Olmis di Diu - A. Beline

Par une coincidenze furtunade, cheste mê riflession ebdomadarie e salte fûr ai sîs di mai, biel che il Friûl intîr si fermarà a rivivi i trent’agns di angunie, di muart e di resurezion dal taramot. Trent’agns a son plui di une gjenerazion e duncje un fat cussì calamitôs e sunsurôs al riscje di jessi netât vie de acelerazion esasperade e esasperant di chescj agns sfolmenâts. Tancj nestris fradis, vitimis e protagoniscj, no son plui a contâle. No mi riferis tant a chei mil e passe che l’agnul de muart ju à gafâts sot des maseriis, ma a tante int che no à rivât a viodi e a gjoldi la ricostruzion. Tancj altris a son masse zovins par fâsi une idee de tragjedie che nus à colpîts e dal slambri viert tal cûr dal nestri Friûl. Cjalant i paîs di vuê, cussì ben fats, cussì gnûfs, cussì siôrs, al è impussibil rindisi cont che un popul al à riscjât veramentri di jessi glotût. Al sarà ben che i paris e i nonos ur contin, come che nus consee cun sapience il libri dal Deuteronomi, ce ch’al è sucedût e cemût che si à rivât a frontâ e a superâ une conseguence di chê fate. Ancje par cjapâ spirt par podê frontâ cu la stesse fede e fuarce lis sfidis che ogni gjenerazion e je clamade a confrontâsi.

La memorie dal taramot e de ricostruzion e je une memorie positive, sore dut se rapuartade a altris calamitâts capitadis vie pa l’Italie in cheste seconde metât di secul. Nol è il câs di ingloriâsi masse, parcè che no dut al à vût il stes esist furtunât, sore dut par chel ch’al rivuarde l’edilizie publiche, comprendudis certis glesiis che a restaran a eterne memorie di une sielte pôc inteligjente e rispietose. Ma di vê la contentece di chel che al è rivât a la fin de sô cumierie e al cjale la tante strade fate. Al vûl dî che o sin un popul san, ch’al à tantis risorsis e cualitâts, ancje se si vise di tirâlis fûr dome tai moments critics, ma chest al è il distin dai mortâi. Cuant che pre Checo al diseve che un popul nol mûr par une disgracie o par miserie, però al po murî par massepassuderie, nus dave un grant confuart e un grant amoniment.

Il segret, se si po fevelâ di segret e no di sintiment, al è stât chel de coralitât dai respsonsabii e protagoniscj. A ducj i nivei, ognun te sô specifiche competence, ma ducj par un fîl, al di là des parochiis ideologjichis e partitichis. Une lezion che no po lâ fûr di mode, parcè che culì e dipent la salvece o la ruvine: se ducj si lavore par un ben condividût o se ognun al lavore cuintri di chel altri. In cheste coralitât no son saltadis, ma si son integradis lis svariadis components dal tiessût sociâl, partint dal bas, da la int, e no dal alt. Parcè che, dongje dal sindic e dal deputât e dal vescul e dal plevan, de regjon e dal mont dal volontariât, il grant protagonist al è stât il popul furlan, la nestre int.

Mi plasarès meti in lûs un altri aspiet, no mancul esemplâr e preziôs: la coralitât, la globalitât, l’armonie dai progjets e dai intervents. Une firme pe universitât dal Friûl, memorie vivent di tant flagjel, e jere sintude impuartante come un sac di ciment o un modon. Parcè che il Friû al veve di tornâ a vignî sù intîr e vitâl e no un baracon di cjasis cence anime par un popul cence sperance. Par chel al à fat tant scjas, ancje fûr di chenti, il document dai predis: Prime lis fabrichis, po lis cjasis e cul timp, se Di’ orà, ancje lis glesiis. Document che cualchi sorestant diocesan nol à vût nissun fastidi a dâi la paternitât, ancje se al jere nassût tune canoniche cjargnele.

Ripetìn alore, cun convinzion e comozion, ce che o vin cjantât trent’agns indaûr, cuntun altri spirt, te maiestât de basiliche mari di Aquilee: Al è il Signôr il nestri jutori, lui ch’al à fat cîi e tiere.