La prime letare di Pieri
Te tabele des voris cristianis, and è une ch’e je passade sot l’autoritât di Pieri, apuestul di Crist, sorestant dal grop dai dissepui storics di Gjesù. In realtât, sul finî de letare, l’autôr al dîs clâr e net di vê mandât un cuatri riis a mieç dal segretari o aiutant Silvan “fradi fedêl” (5,12). L’intent, al dîs l’autôr, al è di fâur une piçule racomandazion ai cristians par ch’a tegnin dûr e a vedin fiducie. Tal stes contest, al mande i salûts de part de comunitât ch’e je stade “sielzude” e ch’e vîf in Babilonie, e ancje di Marc “gno fi” (5,13). Tai tescj gjudaics dopo dal 70, si dài il non di Babilonie a la citât di Rome.
Si pò duncje scrupulâ che cheste vore e je stade mandade di Rome, dopo de distruzion di Gjerusalem, 70 d.d.C., de part di un cristian erêt de tradizion di Pieri a mieç di Marc e di chê di Pauli a mieç di Silvan. Di fat la letare e palese plui une colegance a nivel di lengaç e di implant teologjic cu la tradizion di Pauli.
Cheste letare-racomandazion, e je mandade ai cristians “dispierdûts tal Pont, te Galazie, te Capadocie…”, vadì tes regjons de Asie proconsulâr. Si trate di cristians ch’a stan vivint bruts moments par vie dai paians che ur fasin la malevite. In cualchi câs lis acusis e i suspiets cuintri dai cristians a sticin ancje l’autoritât cuintri dal “non” o de fede cristiane.
La nestre vore e à dut l’implant di une predicje di racomandazion che si ripie a la tradizion e a la dutrine dal batisim. Sul sfont, la dutrine tradizionâl ch’e partìs dai tescj de Bibie.
Il telâr al è une vore lineâr e sclet. Dopo dai salûts di jentrade (1,1-2), l’autôr al fâs une preiere di “benedizion” là ch’al presente il teme: la sperance vive là ch’a son stâts clamâts i cristians (1,3-12). Podopo la letare o predicje si divît in trê bocons:
1. la sperance cristiane e à la fonde in Gjesù Crist, l’agnel che nus salve (1,13-2,10);
2. racomandazion a vivi di cristians tes svareadis situazions: instituzions publichis, rapuarts sociâi, vite matrimoniâl e comunitât (2,11-3,12);
3. racomandazion a tignî dûr e a testemoneâ il non di Crist ancje tes provis e tai rapuarts dentri de comunitât stesse (3,13-5,11). Si siere cu lis informazions e cui salûts (5,12-14).
Cheste piçule vore, metude sot il non e l’autoritât di Pieri, e vâl ancje vuê par chel ch’e dîs e pal progjet spirtuâl ch’e propon. I cristians, midiant dal batisim, a son deventâts un popul di predis e une glesie spirtuâl, là che i dan a Diu il lôr at di religjon. La fonde di cheste cjasamente spirtuâl al è Crist, piere butade di bande dai muradôrs ma sielzude di Diu. Partint di cheste sperance sigure, i cristians a àn di vivi cun coerence ancje tai ambients contraris. Cul lôr mût di vivi cussient e conforme, a àn di stropâur la bocje a di chei che ju acusin invanamentri o ch’a metin fûr cjacaris sul lôr cont. La plui biele profession di fede e je une vite libare e cristiane, là che chest popul di predis al dà la “reson de sô sperance”.