La letare di Gjude
Si trate di un piçul bilgjetut e nol è di dâsi di marivee che la tradizion e stenti tant a ricognossilu e a cjapâlu par bon. Cun dut chest, però, za dal IV-V secul cheste letare e je tal mac dai libris dal cjanul cristian. L’autôr si presente tant che “Gjude, servidôr di Gjesù Crist, fradi di Jacum” (Gd 1). Par dî la veretât, tal GT and è cuatri di lôr ch’a àn chest non. Facilmentri il nestri nol è tal grop dai apuestui, parcè che nol varès lassât fûr, tal presentâsi, un titul cussì impuartant. Si trate invezit di un cristian che no cognossìn il so non, de fin dal prin secul e ch’al va daûr de tradizion di Jacum. Pe stesse reson, l’ambient di riunde al pò jessi chel palestinês, Gjerusalem, o miei ancjemò chel di Antiochie di Sirie.
La letare e je dute un atac cuintri di chei cristians ch’a pendin pai çavariaments “gnostics”. Par lôr, la fede si ridûs a une cognossince dute particolâr di Diu e dal distin dai oms. Conseguence pratiche: a refudin ogni regule morâl. Il gjenar leterari al è chel dal librut polemic, ch’al devente ancje ocasion par une racomandazion a tignî dûr par amôr di Crist. Cheste letare e la seconde di Pieri si semein une vore, tant par cont di tematiche che di test, ancje se chi si dopre il VT cun plui libertât e cence disdegnâ nancje i libris apocrifs (Enoc).
L’implant al è chel di une letare. Dopo di vê saludât (1-2), l’autôr al conte il teme (3-4) e lu disvuluce in doi moments:
1. judizi e condane dai aversaris (5-16);
2. racomandazion ai fedêi (17-23).
Al siere cuntune cjante di laut o dossologjie, sul stamp di chês formulis liturgjichis ch’a dopravin tes comunitâts cristianis (24-25).
Cheste letare e va ben ancje in dì di vuê parcè che nus propon une fede fondade sun Gjesù Crist e confermade cuntune vite cristiane come cu va.