Olmis di Diu - A. Beline

Une lenghe no je dome une filaine di peraulis impiradis a sorte tun fîl, ma e je il spieli primarûl da l’anime di une persone e di un popul. No dîs che e sedi l’uniche e ultime maniere par cognossi un popul, ma di sigûr e je la prime e fondamentâl. Ogni popul al à un so mût particolâr e origjinâl o origjinari di pandisi e chest mût al va cjalât e studiât cun passion, come strade privilegjade pe cognossince. Un di chescj mûts origjinâi al rivuarde une des peraulis, e un concet, dai plui usâts e abusâts: chel dal amôr. Un amôr doprât in dutis lis salsis e pastrocjât in dutis lis manieris, parcè che amôr al è amôr e no brût di vergis.

Poben un furlan gjenuin al doprarà la peraule amôr e i siei derivâts, come amâ e vie, mancul ch’al po o nancje mai, parcè che nô furlans, te nestre concrete e prosaicitât, no disìn ti ami, ma ti vuei ben, lant subit a la sostance de cuistion. E il bonvolê e je l’espression juste par fevelâ di chest motôr universâl. Ogni an, joibe sante, o sint un sgrisul jù pe vite cuant che o lei di Gjesù che, dopo di vêur volût ben ai siei ch’a jerin in chest mont, ur volè ben fin al colm (Zn 13, 1). O cuant che, simpri tal cumiât, al dîs: Chest al è il gno comandament: che si volês ben un cul altri, come che jo us ai volût ben a vualtris (Zn 15, 12).

O vin a pene celebrade la zornade de fieste de mari, une fieste che no je liturgjiche e metude tal messâl, ma jentrade adimplen te nestre tradizion e, o speri, tal nestri cûr. Fevelant a une mari, a un pari, no si po no augurâi di volê ben ai siei fruts cul stes bonvolê, ancje se in scjale ridote e in dimension umane e creaturâl, che Diu al à par nô. Un bonvolê ch’al dà cence pentiments e cence ripensaments e cence ricats. Un bonvolê che al bute simpri, usance une fontane, ancje se la int e va li dome cuant che e à sêt e no s’ìnsumie nancje di dîi grazie e di sierâ l’aghe. Un bonvolê che nol partis de nestre degnitât ma de sô liberalitât. Par chel no si suie e no si ridûs cuant che nô o tradìn cul nestri compuartament cheste benevolence, ma se mai al cres. Parcè che il bonvolê al tint a cressi e no a calâ, a rivâ al colm e no al minim, a sacrificâsi e no a sacrificâ.

Volê ben al è di bot istintîf. Ancje lis bestiis, te lôr struture psicosomatiche, a dan dut pai lôr piçui, rivant a un eroisim che i oms a rivin da râr. O crôt che cualunche gjenitôr al vueli ben, ancje il plui salvadi e cjavestri. Anzit and è gjenitôrs salvadis che a straviodin pe lôr canae e puars mai lôr chei che ju cjalin di stuart o si permetin une critiche o une malegracie. Il pont al è propit chest: volê il ben dai fîs e no volêsi ben doprant i fîs par scjariâ o colmâ lis propiis frustrazions e delusions. Il ben dai fîs nol è fâur fâ ce che no ai rivât a fâ jo, ancje se no ur plâs o no son puartâts, ma cirî di capî il progjet che Diu al à metût dentri di lôr, te lôr individualitât, e tirâ fûr (educâ= educere, tirâ fûr) la marivee che Diu al à pensade e volude, come che Michelangelo al saveve tirâ fûr un meracul di un clapon. Il ben dai fîs, e di ogni persone, al è un ben vêr, reâl e no virtuâl. E cheste veretât e cjape dentri ancje i difiets e i aspiets mancul simpatics. Che a van cjalâts simpri cun afiet ma cun realisim e cence sconts. Al è, po, un ben globâl, armonic, che nol lasse fûr nuie e no discrimine o elimine ma al complete. Sul stamp di Diu. Nol è un câs che Diu si sedi rivelât soredut come pari e mari.