Olmis di Diu - A. Beline

O stavi rumiant suntune des pagjinis plui bielis dal vanzeli, chê dal fî che si slontane di cjase e al consume e si consume dut. Il vanzeli al fâs di cheste sielte e vite disgraciade une ocasion di perdon e di resurezion morâl, parcè che il fî si pentis e al torne. Ma te vite nol sucêt simpri cussì. O, miei, al sucêt simpri plui dispes che te zoventût si sassini vite e salût, ma il tornâ dongje al è simpri plui problematic. E, di pinsîr in pinsîr, la memorie mi è lade a un zovin, o om realtivamentri zovin, sui 40 agns, che o ai soterât cualchi an indaûr e che forsit la memorie coletive e à spesseât a rimovilu come ducj i câs che no si à voe di tignî presints.
Al jere un brâf zovin, bogn e compagnon e disponibil in dut. Po la svolte. Al è lât pal mont a cirî lavôr e lajù, tai paîs dal mont musulman, al è sucedût alc che lu à comprometût par simpri. No si à savût se par colpe sô o di chei altris, se par debolece e par fatalitât, sta di fat che si è intivât tal mont de droghe che, messedade cul alcul, i à cjapât il çurviel. Al è tornât dongje che nol veve nancje trent’agns, ma nol jere plui lui. Lu àn ricoverât ta chei lûcs che nissun nol ame vê indiment e li si è finît di ruvinâ. Ancje la sô vite sentimentâl, se si podeve fevelâ di passion, e je stade une tragjedie. Al à cognossudis dôs feminis che a àn spartît cun lui il so infier. Une e je muarte doi agns dopo e la seconde cuatri, cunsumadis dal alcul che a scolavin insieme cun lui.
Il pari si è svenât par lui. Par dâi un sotet che i permetes un fregul di dignitât e di indipendence, i à comparde ancje une cjasute e, stant che il zovin nol vignive mai in paîs par pudôr o par vergogne, nol saltave setemane cence lâ o mandâ a viodi di lui. Lu proviodeve di dut, ancje di ce che nol varès podût o volût, ma dut di bant. Fin che une dì lu àn cjatât colât in cjase e lu àn menât di dute corse, une corse disperade e inutil, tal ospedâl.
Mi visi come cumò la pesantece di chel funerâl, il contrast fra il soreli che nus sclipive e il scûr che si veve dentri, cu la int che no olsave a lâ dongje de casse di chest paesan aromai forest e la brame di fâi companie almancul tal ultim viaç. I coscrits i vevin preparât une biele composizion di rosis e mi è vignût spontani di fâ un confront fra la rose e la vite, fra il sflandôr de rose cuant che e fluris e la pene che ti dà cuant che e sfluris. Ancje chel zovin al jere stât une rose, rose vive e splendide, ma la sô bielece si jere smamide prin dal timp e ti faseve spessie a cjalâle te sô decomposozion inarestabil. O ai fevelât de pietât, dal vêl che si à di vê denant dai muarts, sore dut di chei muarts che, usance nô, a àn ruvinade la vite. Il funerâl nol è il lûc e il moment de condane, ma de remission. No si puarte in glesie un muart par santificâlu, ma par metilu tes mans dal Diu ch’al perdone. Tant plui che ognun di nô, ce pôc ce trop, o vin fatis lis nestris macacadis e si sin slontanâts de cjase paterne. Il nestri puar zovin, a la fin de sô vite tribulade, nol à cjatade la cjase paterne, parcè che nol à vût il coragjo o la volontât o la gracie. Ma Diu lu spietave, anzit i leve incuintri par strengilu tai siei braçs, par padinâ il so cûr plen di pôre, par vuarî la sô anime malade cu la midisine de eternitât. Chel Diu ch’al è a la fin, a l’inizi e tal mieç. Ancje se no lu savìn e no lu volìn.