Olmis di Diu - A. Beline

Se i fruts di scuele no vessin vacance, o crôt che nancje no si inacuarzaressin che o sin a Pasche. E nancje i grancj, che pûr a scuegnin vê memorie di un timp di funzions e di messis a rafiche, nol è che si impressionin masse. L’uniche che o ai sintût e je stade cheste: “Cjo’ mo! Si jere a Nadâl chê altre dì e cumò o sin za a Pasche”. Pôc par no dî nuie.
Dibant cjapâme cu la int. O provarai a cirî il parcè di cheste “dignitose indiference”. Prin di dut si trate di un misteri. E i misteris al à miôr lassâju a Diu. Po a son cjapâts di mil robis inmediadis che ur gjavin il sens dal timp e dai valôrs che no si ju viôt. E par ultin, ma no propit ultin, o metarès che nancje nô predis no ur vin scjaldât il cûr e inluminade la vite cuntune veretât cussì straordenarie che nus rivuarde ducj, anzit dut il creât. Pasche e je un fat cosmic.
No vin predicjât cun convinzion, cuasi trimant, la veretât straordenarie che la vite e à vinçût su la muart. No lu vin berlât cu la bocje e tant mancul cu la vite.
No si pò ridusi il misteri di Pasche a une confession e a un santut. Piês ancjemò, no si pò banalizâlu invidant “a jessi plui bogns”. Chel al vâl par dut l’an. E nol à sens dî che il cristian al à di jessi simpri “content come une Pasche”. Alore Ollio e Stanlio a varessin di fâju sants.
Pasche no je poesie ma drame; no je une veretât fate par consolânus ma par scjassânus l’aghe dal stomi. No je la sodisfazion di chel che i va simpri ben, ma la ribelion di une umanitât che no pò acetâ che la ultime peraule e sedi la muart, la sconfite, la fin. Alore o saressin veramentri disgraciâts.
La Pasche e je peade cul Vinars sant e cu la crôs. E je la inluminazion de crôs, la soluzion dal probleme dal dolôr, la rispueste scandalose al scandul de muart. No si pò fevelâ de Pasche come che si fevele dal timp, parcè che e à la stesse dramaticitât de muart. Difat la liturgjie e fevele di un duel fra la muart e la vite; l’ultin e l’unic duel che al merte combatût.
La Pasche no gjave il dolôr ni la muart. I dà la rispueste che Diu al à dât al berli di Crist su la crôs cuant che si sintive bandonât. La Pasche e va viodude e predicjade in chest contest. Cuant che Diu al semee che al sedi plui lontan dal om, al è plui dongje di simpri. Parcè che la vite gnove che Diu nus regale si pee cu la muart che la nature nus condane. Un grop che no si pò e no si à di disgropâlu.
Alore ancje in chest Friûl di int vecje, di fruts che no nassin, di cjasis che si sierin, al è just berlâ la resurezion. Parcè che o sin tune suaze di muart.
La glesie no à di fâ campagnis teroristichis o demografichis. E à di berlâ cence soste la veretât de resurezion. Berlâle, no spiegâle. Ancje se nissun scolte. Ancje se le ridin. Ma berlâle interie, tal so significât plui vêr, no pastrocjantle di sociologjie o di psicologjie religjose. Pasche e je la muart che e parturis la vite, cuintri di ogni logjiche.
E berlâ a fuart la resurezion de cjâr. In Aquilee, cuant che a disevin di crodi “la resurezion di cheste cjâr”, si muardevin la man, tant par no restâ tal astrat. La glesie no à altre mission, altre reson di esisti che cheste: berlâ la resurezion. Cun gjonde e cun pore, come lis feminis che a tornavin dal sepulcri. Parcè che in chest mont la fede e tegnarà simpri par man il dubi.