Olmis di Diu - A. Beline

Lis glesiis plui furnidis a varessin di vê, se cualchi predi sturnel nol à spesseât a brusâle, une planete di colôr violet, a mieç fra il viole e il rose, di doprâle dome dôs voltis ad an: la tierce di Avent e la cuarte di Coresime, tes domeniis “Gaudete” e “Laetare”, de prime peraule dal messâl.
San Pauli al dîs: “Stait simpri legris tal Signôr. Us al torni a dî: stait legris. Il Signôr al è dongje” (Fil 4,4). Isaie al berle: “Indalegraisi cun Gjerusalem, gjoldeit plui che o podeis, ducj vualtris che i voleis ben” (Is 66,10).
Ma si puedial, in cussience, meti sù il colôr de contentece tun contest come il nestri, cui paîs di vecjos e di cjasis sieradis, cui fruts che si contiju su pai dêts, cui zovins che la domenie a buinore (chei che a rivin a saltâ fûr de cove) a vierzin la bocje dome par domandâ bêçs, di mangjâ o par sossedâ? Si puedial ridi cuntune television che prime ti fâs vaî cu lis disgraciis e po cu lis monadis? Cun cheste insigurece politiche, fate di barufis e di prepotence, là che al vinç chel che al à plui batule e podê di ricat?
Une volte i àn dit a Pauli VI parcè che nol rideve mai. E lui al à rispuindût: “E parcè varessio di ridi?”.
Salacôr bisugne fâ un discors plui profont e plui cristian. O tacarès cu la diference fra la gjonde, la contentece e la ligrie.
La ligrie e je alc di superficiâl, di passaç, come lis ondis dal mâr; la gjonde e je alc di profont, come la profonditât dal mâr, che e reste intate ancje tal plui grant burlaç. La ligrie e je peade a une sensazion; la contentece a une situazion. La ligrie, soredut il bacanâ slavrât, e je peade al cuarp te sô dimension plui matereâl. Difat un che al à mangjât passût al tache a cocodâ e, se al à parât jù un tai di plui, si dîs che al è legri. Plui che stâ ben, al semee di stâ ben. La gjonde invezit e je peade plui a la dimension spirtuâl dal om. No partis dal stomi o de panze, ma da l’anime. No rît la bocje, ma a ridin i vôi. No cjante la bocje o nol è chel l’essenziâl, ma al cjante il cûr.
Chel che al è passût e beverât e al berghele in maniere volgâr al riscje di fâ patî chei dongje, massime se no stan ben, cu la cuâl che l’anime contente e discrete e fâs stâ ben ducj, tacant di chei che a stan mâl. Parcè che e je une trasfusion di spirt. Jo inte mê vite o ài viodude int contente ancje se e veve dutis lis resons par lamentâsi, come che o ai viodude int che e rideve ma cul cûr disperât.
La spie plui clare di un popul a son i cjants. I cjants furlans a son simpri contignûts e cuntune ponte di malincunie. Il nestri popul nol jere simpri legri, ma al veve une sô contentece, une gjonde da l’anime. Difat al cjantave. Cumò al à forsit plui ligrie, plui confusion, ma al è mancul content. Difat nol cjante.
Si è legris cuanche si à; si è contenz cuanche si è. Parcè un cristian, un furlan puedial jessi content? Parcè che il Signôr al è dongje. Lui che al zonte là che nô no rivìn e al comede e al drece cuant che lis robis no van. Se il Signôr al vûl premiâ un popul i mande la contentece dal cûr, che e ven cu la fadie, cul scombati, cul semenâ, cul sperâ. “Furtunâts chei che a vain, parcè che a saran consolâts”.
Un trist e un passût al pò sghignî o ridi, ma dome un bon al pò jessi content. Miei vaî pardabon che ridi a stupit vie.