Olmis di Diu - A. Beline

Al è di bant meti il cjâf tal savalon par no viodi la realtât: 50 milions di copiis in dut il mont e la int in code par viodi un film ancjemò plui sbalât dal libri a son une buine sberle. A la serietât de int, a la coerence dai cristians e di chei che, in gjenerâl, a cirin la veretât, a la fuarce di persuasion dai inteletuâi e dai mestris in fat di religjon e di fede. Il segretari de Congregazion pe dutrine de fede al à mandât fûr un document là che al spieghe e al conteste une par une lis teoriis sbaladis di Dan Brown e lis falsetâts evidentis cu la tradizion culturâl cristiane, lis incongruencis e lis assurditâts storichis; vescui e gardenâi e predis e parfin une organizazion potente e influente come l’Opus Dei, clamade in cause cence nissune logjiche, a àn visât e stravisât che si tratave no dome un fals ma di une ofese a la reson e a la religjon. Poben tant clamôr e tantis predicjis, sacrosantis, no àn fermât nissun curiôs dal comprâsi il libri o di butâ vie i bêcs pal cine. Che anzit la proibizion e lis racomandazions de gjerarchie a àn fat di casse di risonance, trasformant une banalitât tun event mondiâl.

Denant di chest flop gjenerâl, o scugnìn fâsi cualchi domande e tirâ cualchi conclusion. La prime, scontade ma no masse. Che nissune proibizion no à mai fermât nissun. No lu faseve par vieri, cuant chen al valeve il principi di autoritât e no lu fasarà tant mancul cumò, ch’al vâl il principi improibît improibî. Alore la glesie ae di tasê? No. E à di fevelâ, ma savint che no fermarà nissun curiôs e batecul. E à di dî la sô ma cence insisti masse, cence fâ campagnis tipo esercit de salvece, cence nissune crosade moralistiche. E à di spindi su la promozion, no su la proibizion. E à di inviestî sui svelts, ch’a saran simpri minorance, e no sui stupits, ch’a saran simpri maiorance. Plui che meti filiadis o reticolâts o paladis, par che lis pioris no scjampin, e à di creâ un clime positîf, biel, seren, di mût che no vedin nissun pice di scjampâ, savint che a molaressin il plui pal mancul.

Che la int e preferissi lis flabis, plui golosis, a la veretât, plui fadiose, nol è di cheste nestre societât postmoderne e postcristiane. Lu scriveve za san Pauli al so dissepul Timoteo: Pes lôr picis, si tiraran dongje une fole di mestris che ur slissaran lis orelis e cussì no volaran plui savênt di scoltâ la veretât par lâ daûr des sflocjis (2 Tm 4, 3-4). Pinochio, ch’al vent il silabari par lâ a viodi i pipinots, al è un model imperant e simpri atuâl. Se un al vûl lâ a font te storie di Crist e dal so misteri, nol va di Dan Brown, ma di Matieu, Marc, Luche e Zuan e dai paris de glesie e dai sants.

Il câs nus fâ capî ce tant pocje ch’e je la preparazion e la fonde culturâl dai nestris popui cristians, e ce tant pôc in sot ch’a son lis nestris lidrîs cristianis. Par dî che la vore di cussientizazion e di aculturazion e je simpri di fâ. Par chel si à di inviestî in formazion e culture plui che in manifestazions megagalatichis. Bisugne resisti a la tentazion di slungjâ l’aghe de veretât o di gasâle par viodi lis bufulutis.

Ma une domande o scuen fâme e fâle. Se un autôr furbo e pôc serio al rive a fâsi lei e cjalâ di milions di personis contant un sac di balis, parcè i nestris teolics e inteletuâi catolics no sono bogns di contâ la grande e biele veretât di Crist cu la stesse gracie e cul stes incjant? Parcè no vino di rivâ, o almancul tentâ une comunicazion golose, sflandorose, dal misteri di Crist? Parcè la veretât ae di jessi mancul biele de bausie? Parcè nô catolics vino dome documents bavôs e no cjatìno un Dam Brown?