Olmis di Diu - A. Beline

O stoi meditant sul misteri de gnot sante, che e je stade spartide de lûs impiade a Betlem te umiltât di un sierai par pastôrs e nemâi.
La religjon e je circondade di misteri, e je misteri. E il misteri si vistis di simbui, che nus dan une clâf di leture e un segnâl. Par chel inte liturgjie il simbul al reste centrâl e al va salvât inte sô gjenuinitât e inte sô trasparence.
Ancje il vanzeli par simbui. Ancje il presepi al è un simbul, une clâf par svissinâsi al misteri.
Leint il vanzeli di Luche (2,8-20) e cjalant il presepi si viôt che a mancjin tantis categoriis di personis, soredut chês che par solit, inte storie umane (o disumane), a son in prin plan; invezit a an une part di protagoniscj chei che par solit a son dome comparsis o vitimis de tragjicomedie umane. O stoi fevelant dai predis, dai vuerîrs e dai siôrs di une bande e dai pastôrs di chê altre.
No soi tant sempio o ingjenuo di spartî la bontât e la carognetât in base al modul des tassis. A’nd è puars carognis come che a’nd è siôrs cussients; a’nd è int che no à nuie e e je egoiste e int che e à bêçs e e rive a doprâju cun cussience e liberalitât.
O vuei lâ plui in sot, tal cûr des personis. Ancje lis beatitudinis a clamin furtunâts i puars tal spirt (Mt 5,3). Puars a son chei distacâts des robis dal mont, che no si poin suntune fuarce matereâl ma a metin tal Signôr dute la lôr fiducie. Puaretât e libertât a son sinonims.
Però al è clâr che la puaretât di bêçs e di mieçs umans e je la strade plui drete pe puaretât spirtuâl. I puars no puedin fâsi inlusions, par chel al è plui facil che si metin in viaç, a cirî.
I predis no son lâts a cirî il Signôr parcè che a jerin sigûrs di vêlu o lu cirivin intai libris. Ma un Diu teologjic nol vâl un Diu di cjâr. I siôrs no lu cirivin parcè che a vevin za un lôr diu e a jerin masse impegnâts a traficâ e a contâ palanchis. E po, pluitost di vê un Diu esigjent e alternatîf a mamone (Mt 6,24), mil voltis miôr stâ cence. I soldâts a varessin stonât masse denant dal princip de pâs. I unics adats a jerin i puars pastôrs: i unics che a veglavin e i unics disponûts a frontâ il crût de gnot par cirî une lûs.
In chei pas suturnos dai pastôrs o viôt la prucission dai puars, lis trasmigrazions dai popui che a an traviersade la gnot infinide de storie par cirî un toc di pan, une cuarte di sotet, un fregul di libertât, une once di dignitât. O gnot eterne dai puars e dai disperâts, uniche vere gnot e uniche che e merte di jessi inluminade de lûs liberant e consolant di Crist! O pas benedets dai puars, che di simpri o cjaminais cence mai fermâsi, parcè che inesauribil e je la fan e sêt di justizie e di dignitât che us sburte! I siôrs si fasin menâ; i predis a preferissin stâ sentâts a studiâ o ingenoglâts a preâ. Dome i puars a cjaminin simpri. Par scjaldâsi e par cirî.
Signôr, no sta cjastiâ i puars cul gjavâur la sperance e la gole di cirî. Dome viôt di lôr, parcè che a son simpri a riscjo. Chel che al è tal scûr, al va par dut là che al cjate lusôr, usance lis paveis che a svolin viers la lûs e a restin brusadis. Signôr, no sta cjastiâ la eterne inlusion dai puars cun eternis delusions.