BIBIE IN LINIE

Rut

Introduzion

RUT

Chest libri tant al è curt e tant al è biel. Si trate de storie di un afiet familiâr che al pee fra di lôr dôs feminis, Noemi e Rut, che a son madone e brût. La seconde, par no distacâsi de prime, e implante la sô tiere, Moab, e la prime e cirarà di judâ la zovine a cjatâsi une gnove companie tal matrimoni. Dute la storie e à il sfont delicât de campagne tal so moment plui sflandorôs, cuant che si tae e si bat il forment.

Come ambientazion gjeografiche, o sin te campagne ator di Betlem, ma l’antefat al à come suage une tiere foreste, dilà dal Gjordan, come che foreste e je la protagoniste che i dà il non al libri.

L’intent dal autôr al è chel di fevelâ de gjenealogjie o riunde di David e, di chê strade, al ven metût un altri anel te cjadene dai antenâts dal Messie (Mt 1,5). Però nol è un câs che al feveli cun tante simpatie di Rut, de tribù tant odeade dai moabits. Cheste amirazion par une foreste, ch’e cjol un ebreu, e devente ancje un probleme storic a rivuart de datazion dal libri. Stant ai studis plui resints, si varès di sbassâsi fint a la ete dal esili o ancje plui in ca, seben che daûr al à une lungje tradizion orâl o scrite.

L’intent religjôs al è chel di presentânus une famee ideâl pe sô concuardie e pe sô unitât. Cheste famee e sperimente la grande provedence di Diu, che al indrece i pas dai bogns viers di une strade di furtune e di pâs. In cualchi mût si tocje duncje il cantin dal dolôr e de retribuzion dai juscj, che a traviersin moments grivis (carestie, muart) e biei (Booz e Rut, nassite dal frutin) simpri compagnâts de man sante di Diu.

Il librut al è impuartant ancje pe storie dal dirit tal mont biblic. Di fat al presente dôs leçs di fonde de legjislazion mosaiche: la leç dal riscat a difese de unitât patrimoniâl (Lv 25,23) e la leç dal levirât a difese de continuitât gjenealogjiche (Dt 25,5-10).