Olmis di Diu - A. Beline

Se tu sbregassis i cîi.

01 di Zenâr 2005

Al è tornât l’avent, il timp plui biel dal an, il timp dal sperâ e dal spietâ, il timp de glesie pelegrine lontane dal so nuviç e il timp dal mont ch’al va cirint spasemât un sens, un dret, un troi, une salvece. L’avent che nô o stin scomençant e vivint nol è un dai tancj che o vin tacât e vivût, ma al è unic parcè che nô no sin chei dal an o dai agns passâts e nancje il mont nol è chel di prime. Pa la cuâl e valarà la pene di vivilu come esperience fuarte, come timp di gracie.

L’avent al è il timp dal sperâ e duncje il timp di chei che ur mancje alc, che a spietin alc o cualchidun. Nol è il timp dai passûts o dai massepassûts, ma di chei ch’a son plens di fan e di sêt, ch’a vivin tune situazion umanamentri dolorose, par no dî disperade. La sperance cristiane e à propit cheste conotazion specifiche: no si poe sul fat che lis robis a van ben, ma sul fat che lis robis a van mâl. Che lis robis no ledin ben, almancul dal pont di viste morâl e spirtuâl, al è tant clâr e tant evident che dome un prevignût o un vuarp o un superficiâl al po metilu in dubit.

Al piture une vore ben la situazion dai siei timps, che e po jessi ancje la nestre, il profete Isaie, il grant cantôr dal Emanuel, de sperance personificade, divinizade e umanizade. Ducj nô o jerin tanche une robe soce, ducj i nestris ats di justizie tanche un peçot sporc. Ducj nô si sin inflapîts come lis fueis, e lis nestris inicuitâts nus menin vie come l’aiar. Nol è nissun ch’al clami il to non, ch’al jevi sù a poiâsi tôr di te (Is 64, 5-6).

Ai fanatics dal otimisim banâl, ai sbandieradôrs dal dut al va ben, il profete ur mostre la crude realtât. Lis nestris bandieris a son come chei sbrendui che, te nestre infanzie, lis nestris maris e nonis a imblecavin fintremai ch’al tignive il pont e ch’a palesavin plui di ogni discors e indagjine sociologjiche la nestre condizion sociâl. Cu la diference che la nestre puaretât e jere dignitose, parcè che e jere nete. In plui nô no jerin colpe, ma vitimis. La sporcjetât ch’al fevele il profete e je la sporcjetât dal cûr prime che de munture. Si trate di une cragne morâl, di un infet che nus gafe e nus tormente dentrivie, une sorte di fraidum interiôr. O sin sporcs parcè che no sin juscj, no sin bogns, si sin slontanâts di chê aghe benedete che e smondee e e ricree. Par chel o sin come chês fueis che l’aiarat crût de sierade al mene vie cence remission.

Alore ti ven voe di berlâ, come ultime sperance o utopie: Se tu sbregassis i cîi e tu vignissis jù! (Is 63, 19). Se Diu al fases il meracul di sbregâ une volte par dutis chel vêl che nus divît dal assolût, dal definitîf, dal vêr, dal sant! Se il mont al è cussì malmetût, cun tant int ch’e gem e e tribule, cun tante tristerie incrosade, parcè no fasial un pas, l’unic ch’al covente e al baste? Parcè no sbreghial i cîi e no vegnial a viodi di nô come ch’al fasarès cualunche pari e mari?

In realtât i cîi a son za stâts sbregâts e lui al è za vignût jù a viodi di nô. L’avent al è la celebrazion e l’atualizazion di cheste vignude. Ma alore ce no aial funzionât? Nol baste sbregâ i cîi. Nus al dîs clâr e tont Gjoel, che lu leiarìn te prime dì di cresime: Sbregait il vuestri cûr, no i vuestris vistîts e tornait dal Signôr, vuestri Diu (Gl 2, 13). Bisugne che si viergi ancje il cûr dal om e dal mont. Se no Diu al reste fûr e al è come se nol fos mai dismontât jù. Nol servìs a nuie celebrâ la vignude dal Signôr, se nol rive a jentrâ tal nestri cûr. Anin contents incuintri al Signôr!.