Notiziis e avîs

JOSEF MARCHET: UN FURLAN DIFARENT

01 di Avrîl 2006

CUNVIGNE CH’E JENTRE TES MANIFESTAZIONS PAL LX DE “ LA PATRIE DAL FRIÛL”
Sabide ai 1 di Avrîl dal 2006 a lis 9 a buinore li dal Itcg Marchetti di Glemone, in via Praviolai, 18

Testemoneance di pre’ Antoni Beline, diretôr da “La Patrie dal Friûl”

Pre Bepo Marchet. Difarent ma predi

Ricuardâ il prof. pre Josef Marchet a corant’agns de sô muart al è un at di agrât par une des personis ch’a àn onorât e fat onorâ il nestri popul furlan, la nestre culture, la nestre ricjece spirtuâl e umane, la nestre identitât. Un pari pe nestre anime e un mestri pe nestre ment. Dedicâ une zornade di studi, chi a Glemone, al è un at di inteligjence. Parcè che lis grandis personalitâts no van dome contempladis o osanadis, ch’al sucêt di râr, ma a van soredut studiadis e imitadis, che nol sucêt dibot mai.

Mi cjati par un intivo providenziâl, no volût e no mertât, a jessi diretôr di chel gjornâl, “la Patrie dal Friûl” che pre Bepo al è stât, dutune cun Felix Marchi, l’ideatôr, il creadôr, il vêr protagonist. Metintsi adun l’inteligjence e la culture di pre Bepo cu l’onestât e la radicalitât di Marchi, e scugnive vignî fûr une grande robe. Grande pal contignût. Grande pa l’idee, Grande pal moment, subit dopo de vuere, juste sessant’agns indaûr. L’intuizion di chescj nestris profetis, cu la lôr schirie folte e passionade di colaboradôrs, e jere tant banâl e lapalissiane che pôcs o nissun nol à volût scoltâle: il Friûl al podeve e al scugnive riscatâsi des sôs feridis materiâls dome deventant protagonist e responsabil in prime persone de sô rinassince. E chest al jere possibil dome cuntune autonomie reâl e no di façade. Une ispirazion profetiche che, tal implant centralistic e nazionalistic talian, e à sunât e e sunarà simpri di eresie. Forsit l’uniche. Parcè che, pal rest, si po dî e fâ dut ce che si à voe.

Riviodi e rivivi la storie dal autonomisim furlan, cun debits e credits, cun lûs e ombris, al è un lavôr che si scugnarà fâ se si vûl rompi une buine volte la trie di chest sotanisim culturâl struturâl, di cheste apatie politiche e ideâl tun popul dut somât san e plen di grinte. Il lavôr de cussientizazion dai furlans nol è finît. Al è di scomençâ. Ma sun chest a fevelaran int plui competente di me par etât, esperience e militance.

Mi àn domandade une testemoneance. A diference dal prof. D’Aronco e di Lelo Cjanton e di tancj altris, jo no soi testemoni oculâr dal Nestri. No lu ài mai nè viodût nè sintût. Ma nancje sintût a nomenâ. Pa la cuâl o pues zontâmi “tamquam abortivus”, usance san Pauli, par testemoneâ de produzion leterarie, de sô profonditât e origjinalitât culturâl, de sô vite. A partî di ce che lui nus à lassât, ch’al è tant, ma che nol rive instes a sondâ il misteri di un om dotât, complès, variegât, pluridimensionâl come lui. No jentrarai partant tal santuari de sô cussience e tal aspiet plui personâl e intim de sô vite. O fevelarai di lui partint di ce lui al à volût pandinus tes sôs voris, s’al è vêr, come ch’al è vêr, che ogni opare e je une sorte di confession autobiografiche.

Si à volût dâi a di cheste rivisitazion di Marchet il titul di “un furlan difarent”. No ai mutîfs par pensâ che la cualificazion e sedi ridutive, limitative, negative, al limit di ofensive, come che si custume di valutâ o svalutâ, in chescj timps di omologazion e di nivelament, dut ce che nol rive a stâ dentri des sinis frustrantis e cunsumadis dal sisteme. O vuei pensâ che la diviersitât, la mancjade omologazion, la resistence inteletuâl e sedi une virtût di imitâ, une cualitât di meti in lûs, une ricjece di espuartâ. In ducj i cjamps. In dutis lis situazions. In dutis lis struturis. E sarès une rivoluzion copernicane, une autentiche conversion, une vere liberazion e promozion umane.

Pre Bepo al è un furlan cun dutis lis cualitâts e i limits che par solit si ricognos a di cheste categorie. Adiriture and è studiâts, che no mi sint di clamâju inteletuâi parcè che no van plui in là o plui in sot de mode e dal aiar ch’al tire, che no ricognossin une identitât furlane se no tai difiets. No esistin i furlans; a esistin però i difiets dai furlans, a partî dal jessi cjampaniliscj, sierâts, malinfidents, reazionaris, salvadis e vie. Pre Bepo al à lis virtûts dai furlans, come la passion pal lavôr e pal studi, la sô invidualitât marcade, la fuarce e la sgrimie tal frontâ lis situazions ancje pesantis e penosis, l’ostinazion tal perseguî un obietîf, la concretece e l’essenzialitât, l’amôr profont pe tiere e pe storie, une vene di romanticisim, une sensibilitât vive ma misurade. Al è difarent parcè che, se ancje al vûl ben al so cjampanili, in particolâr a chel di Glemone, al rive a spaziâ atôr pal mont e a svualâ tai secui. La sô preparazion culturâl e la sô inteligjence lu viergin a cualunche espression dal biel e dal vêr. Al è ecletic come un inteletuâl dal Rinassiment. Si intint, anzit al è un espert, un mestri di storie, di leteradure, di filologjie, di critiche, di puisie, di art. I siei pîts a son ben pontâts su la sô tiere furlane, ma il so voli si slargje par tant larc ch’al è l’orizont e nol à nissune pôre a percori i trois che il timp al à scurît o chei che al à inmò di inluminâ. Ma no vuei intardâmi e tediâ suntun teren masse scontât.

Ce che mi sta in cûr di dî in chest incuintri, e lu sint come un dovê di cussience, di solidarietât umane e professionâl e di riparazion, al è di bati suntune carateristiche che dibot nissun nol met in lûs e che no si po lassâ fûr se si vûl cognossi alc di Marchet. O intint fevelâ dal so jessi predi e predi di cheste nestre glesie furlane che e à in Aquilee la sô scune e il so grim. Pre Bepo al è lât predi parcè che al jere convint de sô vocazion e de sô mission e al à onorât par dute la vite cheste sô sielte fate tai agns inocents e incussients. Difarent, ma predi. Predi ma difarent.

La sô passion pe glesie e pal mont religjôs e je testemoneade in dute la sô vite relativamentri curte e in ducj i puescj là che l’ubidience e la provedence lu àn distinât. Al à studiât in seminari, si è indotorât in letaris classichis e modernis a la Catoliche di Milan dopo di jessisi laureât in teologjie, al à insegnât tal seminari e, cuant che l’aiar no i confaseve o i sorestants no lu sopuartavin plui, al à formât miârs di mestris e mestrutis che, te nestre tradizion furlane, a son stâts i prins e plui fedêi colaboradôrs dai plevans te formazion umane e cristiane des gjenerazioins di nît. No feveli dal so ministeri di predi, come capelan militâr e come predi diocesan ancje se cence parochie, des lezions culturâls e morâls che lui al faseve ai siei amîs e scuelârs de Risultive (lis sôs predicjis par latin ciceronian a Sante Femie a jerin un apuntament bramât e un godiment culturâl e spirtuâl rafinât). Ma dute la sô vite e la sô produzion e à girât atôr dal mont religjôs. Baste cjapâ in man i boletins de plêf di Glemone, i “lunaris” cu lis sôs poesiis, il so contat seguitîf e vitâl cu lis glesiis e gleseutis, lis sfachinadis e lis gnotoladislis a studiâ statuis, pituris, libris storics, documents religjôs. Al à respirât a plens palmons il mont religjôs, cul so contignût salvific, cul so valôr storic e culturâl, cu la sô ricjece catechetiche. Al à fat cognossi ai furlans, grancj e piçui, clerics e laics, fedêi o infedêi, il patrimoni straordenari che al à nudrît di sostance gjenuine e di forme splendide lis gjenerazions che si son sucedudis sun cheste tiere vanzelizade e bagnade dal sanc di Ermacure e Furtunât.

Al è stât predi fin dapît, fin l’ultime zornade. A mût so. Cu la sô autonomie di judizi, cu la sô preparazion e personalitât, cuntun so percors difarent. Al popul furlan e a la glesie al à fat un regâl che pôcs predis a fasin e par chel al va ancjemò plui preseât: il regâl de culture, la caritât de sience. A diference de pluritât o de totalitât dal predessam furlan, peât vîf e muart a la propie parochie, a glesiis, canonichis, asilos, dutrinis, azions catolichis e vie, il so templi al è stât chel de scuele e de stampe e dai libris. Nol à tirât sù mûrs, ma al à tirât sù gjenerazions. Al à scombatût par chê glesie spirtuâl che no à pôre de mufe o dai slacs o des scjassadis, che e resist al timp e ai agjents atmosferics, ma ancje ai agjents culturâi. Se, in cheste ete di secolarizazion e di desacralizazion, la glesie e po ancjemò dialogâ cul mont e cui oms, cun ogni sorte di mont e di umanitât e cun ogni sorte di culture e di sensibilitât o insensibilitât religjose, al è propit in gracie di chescj missionaris e profetis, ch’a àn vût il coragjo di lâ a semenâ fûr dal ort de canoniche e in terens sterps e inospitâi. Mai come vuê si rindisi cont di trop che la culture, chê vere, vierte, libare, cence prejudizis, preconcets e tabùs, e à fat e e fâs par dâi al mont chel suplement di anime ch’al à dibisugne e ch’al brame. A son chescj oms libars e coragjos, cui lôr breons butâts di là de glesie di clap e de strete confessionalitât, che a viergin puints, a crein colegaments, a semenin simpatie, a coltin rapuarts positîfs cu la realtât plui slargjade. No ai nissune pôre a dâur la cualifiche di pionîrs, di cursôrs, di profetis, sul stamp di Zuan il Batiste, mandât a prontâi la strade al Salvadôr. La strade pe gnove vanzelizazion o pe vanzelizazion tout court e passe pe culture, pes ideis. No stin a dismenteâ che Crist al è il Logos, la Sapience, la grande Idee.

Mi plasarès che i predis, chei pôcs ch’a son, restâts, cjamâts di agns, di duliis, di impegns e di delusions, a pierdessin mancul timp e fuarcis daprûf di robis che no valin e no mertin e si dedicassin di plui a la culture. Par frontâ il mont, par capî il mont, par dâi al mont alc di valit, ch’al resisti al timp e a lis modis. Cence volê fâ graduatoriis di merit, che no soi competent e in grât, mi permet di ricuardâ che un don Lorenzo Milani, cu la sô scuele di Barbiana fûr dal mont, cu lis sôs ideis pedagogjichis, cu la sô libertât culturâl al à fat pe glesie e pal mont ben plui di centenârs e miârs di predis impegnâts e scanâts a fâ sù ricreatoris sierâts a pene screâts, cjamps di balon là che a cressin lis urtiis, canonichis faraonichis pes pantianis e glesiis simpri plui stonadis rispiet a la consistence e a la coerence dai fedêi. Chel don Milani ch’al à dit che l’istruzion e je l’otâf sacrament e ch’al à combatût invanamentri e dolosamentri i predis dal calcet e contestât lis campagnis democristianis des canonichis e des curiis.

Pre Bepo Marchet al è sun cheste linie dal sacerdozi culturâl, dal sostentament da l’anime e da la ment. Come lui e dongje di lui o scuen meti chel che o riten pari de mê anime e gno grant benefatôr culturâl e spirtuâl, pre Checo Placerean di Montenars, ancje lui impegnât al spasim tal cjamp de culture civîl e religjose e dal riscat sociâl e politic dal popul furlan. Cuant che o ai dât dongje la sô memorie biografiche, mi soi pontât par che, in cuviertine, al vignis metût un so ritrat fat te basiliche di Aquilee, cui paraments di predi e in at di predicjâ. Parcè che ancje lui al à vivût e al è muart di predi e al à beneficade, cu la sô inteligjence, lis sôs intuizions, lis sôs inziativis, la glesie furlane e la sô int.

O speri di vê rivât a sclarî il gno pinsîr e a provâ la mê tesi, ancje se si varà di lavorâ e tant par meti in lûs l’apuart che chescj fameis di Diu a àn dât a la glesie che ju à ordenâts e ospitâts. No vuei però sierâ la mê puare testemoneance cence fâ, a vôs alte, une domande scontade e dolorose. Pre Bepo Marchet e pre Checo Placerean, e altris, a àn vivût il lôr jessi predis tal mont de culture e a àn servide la lôr glesie in chest apostolât cussì grant. Ma cemût ju ae tratâts la glesie?

O volarès cun dut il cûr podê dâ une rispueste positive, disint che la glesie, tai siei rapresentants uficiâi e cualificâts, e à savût jessi mari afetuose e gjenerose par chescj fîs che le servivin tun teren cussì delicât e sui paradôrs de catolicitât, a contat diret e seguitîf cul mont de culture ma ancje de difidence, de divergjence, de ostilitât tai confronts dal pinsîr cristian e religjôs. Jessint dibot in partibus infidelium, in mission, a varessin mertât une atenzion e une premure dute particolâr e une ricognossince sclete pal grant lavôr che a fasevin. No je lade lafè no cussì. Nissun segnâl di ricognossince esterne, come un titul, che nol coste nuie e al ven regalât a scjernete e a personis siguramentri mancul meretoriis. Nissun ricognossiment formâl, come un invît uficiâl, e duncje impegnatîf e nobilitant, a spartî cui predis lôr fradis la propie competence e la propie ricjece culturâl. Se o vessin vût pre Marchet a insegnânus in seminari, o varessin capît tant di plui dal nestri patrimoni, lu varessin gjoldût e tignût cont cun plui gjelosie e braure, soredut inte conseguence dal taramot. Ma pre Bepo nol è stât mai invidât a fevelâ des sôs glesiis, dai siei sants, de sô leture origjinâl e contestatorie de liende furlane. Cussì come che pre Checo no nus à fate une lezion, une di numar, sul patriarcjât, su la teologjie aquilejese, su lis glesiis orientâls cu la lôr struture sinodâl e cu la lôr passion pe tradizion e pal misteri. Jo o ai dit messe dal 1965. Un an prime de muart di pre Bepo. O vin vivût par agns e agns te stesse citât di Udin. Nissun dai miei compagns no lu à nè viodût nè sintût a vê indiment. Nancje dal so paesan e furlanon pre Pieri Piçul. E pre Checo, ch’al sarès deventât il nestri mestri, lu incuintravin la joibe, li des muiniis di san Pauli, cuant che o levin a fâ dutrine. A jerin int di no frecuentâ, vitandi. No stoi dant judizis né cirint responsabii. O stoi contant i fats. Fats che no son gambiâts nancje dopo de lôr muart. La diocesi di Udin no à spindût un franc, no à dade une sale, no si è sintude in dovê di fâ une cunvigne di predis e di laics par onorâ chescj siei fîs e meti in lûs il lôr pinsîr e la lôr produzion. Doprant un parangon trist ma just, no àn savût doprâ il lidric nancje dopo di vêlu cjatât tal cjadin za taiât e lavât. Pecjât! Par lôr e par nô. E ancje pai grancj che o stin ricuardant o onorant.

Forsit la situazion e je gambiade, dopo de fin des ideologjis e dal slac dai mûrs fisics e culturâi? Se mi è permetût di zontâ a tante virtût ancje il gno puar non, cheste volte come testemoni di prime man, o pues dî che la clime no je gambiade par nuie. E reste intate la malinfidence, al reste intîr il suspiet, e reste dute l’emargjinazion par chei che a vuelin resonâ cul lôr cjâf, bati stradis difarentis, cirî di dî cun peraulis e concets gnûfs l’eterne veretât. E chest mi displâs. Parcè che al è ridicul e patetic vaî su la miserie di predis, di profetis, di ponts di riferiment, dopo di vêju sistematicamentri, brutalmentri emargjinâts, svilanâts, anatematizâts. No pratindarìn migo che il Spirtu Sant nus mandi int valide par che nô si divertìn a sbarâur come ai gneurs? “Gjerusalem, Gjerusalem, che tu copis i profetis e tu claponis chei che ti son mandâts, cetantis voltis no aio cirût di tirâ dongje i tiei fîs, propit come la gjaline e tire dongje i siei poleçuts sot des alis, e vualtris no vês volût! Ve: la vuestre cjase us sarà lassade deserte” (Mt 23, 37-38).

O sin tal timp de coresime, il timp de conversion. Preìn e lavorìn par che ogni struture si mendi dal pecjât orent di privilegjâ i stupits e i lechins e di eliminâ i inteligjents. Tignin aments che inte storie de glesie a àn zovât plui i eretics e i disubidients che i fals ubidients, che a tasevin dome par no vê rognis. O sin tal timp di passion. Dopo di vê preât par tancj ch’a àn patît pe fedeltât a la glesie, preìn ancje par chei che a patissin par colpe de glesie. E che il Signôr nus perdoni il delit di vê strassade tante gracie di Diu.

Glemone, 1 di avrîl dal 2006

pre Antoni Beline
diretôr de Patrie dal Friûl