Zacarie
Cjapitui: 1 > 2 > 3 > 4 > 5 > 6 > 7 > 8 > 9 > 10
Cjapitul 1
PRIME PART DI ZACARIE
Invît a la conversion
1 Tal otâf mês dal secont an di Dario, la peraule dal Signôr j jè stade dite a Zacarie, fî di Ido, il profete:3 «Berlij al rest di chest popul e disiur: Il Signôr des schiriis al dîs cussì: Tornait di me e jo o tornarai di vuâtris - al dîs il Signôr des schiriis -.
4 No stait a jessi come i vuestris vons, che i profetis di une volte ur berlavin: Il Signôr des schiriis al dîs cussì: Sù mo, tornait indaûr des vuestris usancis orendis e des vuestris voris plenis di tristerie! Ma lôr no scoltavin gran e nancje no stavin atenz - sentence dal Signôr -.
5 I vuestris vons dulà sono? E i profetis sono ancjemò vîs?
6 Ma lis mês peraulis e i miei comandamenz, che ur vevi dade l'incariche ai miei servidôrs, i profetis, no sono forsit rivâz fin li di vuâtris? Il Signôr si è disdegnât a muart cuintri dai vuestris vons! Alore lôr a son tornâz in sè e a àn dit: Come che il Signôr des schiriis al veve menaçât di tratânus par colpe des nestris usancis e des nestris voris, cussì nus à tratâz».
Prime vision: i cjavalîrs
7 Ai vincjecuatri dal undicesim mês, ven a stâj dal mês di Sebat, tal secont an di Dario, la peraule dal Signôr j jè stade dite a Zacarie, fî di Ido, il profete.8 O ài vude une vision vie pe gnot. Ve': un om a cjaval, sun tun cjaval ros, al jere tal mieç dai sterps di mirt ch'a jerin tune concje profonde, e daûr di lui a jerin âtris cjavai ros, fumui, neris e blancs.
9 O domandai: «Cui sono chesc', paron?».
10 L'om ch'al jere in pîs tal mieç dai mirz mi rispuindè disint: «Chesc' a son chei che il Signôr ju à mandâz a passâ la tiere fûr par fûr!».11 Difat j diserin al agnul ch'al jere in pîs tal mieç dai mirz: «O vin passade la tiere fûr par fûr; ve': dute la tiere e polse e a jè in pâs».
12 Alore l'agnul dal Signôr al disè: «Signôr des schiriis, fin cuant no varastu dûl di Gjerusalem e des sitâz di Gjude, ch'a son biel setant'agns che tu fasis sintî la tô rabie cuintri di lôr?».13 E il Signôr j disè al agnul che mi fevelave peraulis buinis, peraulis di confuart.
Il Signôr al tornarà te Gjerusalem ricostruide
14 Podopo l'agnul ch'al fevelave cun me mi disè: «Conte: Il Signôr des schiriis al dîs cussì: O soi gjelôs di Gjerusalem e o ài une grande gjelosie par Sion.
15 Ma o sint une grande rabie cuintri des gjernassiis prepotentis; parvie che mi soi un pôc disdegnât, lôr si son sbrocadis tal fruçâ.
16 Pa la cuâl il Signôr des schiriis al dîs cussì: O torni a Gjerusalem cun dûl; la mê cjase le tornaran a fâ sù. E su Gjerusalem a tiraran la cuarde - sentence dal Signôr des schiriis -.17 Conte ancje chest: Il Signôr des schiriis al dîs cussì: Lis mês sitâz a tornaran a gjoldi la bondance, il Signôr al consolarà indaûr Sion, al sielzarà di gnûf Gjerusalem».
Cjapitui: 1 > 2 > 3 > 4 > 5 > 6 > 7 > 8 > 9 > 10