Romans
Cjapitui: 1 < 2 < 3 < 4 < 5 < 6 < 7 > 8 > 9 > 10
Cjapitul 7
PART DOGMATICHE
L'om al è liberât de sotanance de leç
1 O no saveiso, fradis - o feveli a int esperte di leç - che la leç e à fuarce sul om par dut il timp ch'al vîf?2 Difat la femine maridade, in fuarce de leç, e jè leade al om fin che lui al è in vite; ma se l'om al mûr, jê e jè liberade dal dut de leç che le ten leade al so om.
3 Pa la cuâl se jê, intant che il so om al è in vite, e va cun tun âtri om, e jè considerade adultare. Se invessit il so om al mûr, jê e jè libare tai confronz de leç, di mut che no jè plui adultare se e va cun tun âtri om.
4 Cussì, fradis miei, ancje vuâtris o seis stâz faz murî a la leç in fuarce dal cuarp di Crist par jessi dâz a di un âtri, a di chel che al è resurît de muart par che o podìn butâ alc di bon par Diu.5 Difat cuanche o jerin sot dal podê de cjâr, lis passions disordenadis peadis al pecjât, passions ch'a vignivin stiçadis midiant de leç, si discjadenavin tal nestri cuarp produsint dome robis distinadis a la muart.
6 Cumò invessit o sin stâz sfrancjâz de leç, che nus tignive sotans, par podê servî Diu tal gnûf ordin dal Spirt e no in chel vieri de letare.La leç no jè par sè cause di pecjât
7 Alore ce vino di dî? Che la leç e jè pecjât? Mai vie po! Epûr jo o ài cognossût il pecjât dome midiant de leç. Difat no vares cognossude la brame des passions se la leç no ves dit: No sta desiderâ.8 Ma il pecjât, cjatât un rimpin in tal comandament, al à impiât dentri di me ogni sorte di bramis; difat il pecjât cence la leç al è muart.
9 Jo une volte cence la leç o vivevi; vignût però il comandament de leç, il pecjât al à cjapade vigorie10 e jo o soi muart. E il comandament, ch'al veve di fâmi vivi, al è deventât par me cause di muart.
11 Difat il pecjât, cjatât un rimpin midiant dal comandament, mi à imbrojât e mi à copât propit midiant di lui.
12 Partant la leç e jè sante, il comandament al è sant, just e bon.
La leç no jè par sè cause di muart
13 Ma alore ce ch'al è bon si è tramudât in muart par me? Mai vie po! Ma il pecjât, midiant di ce ch'al è bon, mi fâs murî, par che si palesi pecjât e midiant dal comandament si palesi inmò di plui cause di pecjât. 14 Difat o savin che la leç e jè spirtuâl e invessit jo o soi di cjâr, vendût sotan al pecjât.
15 In efiez no rivi a capî nancje jo ce ch'o fâs: difat no fâs ce ch'o vuei ma o fâs ce che no volares.
16 E s'o fâs ce che no volares, o ricognos che la leç e jè buine.
17 Dome che no soi plui jo a fâlu, ma il pecjât ch'al vîf dentri di me.
18 Difat o sai che in me, ven a stâj in te mê cjâr, nol è a stâ il ben; parceche o ài a puartade di man la voe dal ben ma no la virtût di fâlu.
19 Difat no fâs il ben che o volares, ma o fâs ce che no volares e al è mâl.
20 Se alore o fâs ce che no vuei, no soi plui jo che lu fâs, ma il pecjât ch'al vîf dentri di me.
21 O cjati in efiez cheste leç: propit cuanche o volares fâ il ben, il mâl al è a puartade di man.
22 Difat, dentri di me, o soi d'acordo cu la leç di Diu,23 ma tal gno cuarp o viôt un'âtre leç, che j fâs vuere a la leç dal gno sintiment e mi rint sclâf de leç dal pecjât ch'e jè tal gno cuarp.
24 Joi, puar mai me! Cui mi liberarajal di chest cuarp distinât a la muart?
La soluzion finâl
25 Ch'al sedi ringrassiât Diu midiant di Gjesù Crist nestri Signôr! Sicheduncje jo, simpri chê persone stesse, di une bande o servis cul sintiment la leç di Diu e di chê âtre, cu la cjâr, o servis a la leç dal pecjât.
Cjapitui: 1 < 2 < 3 < 4 < 5 < 6 < 7 > 8 > 9 > 10