Agjeo
Cjapitui: 1 > 2 >
Cjapitul 1
Tornait a fâ sù il templi!
1 Tal secont an dal re Dario, tal sest mês, la prime dì dal mês, la peraule dal Signôr j jè stade dite a Zorobabel, fî di Sealtiel, governadôr di Gjude, e a Gjosuè, fî di Jozedak, prin predi, midiant dal profete Agjeo.2 Il Signôr des schiriis al dîs cussì: Chest popul al dîs: «Nol è ancjemò rivât il moment di tornâ a fâ sù la cjase dal Signôr!».
3 Alore la peraule dal Signôr e jè stade dite midiant dal profete Agjeo:
4 «Esal mo par vuâtris il moment di stâ pacjfics in cjasis riviestudis di len cuanche cheste cjase e jè dute fiscade?
5 Il Signôr des schiriis al dîs cussì: Stait atenz a ce ch'o faseis!
6 O semenais ungrum, ma o cjapais sù pôc; o mangjais, ma no seis mai passûz; o beveis, ma no rivais a incjocâsi; si vistîs, ma cence rivâ a sclipîsi, e chel sot paron al cjape il salari par butâlu tun sacut sbusât.
7 Il Signôr des schiriis al dîs cussì:
8 Lait sù su la mont, a puartâ dongje legnam e a tornâ a fâ sù la cjase! Jo o metarai li la mê contentece e o varai la mê glorie - al dîs il Signôr.9 Si spietavis tant e o veis vût pôc e nuje; e cuanche s'al puartavis a cjase, jo j soflavi parsore. Parcè? - sentence dal Signôr des schiriis -. Par colpe de mê cjase ch'e jè in ruvine, biel che ognidun al bassile dome par sè.
10 Par chel il cîl al à dineade la sô rosade e la tiere i siei prodoz.
11 Jo o ài clamât il sut sui cjamps e su lis monz, sul forment, sul vueli e sun dut ce ch'e bute la tiere; sui oms, sul besteam e sun dute la vore des mans».
12 Alore Zorobabel, fî di Sealtiel, e Gjosuè, fi di Jozedak, prin predi, e dut il rest dal popul a scoltàrin la vôs dal Signôr lôr Diu e lis peraulis dal profete Agjeo, che ur al veve mandât il Signôr; e il popul al temè il Signôr.13 E Agjeo, mes dal Signôr, j disè al popul in cualitât di mes dal Signôr: «Jo o soi cun vuâtris - sentence dal Signôr -».
Inissi dai lavôrs
14 Il Signôr al disveà il spirt di Zorobabel, fî di Sealtiel, governadôr de Gjudee, e il spirt di Gjosuè, fî di Jozedak, prin predi, e il spirt di dut il rest dal popul. Si moverin e a scomençàrin lis voris pe cjase dal Signôr des schiriis, lôr Diu.
15 Al jere il vincjecuatri dal sest mês, tal secont an dal re Dario.Cjapitui: 1 > 2 >