilen
und geteilt haben.
Auch die Sprachen die heute in dieser heiligen
Gelübdemesse benützt werden, zeigen die Wille sich gegenseitig
zu beehren und in dieser Weise zusammen weitergehen.
Tornâ a Aquilee al vûl dî tornâ li di mê mari e sintî il bon odôr
de mê tiere. Nissun intal passâ dai agns nol rive te cjase de mari
cence vê il propi cûr sglonf di memoriis, di vite e di afiets e nissun
al dismentee i odôrs e i colôrs des stagjons che di piçul in sù al à
nulît e cjalât.
Vuê, usgnot, viodi i mosaics, cjaminâ sot i arcs des colonis,
sentâsi par contemplâ i spazis fra l'ombre e la lûs de Basiliche,
al è come sintîmi strenzût di une mari, al è poiâ i pîts intal fresc
di un biel prât, scuvierzi un cjanton segret e vitâl di me stes.
Culì l'anime nestre si cuiete e e devente lizere, culì la
memorie si piert tai secui passâts, culì vuê si cjate la pâs e te pâs al
rinàs l'avignî. Sì, cheste glesie e je come une Bibie che e comprent
dute la storie, sacre, sante, incjarnade dal nestri Friûl. Culì, come
te Bibie, al svualampe il Spirtu Sant.
Nol è tragjic il timp che o vivìn; Aquilee ind à viodûts
une vore di piês; al è forsit un timp li che la fin e il principi, gnot e
dì, scûr e lûs cuasi si tocjin. A son vonde argoments par dî che il
Friûl al finìs, a son vonde motîfs par dî che murint al rivîf. Sore di
nô o podìn tant vaî che sperâ. Forsit a son agns come un grant arc
di S. Marc, come il passaç dal Mâr Ros. O sin furtunâts, o sin fra
passât e avignî, o assistìn a un travai. Stant culì in cheste glesie, mi
plâs ricuardâ la peraule di Crist: “La femine, cuant che e parturìs,
e je avilide parcè che e je rivade la sô ore. Ma cuant che e à parturît
un frut, no s'impense nancje plui di trop che e à patît, par vie
de contentece che al è nassût un om” (Zn 16,21). Il nestri moment
al è grant, al è propit cussì.
Al dîs Gjesù tal Vanzeli: “Chel che al semene al è diferent
di chel che al sesele. Jo us ai mandâts a seselâ ce che no vês
fadiât; altris a an fadiât e vualtris o vês cjapât il lôr puest te fadie” (Zn 4,37-38). E je la nestre mission.
Ma al zonte il Signôr: “Alçait i vuestris vôi e cjalait i
cjamps: a son palomps par seselâ” (Zn 4,35). Il ben ancje vuê al
vinç sore il mâl.
Usgnot, pôcs o tancj, o ringraciìn Idiu di cjatâsi insieme
te nestre Basiliche mari pal avôt dai Sants Ermacure e Furtunât;
doman, o continuarìn a lavorâ cun fiducie te culture e te societât,
te glesie e te spirtualitât, tai paîs e framieç dai plui piçui, pe nestre
identitât di popul furlan e pal nestri avignî di cristians tal spirt di
Aquilee.
Lavorìn fra umiltât e passion, competence, sacrifici e pazience, e dut
al frutularà pal ben dal Friûl. Stin serens parcè che ancje culì: “Il
ream di Diu al è propit cussì: come un om che al à butade la semence
tal teren, e po al duâr e al vegle, di dì e di gnot, intant che la
semence e bute fûr e e cjape pît cence che nancje lui nol sepi cemût.
Il teren al bute dibessôl prime jerbe, po spî e po tal spî il forment
sglonf. Cuant che po il prodot al è madûr, si spessee a meti man a
la sesule parcè che e je rivade l'ore di seselâ” (Mc 4,26-29).
Cjalant cheste glesie, pensant a Aquilee l'anime e polse
come frut intai braçs di une mari, e l'afiet al florìs tai valôrs e tal
biel che la tiere mari nus dà.
Glesie Furlane