Olmis di Diu - A. Beline

Stant a lis statistichis, la religjon catoliche e je la plui grande des religjons organizadis. Si po dî che no nd è part di mont che no si cjati une presince catoliche, magari a nivel di semence o di relicuie, e sore dut la religjon catoliche e je cognossude a nivel planetari, ancje in gracie de potence dai mieçs di comunicazion. Se si pense al troput di cristians che si devin dongje tes cjasis par crevâ il pan e al miliart e passe di batiâts di vuê, si scuen ameti che si è fate di strade e duncje si varès di jessi plui che contents. Epûr al è alc che nol cuadre e lu sintìn ancje nô. O almancul lu sintin lis animis plui pinsirosis, che no si contentin dai numars ma a amin lâ a la sostance de cuistion. Lu sintin ancje i responsabii de glesie, ch’a cirin in ogni sisteme di tignî adun il trop variegât des pioris pôc ubidientis e a fasin salts mortâi par ubidî al comant di Crist di lâ fint al ultim cjanton dal mont.

Ce vino di fâ, par salvâ cheste cristianitât che e piert colps di ogni bande, al pont che si fevele di post-cristianisim o adiriture di minorance no simpri rispietade, come dutis lis minorancis? Vino di moltiplicâ i documents e i pronunciaments, par fâ cognossi che nô o sin te veretât? Vino di rinfuartî la struture e l’organizazion, in mût di rivâ par ogni aìne dal cuarp mondiâl? Vino di butâsi su la grande comunicazion, vuê che, se no si comuniche e no si è sul breât mediatic, no si esist? O pensi che, tune realtât complesse e complicade come la nestre, no si puedi scartâ nissune strade e strassâ nissune briscule. Però mi semee plui just, ancje se al po semeâ ingjenuo e banâl, lâ a viodi cemût che la religjon si è slargjade tai prins timps, cuant che e riscjave ogni moment di sparî pal fat che e jere une semençute piçule circondade di suspiet e di ostilitât. Cemût fasevino in chê volte, cence organizazions, struturis, visibilitât, mieçs materiâi, ricognossiments e garanziis publichis?

O cjatìn la rispueste in chel librut d’aur che si clame i ats dai apuestui. Nus conte che i nestri paris e vons inte fede a jerin salts tal scoltâ la dutrine dai apuestui, tal crevâ e tal preâ (At 2, 42). Ma la robe plui scandalose e jere che a metevin dut in comunion; a vendevin ce ch’a vevin e ce ch’a cjapavin de lôr robe lu spartivin in ducj seont che i coventave a ognun (44-45). Ma ce che mi incore di plui al è sintî che a vevin un cûr content e sclet e che la int ju vedeve di bon voli. Ancje fasint un fregul di tare, tocje dî che no si podeve no restâ incantesemâts denant di cheste int che no veve templis o viestis o ceremoniis difarentis di chei altris, ma e jere la lôr vite ordenarie che e jere une rivoluzion. E la int ju cjalave, ju amirave e a restave interdete, parcè che masse grant al jere il contrast fra la lôr vite e chê dai cristians. Soredut a pensavin che une religjon che ur rivoluzionave la vite in chê maniere, che ju sostignive tes contrarietâts, che ur deve la fuarce di frontâ umiliazions, discrimazions e parfin la muart par amôr dal Signôr e scugnive jessi vere. Come che no podeve restâ indiferents denant des peraulis di Pieri al strupiât su la puarte Biele dal templi: No ai né aur né arint. Ti doi ce ch’o ai: in non di Gjesù Crist il Nazaren, cjamine! (3, 6). Une glesie che no à né aur né arint ma une fede grande come lis monts no ti fâs dome cjaminâ, ma svualâ. Forsit al merte fat un confront, un esamp di cussience, un sclip di belanç. Se cence bêcs e mieçs e cognossincis a àn concuistât dibot il mont, cemût mai che cumò no dome no rivìn a finî la vore ma o stin sirucant?

Al reste il fat che no je la nestre dutrine ma la nestre vite la miôr propagande, anzit l’uniche.