Olmis di Diu - A. Beline

Dut ce che al nas al è un misteri, tant a dî un alc di plui profont dal rût dât anagrafic o visibil. Cui rivial adore di capî a font e di spiegâ il timp, il mût, la preparazion, la colocazion, l’impuartance, il distin di une rose, di une besteute, di un frut? Parcè nassial chel e no un altri? Parcè nassial li e no intun altri puest? Parcè nassial in chel moment e no un secul prime o dopo, che al vares vût un distin dut diferent?
Nissune marivee alore che il misteri al resti, anzit al vegni reonzût cuanche si trate di un frut che al dividarà la storie in prin e in dopo di lui e che al sarà lui il centri e il judiç e il metro di misure de storie. Chel che, comparît te umiltât de nestre cjâr mortâl, al è la inmagjine dal Diu invisibil e al à un non parsore di ogni altri non, tant in cîl che su la tiere e sot tiere.
Si sa che i misteris a van contemplâts, come lis stelis, e no spiegâts, ma san Pauli al à cirût di dî alc di grant intes sôs letaris. Bastarès cjapâ in man il prin cjapitul ai Efesins e il secont ai Filipês, là che, par dâ une idee dal “salt” di Crist de nature divine a chê umane, al dîs che “si è ridusût a nuie”.
Jo no sarès cussì fiscâl. L’om nol è propit nuie se al è stât fat “apene plui piçul dai agnui” e cerclât “di glorie e di onôr” (Sal 8,6). O sai che la Incjarnazion e je un regâl, ma l’amôr al fâs chel e ancje e no lu sint come un pês. Al pesarès a no fâlu.
Cualunche gjenitôr, ancje no catolic, al cjatarès normâl “sbassâsi” a nivel dal fî malât tal cuarp o ta l’anime, cence pretindi medais o merits. Par une sorte di istint. Une volte mi jere colât un cjanut tune vascje e la cjice e à tant fat fintremai che e je saltade dentri ancje jê, par gafâlu, ancje se a riscjavin di inneâsi ducj i doi. No veve scoltade la reson, che no’nt veve, ma il cûr, che int’ veve tant. Duncje l’Incjarnazion e va cjalade tun contest di amôr e l’amôr al rive a nobilitâ dut e a trasformâ ancje une “pierdite” in vuadagn.
Il sbassâsi di Diu al pò jessi une pierdite obietive ma siguramentri no sogjetive. E chi al sta il meracul de Incjarnazion: che nol piert il prin e al vuadagne il secont. Lis robis matereâls, cuant che a passin di un a chel altri, a fasin deventâ plui puar chel che al dà e plui siôr chel che al cjape, ma cu lis robis spirtuâls al è diferent. Par chel o varessin di usâsi a sgambiâ mancul materie e plui spirt, mancul robis e plui anime.
Cuant che il grant si sbasse sul piçul, nol piert lui e al vuadagne chel altri. La stesse robe cuant che un san si sbasse sul malât e il sapient sul ignorant e il sant sul pecjadôr. Chest al sucêt, o al à di sucedi, in famee, in scuele, in glesie, te vite sociâl e culturâl, tai rapuarts fra personis e popui. Incjarnazion come trasfusion e passaç di amôr e di spirt. Dopo al pò vignî, e al ven, ancje il rest.
L’impuartant però che il prin tiermin al resti gjenuin. Crist al pò salvânus dome se nol rinunce a la divinitât. La glesie e pò judânus dome se e reste sante e serie e contemplative. Se il sapient e il sant, par vignî incuintri a chel altri, a rinuncin a la lôr sapience e santitât, no vin plui ni incjarnazion ni regâl, ma une tragjedie spaventose. Si inmagjnaiso un mestri che, par metisi a nivel dai scuelârs, al devente plui stupit e ignorant di lôr?