Judiz
Cjapitui: 1 > 2 > 3 > 4 > 5 > 6 > 7 > 8 > 9 > 10
Cjapitul 1
LIS TRIBÙS DI ISRAEL IN CANAAN
Lis tribùs dal sud
1 Dopo muart Gjosuè, i israeliz j domandàrin al Signôr: “Cui di nô larajal sù par prin a dâur un pest ai cananeos?”.2 Il Signôr ur rispuindè: “J tocje a Gjude di lâ sù par prin; ve', jo o met tes sôs mans dute la tiere”.
3 Alore Gjude j disè a so fradi Simeon: “Ven sù cun me tal toc che mi à tocjât a mi; o tacarìn i cananeos e, cuanche al coventarà, o vignarai ancje jo a dâti une man a ti”. E Simeon al marçà cun lui.4 Sicheduncje Gjude al lè sù e il Signôr ur metè tes lôr mans i cananeos e i perissiz e, a Besek, a faserin fûr dismil oms.
5 A Besek s'intivàrin cun Adoni-Besek; lu tacàrin e ur molàrin un pest fenomenâl ai cananeos e ai perissiz.
6 Adoni-Besek al scjampà ma lôr j corerin daûrj e j cjonçàrin i poleârs des mans e dai pîs.
7 Adoni-Besek alore al disè: “Setante res, cui mucui dai poleârs des mans e dai pîs, a regonavin i fruçons sot de mê taule. Ce ch'o vevi fat jo, Diu m'al torne”. Lu menàrin a Gjerusalem; al è li ch'al murì.
8 I fîs di Gjude a tacàrin Gjerusalem, le cjapàrin, le passàrin a fîl di spade e j derin fûc a la sitât.
9 Podopo i fîs di Gjude a lerin sù par combati i cananeos ch'a jerin a stâ su la mont, tal Negheb e te concje.
10 Daspò Gjude al marçà cuintri dai cananeos ch'a jerin a Ebron, Ebron par vieri al veve non Kiriat-Arbe, e al batè Sesai, Achiman e Talmai.
11 Di li al marçà cuintri de int di Debir. Debir par vieri al veve non Kiriat-Sefer.
12 Dissal Caleb: “Chel ch'al vinçarà Kiriat-Sefer e le cjaparà, jo j darài par femine mê fie Acse”.
13 E le cjapà Otniel, fî di Kenaz, il fradi plui piçul di Caleb, e lui j dè par femine sô fie Acse.
14 Cuanche cheste e rivà, lui le pocà a domandâj a so pari un cjamp. Alore jê e dismontà jù dal mus e Caleb j domandà: “Ce ustu?”.15 J rispuindè: “Faseimi un plasê. Midiant che tu mi às condanade in tun cjanton, te tiere dal Negheb, dàmi amancul cualchi risultive di aghe”. E Caleb j dè lis risultivis disore e lis risultivis disot.
16 I fîs di Obab il kenit, missêr di Mosè, a vignirin sù de sitât dai Palmârs dutune cui fîs di Gjude tal desert di Gjude, ch'al è tal Negheb di Arad, e si sitemàrin cun chê int.
17 Po Gjude al lè cun so fradi Simeon: a baterin i cananeos ch'a jerin a stâ a Sefat e le distinàrin al svinidriment. Par chel j meterin non a la sitât Corme.
18 Daspò Gjude al cjapà Gaze e la tiere dulintôr, Ascalon e la tiere dulintôr, Ekron e la tiere dulintôr.
19 E il Signôr al jere simpri cun Gjude, ch'al paronà la mont ma nol rivà adore di parâ vie dute la int de plane parceche a vevin cjârs di fier.
20 Come che ancje Mosè al veve racomandât, Ebron j al derin a Caleb, ch'al parà vie i tre fîs di Anak.
21 Rivuart ai gjebuseos, ch'a jerin a stâ a Gjerusalem, i fîs di Beniamin no rivàrin adore di sumiergiju dal dut e fin cumò i gjebuseos e àn stât a stâ a Gjerusalem insieme cui fîs di Beniamin.Lis tribùs di mieç
22 La cjase di Josef, ancje chê e lè sù a Betel e il Signôr al jere cun jê.
23 La cjase di Josef e fasè splorâ Betel. La sitât par vieri e veve non Luz.
24 Chei ch'a jerin lâz a splorâ, s'intivàrin in tun om ch'al jessive de sitât. J diserin: “Dìsinus par ce bande che si pò jentrâ dentri e nô ti sparagnarìn”.
25 Chel ur mostrà di ce bande ch'a podevin lâ dentri te sitât. A passàrin la sitât a fîl di spade ma a lassàrin lâ l'om cun dute la sô famee.
26 Chel om al lè te tiere dai itiz; al fasè sù une sitât e j metè non Luz. Ch'al è il non ch'e à ancjemò.
27 Manasse nol rivà adore di parâ vie la int di Beisan e i siei borcs ni Tanac e i siei borcs ni la int di Dor e i siei borcs ni la int di Ibleam e i borcs dulintôr ni la int di Meghido e i borcs dulintôr; i cananeos a restàrin te lôr tiere.28 Ma però, apene che Israel al fo deventât plui fuart, al metè i cananeos a fâ lis voris, ancje se nol rivà a parâju vie.
29 Nancje Efraim nol rivà a parâ vie i cananeos ch'a jerin a stâ a Ghezer, di mût che i cananeos a son ancjemò a stâ aventi.Lis tribùs dal nort
30 Zabulon nol rivà a parâ vie la int di Kitron ni chei di Naalol. I cananeos a restàrin framieç di Zabulon ma ur tocjà di sotometisi a lis voris.
31 Aser nol rivà a parâ vie la int di Aco ni chei di Sidon, di Aclab, di Aczib, di Elbe, di Afik ni chei di Recob.
32 I aseriz si sistemàrin duncje parmis dai cananeos ch'a jerin a stâ alì, parceche no rivàrin a parâju vie.
33 Neftali nol rivà nancje lui a parâ vie la int di Bet-Semes ni chei di Bet-Anat, e si sistemà framieç dai cananeos ch'a jerin te regjon, ma la int di Bet-Semes e di Bet-Anat a scugnirin sotometisi a fâur lis voris.
34 I amoreos a incjantonàrin i fîs di Dan su la mont e no ju lassàrin meti pît te plane.
35 I amoreos a restàrin a Ar-Cheres, a Aialon, e a Saalbim, ma cuanche la man de cjase di Josef e deventà plui cjalcjade, a scugnirin supâsi dutis lis voris.
36 Il toc dai amoreos al tache te mont dai Scarpions, tal fuart, e si slargje di rive sù.
Cjapitui: 1 > 2 > 3 > 4 > 5 > 6 > 7 > 8 > 9 > 10