Ebreos
Cjapitui: 1 < 2 < 3 < 4 < 5 < 6 < 7 > 8 > 9 > 10
Cjapitul 7
Gjesù, come predi sul stamp di Melchisedek, al è plui alt dai predis levitics
1 Parâtri chest Melchisedek, re di Salem, predi dal Diu Altissim, al lè incuintri a Abram biel ch'al tornave indaûr dopo di vê fruçâz i res e lu benedì; 2 a lui Abram j dè la decime di ogni robe. Prin di dut il so non, voltât, al ûl dî re di justissie, e in plui ancje re di Salem, valadì re di pâs.
3 Al è cence pari, cence mari, cence vons; i siei dîs no àn un cjaveç ni la sô vite une fin; al è metût a pâr dal Fî di Diu e al reste predi par simpri.
4 Provait a pensâ trop grant ch'al è chest om che Abram, il patriarcje, j à dade la decime dal so butin.5 Par dî il vêr, ancje chei dai fîs di Levi, ch'a àn l'incariche di predi, e àn par leç l'ordin di cjapâ sù la decime de int, ven a stâj dai lôr fradis, ch'a son ancje lôr de gjernassie di Abram.
6 Lui, invessit, che nol jere de lôr gjernassie, al cjapà sù la decime di Abram e al benedì chel ch'al veve intorsi la promesse.
7 Al è evident ch'al è il plui piçul ch'al è benedît dal plui grant.
8 In plui, chi a cjàpin sù lis decimis oms distinâz a murî; li invessit lis cjape sù un che si dîs ch'al è vîf.
9 Che ansit si pò dî ancje di Levi, seben ch'al cjape sù lis decimis, ch'al à pajade la sô decime in Abram:
10 parceche lui al jere ancjemò tai ombui di so von cuanche j lè incuintri Melchisedek.
11 Se duncje si ves podût rivâ al colm midiant dai predis di Levi - sot di lôr il popul al à vude la leç - ce coventavial ch'al vignis un âtri predi, sul stamp di Melchisedek, e no invessit sul stamp di Aron?
12 Difat, gambiant stamp di predis, si gambie par fuarce ancje la leç.
13 Chel che si fevele chi al jere di un'âtre tribù, che nissun di lôr nol à mai metût man al altâr.
14 Duc' a san difat che nestri Signôr al è jessût de çocje di Gjude, e Mosè nol à mai vude indiment cheste tribù cuant ch'al à fevelât di predis.
15 Chest si viodilu ancjemò plui a clâr pal fat che, sul stamp di Melchisedek al è vignût fûr un âtri predi
16 che nol è deventât predi parvie di une leç umane, ma pe fuarce di une vite cence amont.
17 Difat al è scrit chest sul so cont:Tu tu sês predi par simpri
sul stamp di Melchisedek.
18 Cussì si bute di bande une leç di prime parvie che no veve tignince e che no zovave nuje -
19 difat la leç no à fat rivâ al colm nuje - e si puarte indenant une sperance plui miôr, che in gracie sô o podìn sdongjâsi di Diu.
20 E chest nol è sucedût cence zurament. Lôr difat a deventàrin predis cence zurament;
21 lui, invessit, cun tun zurament di chel che j à dit:Il Signôr al à zurât e no si pentissarà par mai:
tu tu sês predi par simpri.
22 Par chel Gjesù al è deventât garansie di un pat plui grant.
23 In plui, lôr a son deventâz predis in cetanc', parceche la muart no ur permeteve di funzionâ a lunc;
24 lui, invessit, stant ch'al reste par simpri, al à une incariche cence amont.
25 Par chel al è in stât di salvâ par simpri chei che midiant di lui si svissìnin a Diu, sint lui simpri vîf e ch'al pree par nô.
26 Propit mo nus coventave un prin predi di cheste fate: sant, nocent, cence magle, cence nissun rimpin cui pecjadôrs, puartât sù adalt tai cîi.
27 Lui nol à bisugne, come chei âtris prins predis, di ufrî ogni dì sacrificis prin pai siei pecjâz e po par chei dal popul, parceche chest lu à fat une volte par dutis cuant ch'al à ufiert sè stes.28 La leç, difat, e met prins predis oms sogjez a dutis lis pecjs di chest mont, ma la peraule dal zurament, ch'e ven dopo de leç, e met il Fî, ch'al è rivât al colm dal dut e par simpri.
Cjapitui: 1 < 2 < 3 < 4 < 5 < 6 < 7 > 8 > 9 > 10