Romans
Cjapitui: 1 < 2 > 3 > 4 > 5 > 6 > 7 > 8 > 9 > 10
Cjapitul 2
PART DOGMATICHE
Il pecjât tal mont gjudaic
1 Pa la cuâl, om che tu judichis e tu condanis, tu sês cence scusis; parceche biel che tu judichis e tu condanis chei âtris, tu ti condanis te. Difat tu che tu judichis e tu condanis, tu fasis propit lis stessis robis.2 Ma o savin che il judissi di Diu al è seont veretât cuintri di chei ch'a fàsin robis di chê fate.
3 Pensistu forsit, om che tu judichis chei ch'a fàsin robis di chê fate e intant tu lis fasis ancje tu, di sfuî la sentence di condane di Diu?
4 O spreseistu il tesaur dal so boncûr, de sô sapience, de sô passience, no tignint cont che ogni at de bontât di Diu ti sburte a la conversion?
5 Ma cul to cjâf dûr e cu la tô cussience che no ûl savênt di pentiment, tu ingrumis sore di te la rabie pe sornade dal svindic e de rivelazion dal judissi just di Diu,
6 che al pajarà ognun seont lis sôs oparis:
7 la vite eterne par chei che, tignint dûr in tune condote oneste, a cìrin glorie, onôr e inmortalitât;
8 chei invessit che a son te categorie dai ribei, a disubidissin a la regule de veretât e a ubidissin a la tristerie, a varan rabie e svindic.9 Tribulazion e passion a plombaran sun ogni om ch'al fâs il mâl, sul gjudeo par prin e po sul grêc;
10 glorie, onôr e pâs a duc' chei ch'a fàsin il ben, al gjudeo par prin e po al grêc.
La leç e distine in maniere esclusive il vêr gjudeo
11 Parceche Diu nol fâs preferencis par nissun.12 Difat chei che àn pecjât cence leç, a laran a finîle malamentri cence leç; compagn chei che àn pecjât cu la leç, a saran judicâz e condanâz midiant de leç.
13 Difat no son jusc' denant di Diu chei che a scòltin la leç, ma a saran diclarâz jusc' chei che le mètin in pratiche.
14 Cuanche i pajans, che no àn leç, si compuàrtin tal lôr jessi seont la leç, a son leç par se stes, cun dut che no àn la leç.
15 Difat a palèsin che ce che la leç e pratint al è scrit tai lôr cûrs, stant che la lôr cussience e fâs di testemoni par lôr e i lôr resonamenz mo ju incòlpin mo ju pàrin.
16 Cussì al capitarà te dì che Diu al judicarà i segrez dai oms midiant di Gjesù Crist, seont il gno vanseli.17 Sicheduncje, tu che tu ti tegnis in bon di clamâti gjudeo e tu ti pois di un continuo su la leç e tu ti vantis in Diu;
18 tu che tu cognossis ce che Diu al ûl e, istruît de leç, tu rivis a capî ce ch'al è miei,
19 e tu ti sês metût tal cjâf di jessi guide dai vuarps e lûs di chei ch'a son tal scûr,
20 dotôr dai ignoranz, mestri dai fruz, e di vê in te leç la misure dal savê e de veretât…,
21 poben, cemût mai che tu ur insegnis a chei âtris e no tu t'insegnis a ti? Tu, che tu predicjs di no robâ, tu robis?
22 Tu, che tu disis di no fâ adulteri, tu lu fasis? Tu, che no tu puedis nancje viodi i idui, tu vâs a robâ tai templis?
23 Tu, che tu ti tegnis in bon cu la leç, tu disonoris Diu propit lant cuintri de leç.
24 Difat par colpe vuestre il non di Diu al ven blestemât framieç dai pajans, come ch'al è stât scrit. 25 Difat la circuncision e zove dome se tu metis in pratiche la leç; ma se tu sês un ch'al va cuintri de leç, la tô circuncision e jè come che no fos.
26 Se alore un incircuncidût al met in pratiche lis voris comandadis de leç, il so jessi incircuncidût no j valarajal forsit come la circuncision?
27 E chel ch'al è cence circuncision ma al met in pratiche la leç, seont ce che j dîs la nature, ti condanarà te che tu às la letare de leç e la circuncision ma tu vâs cuintri de leç.
28 Difat nol è vêr gjudeo chel che al semee par difûr e nancje la vere circuncision no jè chê che si le viôt in te cjâr,
29 ma il vêr gjudeo al è chel ch'al è gjudeo dentrivie, e la vere circuncision e jè chê dal cûr, seont il spirt e no seont la letare; chel li al è laudât no dai oms ma di Diu.
Cjapitui: 1 < 2 > 3 > 4 > 5 > 6 > 7 > 8 > 9 > 10