Olmis di Diu - A. Beline

In chestis zornadis che si van scurtant e cun chest scûr di fûr che al riscje di invuluçâ ancje la nestre anime, il pinsîr al va di bessôl a la fin. No dome fin di un an, ma ancje fin de vite e fin dal mont. E a ce che al compagne e al fâs precipitâ chest fin, come il dolôr fisic e morâl e la muart. In chest contest pesant, che ti sburte a fâti lis domandis plui tremendis, al cjape simpri plui pît il pinsîr negatîf, chel de assurditât de vite, o dal cjastic dal vivi, e duncje il nichilisim. Tal sens che la vite no à nissun principi e nissun valôr e nissune sperance e nol esist nissun Diu che le governi cu la sô volontât e le riscati cu la sô provedence. Il dolôr dal mont al met in crisi no dome l’om, ma ancje Diu. E al devente un scandul, une robe che ti fâs inçopedâ.
In chescj moments jo o cîr di impiâ l’unic lusôr che mi puedi indreçâ e confuartâ, chel de peraule di Diu. O voi a cirî tal libri di Diu chês rispuestis che no cjati tai libris dai oms. E lis rispuestis che il libri mi dà no son dutis comprensibilis e logjichis ma o sai di podêmi fidâ, come il frut che si lasse menâ dal pari e da la mari ancje in lûcs che nol cognos e no i smechin.
Intal vanzeli di Zuan e je une pagjine straordenarie, chê de malatie, de muart e de resurezion di Lazar (Zn 11, 1-27). Lazar al è il fradi di Marte e di Marie. A vivevin a Betanie e Gjesù al jere di cjase li di lôr. A pene che Lazar si inmale, lis sûrs a mandin a dîi: “Viôt, Signôr, che chel che tu i vuelis tant ben al è malât”. No disin nancje il non, parcè che il rapuart al jere speciâl.
La domande che nô si fasìn e je banâl e tremende: “Se tu i vuelis tant ben, parcè vuelistu o lassistu che si inmali e di un mâl cussì grant di puartâlu a la muart?”. Cemût si rivial a conciliâ l’amôr che Diu al à pal om e pal mont cul dolôr, cul mâl, cu la tristerie, cu lis injustiziis ch’a son tal mont? Sore dut cemût conciliâ o salvâ chest amôr denant dal scandul de muart? Cemût puedio dîi a une mari cul frut malât che Diu al è pari o a un ch’al piert une persone cjare che il Signôr nus vûl ben? Cemût rivìno a cumbinâ chest amôr cussì grant cu lis tragjediis ch’a son sucedudis e ch’a sucedin ogni dì inte storie? Al vûl fiât a fevelâ di amôr di Diu tai lager di Auschwitz o di Dachau o tai gulag di Stalin o tal maçalizi dal Ruande o dai Balcans o de Cambogje o tes esplosions di violence e tes distruzions dal Orient.
Une cuistion no scontade, une rispueste no facil, anzit umanamentri impussibil. Al semee che il mâl ch’al è tal mont al sedi la prove provade de inesistence o de indiference o de impotence di Diu. Epûr o sin clamâts, in ogni moment e situazion, a rispuindi al scandul dal mâl e de muart cul scandul de fede tal amôr di Diu. Un amôr difarent dal nestri, alternatîf, mistereôs, come che difarent, alternatîf e mistereôs al reste Diu. No sin clamâts a capî, ma a crodi, a fidâsi.
Acetìn alore la motivazion che Crist al dà de malatie mortâl di Lazar so amì e di dutis lis creaturis, cussientis e incussientis, che lui al è pari e redentôr: “Cheste malatie no je pe muart, ma pe glorie di Diu, par che midiant di jê al sedi glorificât il Fî di Diu” (v 4). Il dolôr e la muart, ch’a varessin di jessi la negazion di un Diu provident, a son la strade plui drete pe sô glorie e pe nestre glorificazion. E la crôs, che e varès di jessi la sconfite di Diu, e devente la sô vitorie. Scandul, misteri, meracul de fede!