Olmis di Diu - A. Beline

Fasint il predi dibot di une vite, mi capite ogni tant di confrontâmi cu lis grandis figuris sacerdotâls ch’a àn onorade cheste mission sante e delicade. O sai che il confront al è dut a gno svantaç e vergogne, ma mi plâs instes di cjatâ un spieli che mi judi a jessi mancul indegn de clamade di Diu. E une des figuris plui grandis e cjaris e je chê dal gno antenât Samuel, il predi profete restât model insuperabil fint a Crist, gnûf e unic grant predi.
La bibie nus conte che i gjenitôrs di Samuel, Elkane e Ane, ricognossints pal grant regâl di chest frut vût in etât, lu àn avodât a Jahvè, par che al servis il Signôr te sô cjase sante, fra mieç dai predis. Forsit a pensavin, te lôr ingjenuitât, che nissun nol fos bon di tirâ sù la canae miôr dai predis e des muiniis, ancje se i fats a vevin di lassâju malapaiâts. Ane e leve ogni an tal templi e, viodint il so moculut dut imbramît, i faseve une mantelinute, parcè che, predi o no predi, al restave simpri so fî e simpri un frut. Un frut, e dîs la bibie, che al cresseve une vore ben e si preparave, cul jutori di Diu, a la mission che lu veve distinât. Ma, par rivâ a chel tant, al veve di imparâ a cjapâ confidence cun lui, a imparâ a disserni la sô vôs. Ancje pal fat che, nus vise la bibie, “in chê volte al jere râr il câs che il Signôr al fevelas, che no si viodeve migo a ogni pît alçât” (1 Sam 3, 1). Une regule prudenziâl che e varès di valê ancje par vuê, s’al è vêr che il Signôr si diferenzie di nô sore dut pal fat che nol gambie idee cul variâ dal timp o dai timps.
Mi plâs chest alenament sprituâl dal zovin Samuel, ch’al sta atent a ogni vôs, ma sore dut al studie par capî la diference fra lis vôs e la Vôs, par no riscjâ di cori daûr a ogni lusorut, usance lis paveis, e magari lassâsi scjampâ la grande ocasion de comunicazion dal Eterno. Imparâ a sintî la vôs di Diu, imparâ a inacuargisi de sô alteritât, sintî a colp il svizinâsi de sô presince, interpretâ cun fedeltât e veretât il so mes al devente une scuele di alte spiritualitât e santitât e un alenament simpri plui preziôs, a carat che si moltiplichin lis vôs e si srarìs la vôs. Te complessitât e tal gredei di vuê, si riscje di scoltâ cualunche vôs o berghelade, di lâ daûr di cualunche sturnel o plere che nus incjante e di no rivâ plui a sintî ce che Diu nus dîs.
Samuel, chest alenament lu veve perfezionât zornade dopo zornade, parcè che al jere ben disponût dentri di sé e al veve la vergjinitât e la frescjece dai fruts. La sô invocazion e je une des preieris plui bielis che o podin meti sui nestri lavris: “Fevele, Signôr, che il to famei ti scolte” (1 Sam 3, 9).
Parcè Diu fevelial inte gnot? Parcè che a Diu no i plâs la confusion, il sunsûr, come che nus palese la storie di Elie tal landri. No i plâs, o crôt, nancje la confusion catoliche. Nol è un Diu di placis o di intrupaments, parcè che al è un Diu che al fevele cûr a cûr e al ame palesâsi e confidâsi tal segret. Interessant ancje il discors de gnot e dal sium. La gnot e je il moment che si à lassât ogni lavôr e fastidi e si è plui libars, plui rilassâts e ancje plui concentrâts e pronts a sintî ogni plui piçul rumôr. Rivuart al sium, cence lâ a sconsortâ il grant Freud cu la sô interpretazion dai siums, al è evident che Diu nol fevele par di fûr, ma par dentri e il nestri subcussient al po jessi benon il lûc e il mieç di cheste comunicazion-rivelazion. Si trate di gjavâ dut ce ch’al è di masse o di stuart par ca(r)pî la novitât e la volontât che nus ven palesade.