La letare ai Galazians
Cheste piçule letare e je mandade a groputs di cristians ch’a jerin tal cûr de Turchie di vuê, te zone di Ankare – par vieri Ancire – regjon clamade te ministrazion dal imperi roman “Galazie”, par vie che tal tierç secul p.d.C. si jerin sistemâts i Galazians, une int di riunde celtiche. Pauli, tal secont viaç, al veve scugnût fermâsi par colpe di une malatie e di chê strade ur veve contade la buine gnove. A jerin nassudis piçulis comunitâts tai borcs de Galazie (4,12-13). Daûr di Pauli però a jerin passâts altris missionaris, rivâts di Gjerusalem, e a vevin inviât un gjespâr te comunitât disint che Pauli nol jere un vêr apuestul, un dai “Dodis”, e che il so vanzeli nol jere complet. Usance lôr, no bastave la fede in Gjesù Crist e il batisim par jessi cristians, ma si veve di fâsi gjudeus midiant de circuncision impegnantsi ancje a lâ daûr de leç gjudaiche. Pauli al jere tornât a passâ di chês bandis e si jere incuarzût che te comunitât cristiane al jere capitât alc di stuart. Alore, a pene rivât a Efeso, tal 53/54, al dete cheste letare. L’implant al rissint de situazion ch’o vin motivade modant.
1. Dôs peraulis di salût (1,1-5) e Pauli, saltant la solite preiere di ringraciament, al fronte la cuistion. Al vise i cristians di stâ vuardâts di chei ch’a corompin il vanzeli e al fâs un struc vivarôs des sôs vitis di apuestul. Al è stât diretamentri Gjesù Crist a clamâlu, a mandâlu e a dîi ce ch’al veve di contâur ai paians. I sorestants di Gjerusalem, massimamentri Pieri e Jacum, a àn ricognossût il so impegn e il so implant di missionari (1,11-2,14).
2. Te part centrâl de letare, Pauli al fevele dal vanzeli ch’al veve za contât, provant ch’al corispuint al plan di Diu: il rapuart coret cun Diu e la salvece no àn la fonde su la leç ma su la fede in Gjesù Crist. I cristians, di ce cu sedi gjernazie o popul, a son fîs di Diu, sfrancjâts midiant dal don dal Spirt (3,1-4,31).
3. Pauli al tire lis conseguencis pratichis dal jessi cristians: si à di vivi la libertât tune caritât plene di voe di fâ, che dome il Spirt al pò dâle (5,1-6,10).
Prin di sierâ, Pauli al cjape il penâl e ur fâs un ristret ferbint di dute la letare (6,11-17). Podopo, cul so stîl, ju salude (6,18).
Cheste letare a lis glesiis de Galazie, cun dut ch’e je curte, nus dà un litrat vîf di Pauli, un temperament primari, pront e rissolût cuant che si trate di difindi l’integritât dal vanzeli. La letare nus esibìs un struc di chest vanzeli dal apuestul, che lu displearà cun plui calme e plui a larc te letare ai Romans.