Notiziis e avîs

Lis baronadis di Pinochio

17 di Otubar 2005

Carlo Collodi

Titul: LIS BARONADIS DI PINOCHIO

Seconde edizion

lis à voltadis pre Antoni Beline

pipìns di Zuan Carli Gualandra

Ribis – Udin 1977

Finît di stampâ tal mês di zenâr li de Lithostampa di Pasian di Prât (UD)

Jentrade

CARLO LORENZINI (o COLLODI, dal non dal paîs di sô mari) al nassè a Florence dal 1826 e, dopo une vite passade framieç dai debits e des cjartis di scrivant di prefeture, al lè in chel altri mont dal 1890. Stramp e salvadi cence fin, al veve une passionate pai fruts, si ben che nol rivà nancje a meti sù famee.

Siei a son «Occhi e Nasi», «Macchiette», «Storie allegre», «Giannettino» e «Minuzzolo». Ma il libri che al veve di restâ tal cûr di ducj i fruts dal mont al è «Lis baronadis di Pinochio». Lu scrivè un istât che al jere lât a lavâ il caratel des bandis di Montecatini, ma, come che al sucêt, nissun nol voleve stampâjal parcè che al jere un libri masse a la buine, cence nissun savôr. Impen, apene saltât fûr, lu sfulminarin. Dopo cent e passe agns, si po dî che no ’ ndi è part di mont che no cognossin Pinochio. Al è lât a finîle adiriture tal cine e tai gjornalins pe canaie.

La furtune di chest libri, secont me, e je che al va ben tant pai grancj che pai piçui.

I piçui, leint lis baronadis dal pipinot e cetantis che indi à provadis par vê volût fâ ce che nol leve ben, a impararan che inte vite si à ancje di scoltâ chei che a san plui di lôr, che a àn plui esperience e ur vuelin ben. La libertât no à mai di deventâ voie di fâ nuie, disubidience o matetât. A son capricis che si paiju salâts. In plui, i fruts a impararan che no si devente oms di cumò a dibot, ma un pôc a la volte, a sun di sacrificis, di costance e ancje di fai. I «paîs dai mateçs», po, no esistin in niò e, se a esistin, no puartin a rive ben.

I grancj, leint di Pinochio, a tornaran a vivi, salacor cuntune ponte di nostalgjie e cuntun grop tal cuel, i miôrs agns de lôr vite e a podaran confermâ che ce che al conte il libri al è dut vêr. Bolps e Gjats imbroions si ‘ndi cjate a ogni pît alçât. Ma se la fabriche dai triscj no falìs, e esist ancje altre int, di un altri stamp (magari chê che mancul si crôt, come Mangjefûc) che nus dan une man propit cuant che nus semee che dut al ledi in sfas. L’ Agane e il Gri a son la sapience umane e cristiane che nus fasin lûs tal troi ingredeât di cheste vite mate.

Ma ce che al vâl pes personis cjapadis une par une, al vâl ancje pai popui.

A esistin popui pôc sù pôc jù come Pinochio, ven a stâi pipinots che no àn cussience de lôr dignitât e che si lassin menâ ator mo di chest mo di chel come i fasûi inte cite. Furtune che la storie, in dret o in stuart, e cjamine e cussì il popul, a planc a planc, al met il cjâf a disegn, al impare a vivi e a cognossi ancje i siei dirits e no dome i dovês: il pipinot, sotan, al devente un frut libar.

Ma par rivâ a chel tant no bastin bêçs e nancje lavôr, che ancje il mus al lavore. Tocje imparâ «a lei, a scrivi e a fâ conts».

Par chel o pensi che lis baronadis di Pinochio, che lis lein aromai in dutis lis lenghis, e sedi ore passade di leilis ancje par furlan, tant in scuele che fûr. Il libri di Collodi al è un libri plen di sintiment e di bogns insegnaments, che nus jude a cjalâ la vite cuntun vôli clâr e seren. Nus jude a jessi svelts cence jessi triscj e a parâsi cence deventâ prepotents. Intun moment trement e confusionât come chel che o stin vivint, Pinochio nus insegne, sot forme di une conte, che la vite, cu lis sôs liendis, e je grande e biele instès e che ducj i salms a finissin in glorie.

Se par câs, po, cualchidun cun plui malicie o fantasie al vûl spiticâsi par gjoldi inmò di plui cheste storie, al po fâ ancje cussì: al pense che il pipinot al sedi il popul furlan che, a sun di vitis pal mont, al à rivât adore di sparagnâ cinc palanchis d’aur. Tornant a cjase, al fâs mil progjets pal so Friûl. Cenonè, si intive intune mostre di Bolp che e fâs fente di jessi çuete e intun sarcandul di Gjat che al ten i vôi sierâts ma che nol è vuarp, doi imbroions che a fasin l’impussibil par spelâ il biât pipinot di dut ce che al à intorsi, magari contantji che, semenant culì, in chel «cjamp dal meracui» che e je la region o il stât, al cjaparà sù bêçs a grampadis. In chest câs, il Gjat e la Bolp nol varès di jessi tant dificîl di savê cui che a son…

Ma mi tocje fermâmi culì, che se no a son bogns di dîmi che o fâs politiche e ur insegni la tristerie ai fruts e ju ruvini, biadis animutis. Chest di ruvinâju al è un compît che, in câs, ur tocje a lôr. Rivuart a la storie, jo us ai dât il cjaveç e vualtris lait indenant cu la glagn…

Visepente, sierade dal 2002

Antoni Beline