Olmis di Diu - A. Beline

Diari di un pintût

01 di Zenâr 2006

No soi pintût di vê disubidît cuant che o sintivi di vê resons validis par sostignî une idee pensade, pesade, confrontade e colaudade. Mi soi pintût invezit di vê ubidît tantis voltis cence convinzion e adesion sincere e convinte, juste par no vê rognis o par fâi plait al superiôr, rinunciant a cressi interiormentri te uniche maniere juste e dingitose: rispuindint e paiant di persone ogni mê sielte. No soi pintût di vê batût, cun insistence ritignude fastidiose, su la diviersitât e pluralitât di ideis e di sieltis. Mi à semeât di judâ la comunitât a ricjatâsi tune unitât plui sostanziose e benefiche. Mi soi pintût invezit di vê acetât cun masse facilitât l’idee de unitât pe unitât o, piês ancjimò, de uniformitât fate passâ par unitât. E je stade une siele disgraciade, parcè che jo o ai pierdude une buine ocasion e la stime di me e la comunitât e je saltade fûr plui distudade e puare.

No soi pintût di vê scombatût cun passion e passionalitât, sore dut tai agns de zoventût, par une glesie ideâl, utopistiche, masse in alt e masse perfete par podê jessi cjapade come model. Mi soi pintût invezit pes tantis voltis che mi soi rassegnât, o lassât rassegnâ, a la realpolitik, a la filosofie dal bonsens, a l’acetazion acritiche e pacjifiche de realtât di fat, ritignude normâl e positive. La glesie no à di vê chel bonsens ch’al è plen il mont, ma e à di vê il sens di Crist e di Diu, lui ch’al è vignût a dividi, a fâ sentence, a dâ scandul, a rivoluzionâ il mont partint de rivoluzion dal cûr e dai cûrs. Une glesie che si contente de normalitât e je falide e finide, parcè che no à rivât a colmâ la sô mission di levan e no à nuie ce dî o dâ. O la glesie e je diferente e alternative o no covente. Cuant che o pensi che Crist al è partît cuntune idee rivoluzionarie e si cjatìn tune congreghe là che la forme e il formalisim, il mût di fâ o di contâ, il bonton e il perbenisim a àn une impuartance cussì fuarte, mi jempli di aviliment e di gnervôs. O sin lâts a cessecûl.

No soi pintût di vê doprât, tai confronts de int che e je vignude a contat cun me par svariadis resons e in svariadis ocasions, dute l’umanitât pussibil e inmagjinabil, savint che ducj si fâs part di chê stesse umanitât che e je e e reste la reson prime di ogni solidarietât e comunion. Une umanitât che e je simpri un valôr, ancje se no simpri e je vivude in maniere positive. Mi soi pintût invezit di vê doprât, raris voltis par furtune, lis difesis, lis armis o lis prepotencis de leç, de struture, dal sisteme. Come cuant che, metint intôr une vieste benedide, mi soi sintût difarent e plui alt di chei altris. O montant sui scjalins di un altâr, mi soi inludût di jessi il rapresentant uficiâl e la vôs autentiche di Diu e no un puar om come ducj che, prime di fâur la predicje o la morâl a di chei altris, al à di domandâsi cun ce competence e coerence che lui al ministre misteris cussì grancj fasint une vite cussì basse.

No soi pintût di vêi dade a la int, ancje o sore dut plui puare moralmentri, la sperance, la sigurece dal perdon di chel Diu che nol à dibisugne de nestre virtût ma de nestre umiltât, che no si esalte cuant che si presentìn denant di lui i nestris merits fûr di cors ma che si incore cuant che nus viôt a rivâ berlant di dolôr e di disperazion, come ogni mari e pari che si rispietin.

No soi pintût di vê confessât, denant de int, i miei dubits e lis mês insigurecis e il scûr ch’al contorne la muse di Diu e il so misteri. Mi pentis invezit di vê fevelât masse voltis e cun masse sigurece di ce che si fasarès ben a tasê e a adorâ cul cjâf bas.