Ezechiel
Cjapitui: 1 > 2 > 3 > 4 > 5 > 6 > 7 > 8 > 9 > 10
Cjapitul 1
SENTENCIS CUINTRI DI ISRAEL
La vision de glorie dal Signôr
1 Tal trentesim an, ai cinc dal cuart mês, al capità chest: o jeri framieç dai esiliâz ad ôr dal canâl Chebar; si daviergerin i cîi e o viodei robis di Diu.2 Ai cinc dal mês, al jere il cuint an di esili di Joiachin,
3 j rivà a Ezechiel, fî di Buzi, predi, la peraule dal Signôr te tiere dal caldeos, ad ôr dal canâl Chebar e li la man dal Signôr e fo parsore di lui.4 Ve' ce ch'o viodei: un ajaron di burlaç ch'al rivave de tramontane, un grant nûl cun folcs e lusôr dulintôr e tal mieç come il lusî da l'ambre, framieç dal fûc.
5 E tal mieç il stamp di cuatri di lôr: ognidun al veve l'aspiet di om,6 ognidun cun cuatri musis e cun cuatri alis.
7 I lôr pîs a jerin talpis sutilis e la lôr plante e jere come chê de talpe di un vidiel, lusinz come ch'al lus il brons lustrât.
8 E sot des alis, des cuatri bandis, a vevin mans di oms; duc' i cuatri a vevin musis e alis.
9 Lis alis a jerin compagnadis a dôs a dôs. A vignivin indevant cence voltâsi; ognidun al leve indevant dret.
10 I stamps des musis a jerin: di om, di leon, de bande drete dai cuatri, di bo de bande çampe dai cuatri e di acuile.11 Lis lôr alis adalt a jerin slargjadis, ognidun an' veve un pâr, e chês âtris dôs alis a cuviergevin i lôr cuarps.
12 Ognidun al leve indevant dret. A levin indevant là che ju sburtave chel ajar, cence voltâsi.
13 Framieç di chês figuris si viodeve a comparî come cjarbons imborâz ch'a semeavin lampions: a lampavin fra lis figuris, il fûc al lusive e al butave fûr folcs.
14 Lis figuris a corevin ca e là come il folc.
15 O viodei che lis figuris a vevin par tiere ognidune une ruede.
16 L'aspiet des ruedis e il lôr implant al lusive tanche il crisolit; ognidune des cuatris e veve il stes implant e l'aspiet e l'implant a jerin faz in mût che lis ruedis a risultavin argagnadis une in chê âtre.
17 Ches figuris a levin indevant simpri pes cuatri bandis; a levin indevant cence voltâsi.
18 I cerclons des ruedis a jerin alz; i cerclons a vevin vôi dulintôr, duc' i cuatri.
19 Cu lis figuris ancje lis ruedis a levin indevant, e cuanche lôr si alçavin de tiere, si alçavin ancje chês âtris.
20 A levin là ch'al soflave chel ajar; lis ruedis si alçavin cun lôr, parceche il stes ajar des figuris al moveve ancje lis ruedis.
21 Se chês a levin indevant, a levin indevant ancje lôr e se chês si fermavin, si fermavin ancje lôr, e se chês si alçavin de tiere, si alçavin insieme ancje lis ruedis, parceche l'ajar des figuris al moveve ancje lis ruedis.
22 E o viodei sul cjâf des figuris l'implant di un volt biel e lusint come ch'e lusive la glace slargjade adalt, parsore dal lôr cjâf.
23 E sot dal volt a jerin lis lôr alis slargjadis, une rimpet di chê âtre; ognidune an' veve dôs che j cuviergevin il cuarp.
24 Biel ch'a levin indevant, o sintii il sunsûr des lôr alis come chel di grandis aghis, come chel di Shadai; il sunsûr dal lôr fracas al jere come chel di un campament militâr; lis alis si bonavin cuanche lôr si fermavin.
25 Si sintì un grant rumôr parsore dal volt ch'al jere sul lôr cjâf.
26 Parsore dal volt ch'al jere sul lôr cjâf al jere come il stamp di une sente, ch'e semeave di zafîr. Sul stamp de sente al jere sentât un ch'al veve la filusumie di om.
27 E o viodei come il lusî de ambre, come ch'al fos fûc dulintôr di chei ch'a semeavin flancs in sù; e di chei ch'a semeavin flancs in jù o viodei come un fûc ch'al sflandorave dulintôr.
28 Come l'arc dal cil framieç dai nûi cuanche al è burlaç, cussì al jere l'aspiet di chel sflandôr dulintôr. Cussì al comparive il stamp de glorie dal Signôr. Le viodei e o colai jù cu la muse par tiere e o sintii un ch'al fevelave.Cjapitui: 1 > 2 > 3 > 4 > 5 > 6 > 7 > 8 > 9 > 10