BIBIE IN LINIE

Cjapitul 1

NEEMIE AL TORNE E SI DÀ DA FÂ

Neemie a Suse. Gnovis di Gjerusalem e preiere di Neemie

1 1 Peraulis di Neemie, fi di Akalie. Tal mês di Casleu dal an vincjesim, biel ch’o jeri te fuartece di Suse, 2 Canani, un dai miei fradis, e altris di lôr a rivarin di Gjude. Ju interpelai a rivuart dai gjudeus ch’a jerin tornâts dongje dopo di vêle puartade fûr de presonie, e a rivuart di Gjerusalem. 3 Mi diserin: “Chei che le àn puartade fûr de presonie a son ventilà, te tiere, cjamâts di miserie e di aviliment; lis muris di Gjerusalem a son plenis di slambris e lis sôs puartis lis à consumadis il fûc”. 4 Sintint chestis peraulis, mi sentai e o tacai a vaî; o fasei corot par une vore di zornadis, zunant e preant denant dal Diu dal cîl. 5 O disei: “Il Signôr, Diu dal cîl, Diu grant e trement, che tu mantegnis il pat e il boncûr cun chei che ti vuelin ben e ch’a van daûr dai tiei comants, 6 ten lis tôs orelis viertis e i tiei vôi spalancâts par scoltâ la preiere dal to servidôr. Jo o stoi preant denant di te dì e gnot pai fîs di Israel, tiei fameis, confessant i pecjâts che nô fîs di Israel o vin fat cuintri di te. Ancje jo e ancje la cjase di gno pari o vin pecjât. 7 Si sin compuartâts mâl cun te e no vin rispietât i comants, lis leçs e i ordins che tu i âs dât a Mosè to servidôr. 8 Visiti de peraule che tu i âs dât in consegne a Mosè to servidôr: Se no sarês di peraule, jo us sparniçarai framieç dai forescj; 9 ma s’o tornarês di me e s’o larês daûr dai miei comants e ju metarês in vore, se ancje la vuestre int e fos sparniçade tai confins dal cîl, jo ju tirarai dongje di li e ju tornarai a menâ tal lûc ch’o ài sielzût par fâ stâ il gno non. 10 Poben, chescj a son i tiei servidôrs e il to popul; tu ju âs salvâts cun grande potence e cun man fuarte. 11 Signôr, ten lis tôs orelis atentis a la preiere dal to famei e a la preiere dai tiei servidôrs, ch’a bramin dome di rispietâ il to non; dài furtune cumò al to famei, ch’al cjati un bon acet denant di chest om”.

In chê volte jo o jeri copîr dal re.

Notis:

  • 1,1 - Peraulis di Neemie: al podarès jessi il titul des “Memoriis di Neemie”. La peraule ebraiche “peraule” e cjape dentri tant ce che si dîs che ce che si fâs. “Neemie”, par ebraic, al vûl dî “Il Signôr al confuarte”. O sin tal vincjesim an di Artaserse I, dal 445 p.d.C., tal nono mês dal an babilonês, ch’al corispuint al nestri novembar-dicembar. Suse e jere une des citâts capitâls dai rês di Persie, insieme cun Ecbatane, Persepoli e Babilonie.
  • 1,11 - Come copîr dal re, Neemie al veve un dai puescj plui impuartants e delicâts dal ream. Par solit il copîr al jere un cjastrât; però di Neemie no si à nissune notizie al rivuart.
Cjapitui: