Olmis di Diu - A. Beline

Fra i libris de bibie dal Prin Testament a nd è un cuntun titul grivi di pronunciâ e inmò plui di capî: Deuteronomi, peraule greche ch’e vûl dî “seconde leç” o, plui just, “seconde (leture de) leç”. L’autôr, ricognossût de tradizion ebraiche e ancje de cristianitât fint al inizi dal ‘900, al è Mosè. L’atribuzion al grant famei e je sugjeride dal fat che il libri al ripuarte i siei doi discors e justificade dal fat che un autôr cussì autorevul al varès dade autoritât a l’opare. Ma a son cantins che a rivuardin plui l’erudizion che l’edificazion e il progrès spirtuâl. In cheste vore, il grant liberadôr dal popul ebraic, fasint un struc dai events straordenaris che lui al è stât testemoni e artefiç, al conte l’epopee de liberazion ma, cjalant indenant al avignî dal so popul, al fâs une schirie di racomandazion incoradis. Al è il secont regâl che lui i fâs a la sô int, dopo dal prin, incomensurabil e inobliabil, de liberazion.
Il parcè o crôt di capîlu, come che lu capissarès cualunche gjenitôr. Si sa che lis personis, grandis o piçulis, impuartantis o scognossudis, no son eternis. Par ducj al ven il moment di scugnî lassâ ce che si à di plui cjâr e no si volarès lassâ. Alore, il pari e la mari, o i nonos, dopo di vê spindude la vite par chei altris e di vêus lassât chel pôc o tant (par lôr tant e par chei altris pôc) ch’a àn podût, a zontin cualchi racomandazion par che i fîs e i fîs dai fîs a puedin vê la furtune che si à cuant che si va indenant cul sintiment, cu la cussience e cul timôr di Diu. In pratiche, dopo di vê lassât i mieçs di vivi, si cîr di lassâur ancje lis resons par vivi e lis coordenadis morâls che a permetin une traviersade positive dal mâr movimentât de vite. Cussì Mosè, che si palese no dome comandant e legjisladôr ma ancje pari premurôs e antivedût.
Intal libri al ven fûr, come un sproc e un ritornel, “Scolte, Israel!”. Parcè che il scoltâ e je la prime condizion par viergi un contat. Se no si scolte, nancje no si scomence. Po a vignaran altris peraulis no mancul vitâls: tignî cont meditant e meti in pratiche.
Parcè Mosè sintial la dibisugne di ufrîi al popul di Jahvè une guide morâl, un orientament etic, un percors fat di regulis e di racomandazions? La storie e l’esperience nus insegne che no baste une liberazion sociâl o politiche o economiche par vê vite e furtune. Nol baste liberâsi dal faraon, se no si liberisi dentrivie. Nol baste butâ vie i idui egjzians, se no si rive a butâ vie i propis idui. Nol baste sdrumâ il mûr di Berlin, disfâsi di Mussolin, di Hitler, di Franco o di altris ditatôrs e sistemis totalitaris par rivâ a la democrazie e al ordin. Bisugne cjatâ regulis saviis e condivisibilis, cognossi i dirits ma ancje i dovês, savê ce che si à di fâ, ce che si po fâ e ce che no si à di fâ. Finide la ditature cui siei erôrs e orôrs, e scomence dute une scuele e un alenament par imbastî il gnûf implant politic, la gnove polis o respublica, ch’e sedi publiche tal sen di vierte a ducj e premurose di ducj e no dai plui furbos e prepotents, magari riciclâts, che si tornin a cjatâ tal puest dal comant e dai trafics. Judâ il popul a dâsi e a acetâ regulis e normis e leçs al è un at di sapience e di grant amôr, parcè che la regule, se e partis dal amôr, e je il plui grant regâl che si puedi fâi a un om e a un popul dopo di vêlu liberât. Par no ch’al torni a la sclavitût di prime. Par no ch’al deventi sclâf di se stes e des sôs plui brutis passions. Une libertât ragalade no je sigure come une libertât vuadagnade e mertade. E une legjislazion savie e je la garanzie plui sigure de libertât.