Olmis di Diu - A. Beline

Un libri come la bibie nol podeve no tratâ la robe plui serie e tremende: la muart. Lu fâs tal libri de Sapience, a partî, che ben s’intint, de prime cuistion: dontri vegnie la muart e cui le aial inventade?

Pal autôr une robe e je pacjifiche: la muart e je opare dal pecjât, si nudris di pecjât e e cjate udience e sostentament in chei che a vivin mâl, ch’a amin il mâl, ch’a doprin il lôr timp e la lôr inteligjence par semenâ tal mont semencis di muart. Une tesi che al è dificil contradîle e che, a distance di secui, no à pierdude di atualitât. Cui puedial dineâ che il secul a pene spirât, il secul curt (par furtune!), al à cognossût lis contradizions e lis barbaretâts plui seleradis, cu lis ditaturis di drete e di çampe e i lôr erôrs e orôrs, cu lis rapinis di une minorance civilizade a damp de stragrande maiorance de int dal mont, condanade a une eterne sotanance e ricat, a spietâ chei fruçons che mai no colin de nestre taule tant furnide? Mai come cumò lis struturis politichis e economichis di pecjât si son riveladis struturis di muart. Par ducj.

La sorprese bibliche però no ven de analisi de situazion ma de rispueste: Diu nol à fate la muart e nol gjolt pe ruvine di chei ch’a vivin (Sap 1, 13). Lui, il Diu de vite, l’eternamentri vîf, al à creât dut ce ch’al è tal mont pe salût, pe ligrie, pe vite. Di fat in lôr no nd è velen di muart (v 14). Dopo di cheste sigurazion consolant, la curiositât e reste interie. Se Diu al è pe vite e nol vûl che l’om al mueri, cui aial inventade la muart? La rispueste e je puntuâl e sorprendent: Par invidie dal diaul la muart e je jentrade tal mont (Sap 2, 24). E il diaul cui lu aial creât e lassât passonâ libar? Chel Diu cussì amant de vite, parcè no aial fat cul diaul ce che al fâs cualunche contadin cu lis suriis: meti une palisse e brincâlu? Chi si trate di alc di plui des pantianis, che ti rosein un toc di formadi o di salam. Jentrant la muart tal mont, al è stât ruvinât dut, parcè che nol esist ben ch’al duri e ogni creature che e vierç i vôi su la tiere e à za segnade la condane a muart, cun tant di ore e di lûc. E chi a vegnin fûr, interiis, lis grandis domandis e lis acusis tremendis. Se Diu nol à volût regalânus l’inmortalitât che lui al veve, come ch’al fasarès cualunche gjenitôr cul fî, al è trist e gjelôs. Se al voleve e nol à podût, al è un Diu impotent e duncje la negazion stesse di ce che nô o clamìn Diu. Se po al è stât cussì distrat di no vê proviodût, lis robis si ingredein inmò di plui. E fâs ben la bibie a no dâi a Diu une responsabilitât e colpe cussì tremende scjariantle sul diaul, ma no comede nuie. Al reste intîr il misteri e il scandul.

Plui onest ameti che la muart, come la vite, e fâs part de nestre creaturalitât e che, cussì come ch’o sin stâts pensât e creâts, o scugnivin jessi mortâi, limitâts, finîts. No je duncje une colpe o une condane, ma une condizion.

Forsit si cjate une clâf di leture tune peraule che Gjesù al à proferide in merit de frutute di Gjaîr, a pene spirade: La frute no je muarte, ma e duâr (Mc 5, 39). La muart come un sium particolâr che Diu nus svearà pe zornade eterne. Alore no je plui un mûr, ma une puarte. E la clâf di chê puarte le à propit chel che al à volût jessi solidari cun nô frontant ancje lui une muart dolorose e regalantnus, cu la sô resurezion, la soluzion dal gredei e il spieli de vite ultime e definitive.