La letare a Filemon
Ancje cheste letarute, insieme cu la letare ai Efesins e ai Colossês, e fâs part des “letaris de presonie”. Dome che, a preference di chês altris dôs, Pauli al è ancje l’autôr matereâl dal scrit.
L’apuestul i scrîf a di un cristian di Colossis che lu veve convertît lui e che duncje al podeve vantâ sun lui une sorte di paternitât spirtuâl e cualchi dirit (v. 19) par visâlu che il so sclâf Onesim, ch’al jere scjampât, al sta tornant dongje.
L’impuartance di cheste piçule vore e sta tal fat che l’apuestul al fronte, di chê strade, il cantin de sclavitût, une robe che no podeve jessi in linie cu la “libertât” dal vanzeli, ma ancje ch’al jere facil di jessi stracapîts e di passâ par rivoluzionaris. Pauli al dà une “leture” spirtuâl dal câs. Ancje se denant dal mont tant il paron che il sotan a mantegnin il lôr puest e la lôr distance sociâl, dal moment ch’a son deventâts cristians a son deventâts fradis e ducj i doi a son sotans dal stes Signôr Gjesù (v. 16).