NEEMIE AL TORNE E SI DÀ DA FÂ
Leture dal libri de leç
8 1 Alore dut il popul si dè dongje tant che un om sôl su la place denant de puarte des Aghis e i disè a Esdre il scriturist di puartâ il libri de leç di Mosè che il Signôr i veve dât a Israel. 2 La prime dì dal setim mês, il predi Esdre al puartà la leç denant de semblee dai oms, des feminis e di ducj chei ch’a jerin in stât di capî.
3 Al leiè il libri su la place denant de puarte des Aghis, di cuant che al jevà il soreli fintremai a misdì, presince dai oms, des feminis e di ducj chei ch’a jerin in stât di capî; dute la int e jere intente a scoltâ il libri de leç. 4 Esdre il scriturist al jere suntun pulpit di len, che lu vevin fat par chel cont, e dongje di lui a jerin, a man drete Matatie, Seme, Anaie, Urie, Chelkie e Maaseie; a man çampe Pedaie, Misael, Malchie, Casum, Casbadane, Zacarie e Mesulam.
5 Esdre al daviergè il libri presince di dut il popul, parcè che al jere plui in alt di dut il popul. A pene vierzût il libri, dut il popul al jevà in pîts. 6 Esdre al benedì il Signôr, il Diu grant, e dut il popul al rispuindè: “Amen, amen!”, alçant lis mans. Po si butarin in genoglon cu la muse par tiere denant dal Signôr. 7 Gjosuè, Bani, Serebie, Jamin, Akub, Sabetai, Odie, Maaseie, Kelite, Azarie, Jozabad, Canan, Pelaie, levits, i spiegavin la leç al popul e il popul al jere in pîts, tal so puest.
8 Lôr a leievin tal libri de leç di Diu un toc a la volte e a spiegavin ce ch’al voleve dî e cussì a fasevin capî ce ch’a leievin. 9 Neemie, ch’al jere il governadôr, Esdre predi e scriturist e i levits che i insegnavin al popul i diserin a dut il popul: “Cheste e je une zornade consacrade al Signôr vuestri Diu; no stait a fâ corot ni a vaî!”. Parcè che dut il popul al vaive biel ch’al scoltave lis peraulis de leç. 10 Daspò Neemie ur disè: “Lait, mangjait cjars grassis e bevêt vins dolçs e mandait une purizion a di chei che no àn prontât nuie, parcè che cheste e je une zornade consacrade al nestri Signôr; no stait a avilîsi, parcè che la gjonde dal Signôr e je la vuestre fuarce!”. 11 I levits a bonavin dute la int disint: “Tasêt, che cheste e je une zornade sante; no stait a avilîsi!”. 12 Dut il popul al lè a mangjâ, a bevi, a mandâur purizions ai puars e a fâ fieste, parcè che a vevin capidis lis peraulis che ur jerin stadis letis.
Celebrazion de fieste des tendis
13 La seconde dì i capos-famee di dut il popul, i predis e i levits si derin dongje di Esdre il scriturist a scrutinâ lis peraulis de leç. 14 A cjatarin scrit te leç, che il Signôr ur veve dade a mieç di Mosè, che i fîs di Israel a vevin di vivi tes tendis par dute la fieste dal setim mês. 15 Alore a faserin savê la robe e a mandarin fûr chest befel par dutis lis lôr citâts e in Gjerusalem: “Lait sù pe mont e puartait dongje ramaçs di ulîf, ramaçs di ulîf salvadi, ramaçs di mirt, ramaçs di palme e ramaçs di arbui ch’a fasin ombrene, par fâ sù chestis tendis di frascjis come ch’al è scrit”. 16 Alore il popul al lè fûr, al puartà dongje ramaçs e ognun si fasè la sô tende sul cuviert de sô cjase, tai lôr curtii, tai curtii de cjase di Diu, su la place de puarte des Aghis e su la place de puarte di Efraim. 17 Cussì dute la comunitât di chei ch’a jerin tornâts dongje de presonie si fasè lis tendis e e vivè tes tendis. Dai timps di Gjosuè fi di Nun fint in chê dì, i fîs di Israel no vevin mai fate une robe di chê sorte. E la gjonde e rivà al colm. 18 Esdre al fasè lei il libri de leç di Diu ogni dì, dal prin al ultin; la fieste e durà par siet dîs e l’otave dì si fasè semblee grande come ch’e dîs la leç.