Olmis di Diu - A. Beline

Vint di celebrâ i dons che il Spirtussant al spant cun bondance su la sô glesie e sul popul di Diu , no si podeve cjatâ moment e curnîs plui adats des Pentecostis, la sagre dal Spirtussant. E cussì si è ripetût l’apuntament di ducj i moviments catolics (si fevele di 123 agregazions carismatichis) in place san Pieri, atôr di pape Benedet. Il ricuart e il confront inevitabil al jere cul prin incuintri cul pape Zuan Pauli II, il pape che par prin e in maniere ostentade al faseve capî di poiâsi su la disponibilitât e gjenerositât entusiastiche di chescj fans dal Spirtussant, autentiche novitât e primevere de glesie.

Pape Benedet nol plate la continuitât dal so ministeri cul predecessôr, ma nol covente jessi vaticaniscj par no viodi la diference tal mût, plui che te sostance. Ma un mût tant marcât che al devente sostance. Di fat, la fulugne di int rivade a Rome di ogni bande d’Italie e dal mont, passe 300.000, cheste volte no si è discjadenade tune effervessence intonade al Spirt che le legjitime ma un fregul stonade e masse invadent e autoreferenziâl. Si à vude l’impression che pape Ratzinger nol ju ves clamâts a mostrâ visibilmentri la fuarce e la fantasie che il Spirt al opere tai siei dissepui, ma pluitost a metisi in scolte umil e silenziose di ce che al vûl comunicâ ai siei fedêi. Une cunvigne solene, imponent, ma misurade, là che l’aspiet plui impuartant no jere la int, i distinataris, ma il Spirt, l’autôr. E duncje tante preiere e tante riflession.

Impen de sfilade dai fondatôrs, compagnade da l’ovazion festant dai rispietîfs dissepui e gregaris, si à preferît sielgi trê dai plui rapresentatîfs a comentâ i salms dal gjespui che a vignivin cjantâts. Si à podût cussì sintî l’intervent dal prof. Andree Ricardi de Comunitât di Sant Egjidi, a coment dal salm 112, il Laudate pueri Dominum, di Kiko Arguello dai Neocatecumenâi a coment dal salm 147, e di don Julian Carròn di Comunion e Liberazion a coment de Apocalisse. Dai trê intervents, il plui profont e biblic mi à parût chel dal prof. Riccardi, une omelie di pari de glesie. Al à batût sul fat che, dome cu la dimension interiôr e la gracie di Diu il cristian, ancje il plui impegnât, al po salvâsi de puaretât e de sterilitât. Il plui polemic e dibot stonât al è stât chel di Kiko che, fevelant de ricostruzion dal templi di Gjerusalem e de umanitât di vuê, al à batût su l’essenzialitât dai moviments carismatics, cussì pôc considerâts da la gjerarchie.

Il pape al à tignude, come simpri, une grande omelie, lungje, profonde, articolade, e resonade. Pesante ancje come contignût e pesade. Une lezion teologjiche su la scuele dal Spirtussant. Une scuele di libertât, di responsabilitât, di unitât e complementarietât dai moviments fra di lôr e cun dutis lis cumissuris dal cuarp de glesie. Usance Gjesù a Nicodem: L’aiar al sofle là ch’al vûl e tu sintis la sô svintade, ma no tu sâs né di dulà ch’al ven né là ch’al va (Zn 3, 8), il Spirt, l’aiar creatîf di Diu, al è libar di soflâ là ch’al vûl, parcè che la sô libertât no sopuarte confins né esclusivis monopolistichis. Se lui al è la fontane di vite, o vin di lâ nô a bevi a la sô fontane, cun umiltât e in file cun chei altris servidôrs di Diu, e no inludisi di podê meti l’aghe tes fiaschis e puartâle a vendi tai nestris barachins. In plui, la soflade dal aiar di Diu e je fantasiose e creative, ma no dispersive. Al cree disordin tal nestri ordin, ma par meti sù il so ordin. Al è un Spirt di multiformitât, ma no di confusion e di contradizion. Lui al è libar tai nestris confronts, ma nô no sin libars cun lui. Di chi grande umiltât, docilitât, contemplazion. Al è un cori da l’anime, no un cori atôr. Un Spirt ch’al opere tal santuari dal nestri cûr e no tes placis e te confusion e te competizion cul mont.