Il profetisim
Il profetisim nol è une esclusive dal popul ebraic, ma in nissune religjon e in nissun popul nol à vude une funzion cussì impuartante.
Il profete (peraule di divignince greche) al è un ch’al fevele tal puest o denant di Diu. Disint che al fevele tal puest di Diu si intint meti in lûs la sô mission o clamade; disint che al fevele denant di un re o di un grant si intint meti in lûs la sô funzion politiche e sociâl; disint che al fevele denant che lis robis a sucedin si intint meti in lûs la sô capacitât di predizion dal avignî. Par solit nô o cjapìn la profezie in chest sens di predizion, che però nol è l’unic ni il fondamentâl.
Fondamentâl, intal profete, e je la sô clamade, il mes che Diu i consegne. Chest mes al pò rivâi in plui manieris: tune vision, tune ispirazion interiôr, a colp, par câs. In dute la sô vore il profete al manten dutis lis sôs cualitâts e i limits de sô umanitât, comprendude la pôre denant di une mission sproporzionade a lis sôs fuarcis. Però nol dubite mai che al è stât Diu a clamâlu e che la sô peraule e je vere e sigure. La fuarce dal profete no dipent duncje dal profete stes ma de fiducie in chel Diu che lu à sielzût.
Il profete al è partant un om ch’al à vude une esperience inmediade di Diu, ch’al à vude une rivelazion de sô santitât e dal so volê, ch’al judiche il presint e al viôt l’avignî cu la sigurece stesse di Diu e al è mandât par riclamâ i oms su la strade de ubidience e dal amôr par Diu.
O varìn alore, inte dutrine dai profetis, trê liniis di fonde ch’a son ancje la carateristiche de religjon dal VT: la trassendence e santitât di Diu, la justizie, la salvece che Diu al à preparade pal so popul e pal mont come la sô ultime rispueste.
La unicitât di Israel e sta inte sô cussience clare di un sôl Diu e te negazion di ogni altri diu. Cuintri di cheste afermazion straordinarie e sta la debolece dal om, puartât a butâsi in genoglon denant des robis creadis e a cjatâsi fûr une sigurece là che no si pò vêle. I profetis a riclamin monarchie, templi e popul su la santitât e la trassendence di Diu, l’unic ch’al merte adorât e servît, l’unic che al pò dâ la salvece ancje in cheste vite.
Come ch’a àn cussience clare de santitât di Diu, i profetis a àn cussience clare ancje de miserie morâl dal om e de sô pendence croniche al mâl e al pecjât. L’om e il popul a àn di fâ une vore continue di conversion, di cirî Diu in maniere simpri plui profonde e sclete, stant che ancje la istituzion religjose e pò deventâ un tramai se il legalisim i dà la volte al spirt. No si pò dî che i profetis a sedin par fuarce cuintri dal templi; si scuen dî che a sburtin l’om a privilegjâ la religjon dal cûr rispiet a chê legâl.
Diu, sant e trement, al cjastie sengui e popui. No lu fâs però pal gust di fruçâ. Lu fâs par podê meti in vore il so progjet. Lui al sa che il popul si slontanarà de strade de vite e al sielzarà la strade de ruvine ancje politiche ma al spiete il so popul a la fin dal so calvari par tornâ a menâ dongje un “rest” purificât e spiritualizât che al sarà la semence di un popul che si slargjarà al mont intîr. Man man che si va indenant cul timp si slargje ancje l’orizont dai profetis, ch’a deventin i prins bandidôrs di une salvece universâl. Diu al sarà re di dute la tiere e al varà un so consacrât, un Messie, che la prime comunitât cristiane e à viodût in Crist. Crist al è duncje la realizazion des profeziis: il “dissendent di David”, l’ “Emanuel”, il “Fi dal om”.
I libris profetics no presentin ducj i profetis de Bibie. Par esempli no tratin di Mosè, che la Bibie lu met in teste dai profetis (Nm 12,6-8; Dt 34,10-12), ni di Elie, ni Liseu, ni dai scjaps di profetis che si cjatiju tai libris dai Rês, ni di Natan o di altris. Par chel, fevelant di chei che a son jentrâts tal cjanul de Bibie, al è plui just fevelâ di “profetis scritôrs”. And è cuatri “grancj”: Isaie, Gjeremie, Ezechiel e Denêl, presentâts in ordin cronologjic, e dodis “minôrs”, ch’a vegnin sistemâts in maniere arbitrarie.
Il timp dal profetisim, tal so moment plui sflandorôs, al va de metât dal sec. VIII, cun Amos, fintremai a metât dal sec. VI, cjapant dentri lis grandis personalitâts di Isaie e Gjeremie, cun in plui Osee, Michee, Naun, Sofonie, e Abacuc. Gjeremie al finìs cuant che al tache Ezechiel. O sin tal timp dal esili e la profezie e piert di fûc e di spontaneitât. Agjeu e Zacarie a compagnin i ebreus ch’a tornin dongje de depuartazion. Malachie al fevele des pecjis de gnove comunitât. In Denêl za si fevele dai profetis di prime.
L’ultin profete dal VT lu presente Gjesù in persone: al è Zuan il Batiste “profete e plui di profete” (Mt 11,9). Ma o sin za tai timps gnûfs.
Il libri di Isaie
Al è l’autôr che al vierç la schirie dai libris profetics e siguramentri il plui alt come ispirazion poetiche e il plui daviert come orizont religjôs.
Profete dal ream di Gjude nassût tor il 760/750 p.d.C., par dibot cincuant’agns al à vude une part di prin plan ancje dal pont di viste politic. La sô cognossince de vite di cort di Gjerusalem e la sô jentradure cui rês Ozie, Jotam, Acaz e Ezechie e fâs scrupulâ che al sedi saltât fûr de nobiltât citadine.
Fedêl a la sô clamade profetiche che e à tal sfont adiriture la cort dal cîl (c. 6), intun timp di decadence religjose e morâl e tal gredei di liendis politichis che a riscjavin di strissinâ Israel fûr dal troi de sô aleance cun Diu, Isaie al à riclamât cence padin rês e popul ai lôr impegns cul Signôr, berlant in ducj i intonos che la strade de salvece no passave pal Egjit ni par altris aleancis, ma dome pe fedeltât morâl e religjose a la dutrine dal pat cul Signôr. Butantsi te idolatrie e te plui slavrade injustizie sociâl, il popul e lis istituzions monarchiche e cultuâl a podevin spietâsi dome disgraciis.
Chest libri, di alte poesie e di profonde religjositât e ispirazion, al è componût di plui parts.
La prime (cc. 1-35) e met adun lis peraulis di Isaie sot dai reams di Acaz e di Ezechie e si siere cuntune zonte storiche (cc. 36-39); la seconde (cc. 40-55) e riflet la situazion dai esiliâts gjudeus in Babilonie prime dal fruç di cheste citât (539 p.d.C.); la tierce (cc. 56-66) si intone a la restaurazion ebraiche dopo tornâts dongje dal esili (a. 538). I cc. 24-27 e 34-35 a àn un intono apocalitic e a semein scrits te clime de fin dal esili.
Aromai i critics a acetin che il libri al è stât componût di plui mans. Si fevele gjeneralmentri di un secont Isaie (o Deutero-Isaie) pe seconde part e di un tierç Isaie (o Trito-Isaie) pe tierce part. Lis varessin componudis dissepui dal grant profete, fedêi a la sô memorie e al mes dal lôr mestri. Di fat Isaie al è grant ancje pal fat di vê creade une scuele (8,16).
Si pò dî che viers il 200 p.d.C. il libri al jere dât dongje te forme che lu vin cumò. Di fat un rodul complet di Isaie al è stât cjatât a Qumran dal 1947, scrit duncje tal II sec. p.d.C.
Un libri cussì grant, cussì vast, cussì plen di sostance, di poesie, di epiche, di pagjinis viamentis e di tocs che ti forin il cûr, un libri che al cjape dentri no dome la storie dal popul ebraic ma il distin di dute la umanitât, no dome i oms ma dute la inmensitât cosmiche, al è dificil sintetizâ. In plui al à une ricjece uniche par cont di profeziis messianichis, tant di mertâi al autôr il titul di “profete vanzelist”. Bastarès dome cjapâ in man la part che si riferìs al patiment dal “servidôr di JHWH”, ch’al puarte su lis sôs spalis i pecjâts dal mont e al pae par dut il mâl dai oms, par capî che mai come in chest libri il VT si svicine, par spirt e profonditât, a la plenece de rivelazion dal GT.
Un insieme di valôrs religjôs, poetics, leteraris, umans, ecologjics… Chi veramentri si sint che il profete al è vôs di Diu, e une vôs ecezionâl.
Un libri cussì unic nol pò pierdi di atualitât cul lâ dal timp. Di fat lis invetivis cuintri dal consumisim, de idolatrie de robe, dal discjadiment morâl e religjôs, de religjositât di façade, e insieme la sperance come ultime rispueste di Diu a lis sieltis sbalgjadis dal om a fasin dal grant profete un contemporani ancje de nestre ete cjamade di tante robe ma fodrade di diperazion.