Olmis di Diu - A. Beline

La glesie e à une sô vision de storie e dal timp. Nissune marivee che e vedi ancje une sô division e un so lunari, che al varès di corispuindi no tant al soreli fisic ma al soreli spirtuâl, a Crist e al so misteri di salvece. Di li il fat che l’an al scomence cu l’Avent e al finis cu la fin dal Timp ordenari. E pe fin dal an liturgjic la glesie nus fâs lei i tocs “escatologjics” o “apocalitics”, ven a stâi chei che a rivuardin lis ultimis liendis dal timp creât (i “novissims”) e a tirin vie il vêl sul misteri de fin. Che al è un misteri di dolôr e di spavent, come che al è stât biel e sflandorôs l’inizi. Paraltri si podaressial doprâ paragons e mûts di fevelâ diferents?
Il savoltament dal cîl, cun chest oscurament e disastro cosmic, al è compagnât dal savoltament morâl, dal oscurament des cussiencis e dai disastros dai oms. Insome a saran timps bruts, di grande tribulazion, i piês. Lu dîs Denêl (12,1) e i fâs revoc ancje la Sibile.
E dai timps bruts che nus tocje di vivi, plui di un e di doi a fevelin, spaventâts, de fin dal mont. “O sin rivâts, che piês di cussì no pò lâ!”.
Cjalant e scoltant, o podarès ancje jessi d’acuardi. Il scrupul mi ven cuant che o pensi a mê mari, che e diseve la stesse robe, e le veve sintude di mê none, che le veve sintude di mê ave.
Alore o conclût che no esistin timps biei e che la fin e je scomençade di cuant che al è scomençât il mont. Come che la muart e scomence in chê dì che si nas. Il rifâsi a un timp furtunât, simpri daûr di nô e mai denant, al pò jessi tant une pore a frontâ il timp che o vin sot man, l’unic nestri, che une gole inconfessade di tornâ te panze de mari, là che o jerin sigûrs e protezûts, ma no vîfs di vite autentiche. Difat la nature nus à butâts fûr dopo nûf mês, come che si bute fûr de cove la canae pegre e durmione.
O ai fevelât di timps bruts. Ma ancje chest al è un tiermin relatîf, parcè che l’om al è pluridimensionât. Se i va ben di une bande, i va mâl di chê altre, come il timp che, s’al plûf tun puest, al è soreli in altrò. Cussì se e je grivie pal cjâf, e pò lâ ben pal stomi e, se l’art e vai, a ridin i gjostrârs e i plaçarûi. Nancje la vuere no je mâl par ducj. Difat chei che a vendin bombis e cassis a prein che e duri. Par dî che nol esist un timp ideâl. Se e je mâl la miserie, no je miôr la massepassuderie; e se si scanisi a lâ a pît, no si è mancul stracs lant cu la machigne.
Stin dome atents che i timps bruts no sedin un alibi par no fâ nuie e par ruvinâju inmò di plui. Parcè che nô o sin paris e fîs dal timp, tal sens che nus fâs e lu fasìn. Ma al reste simpri un spazi pe libertât e pe responsabilitât. Cui aial dit che in timps di inmoralitât, superficialitât, egoisim, omologazion, un nol puedi jessi morâl, profont, disponibil, alternatîf?
I cristians no sono come i ûfs, che a valin di plui propit cuant che a’nd è pôcs? Ce grande ocasion, alore, pe int buine e libare, di restâ fedele a Diu e ai valôrs e di jessi un segnâl di sperance tun mont disperât e disperant, une stele che e lûs tun cîl dut fumul!
Jo no sarai a viodi un cîl cence soreli e cence lune e cence stelis (Gl 2,10). Ma fin che o varai ator di me cualchi anime buine che mi fâs lûs e mi segne la strade come che lis stelis le segnavin ai marinârs, tal gno cûr no murarà la sperance e no pierdarai il sium e la serenitât pai çavareaments apocalitics.