Olmis di Diu - A. Beline

Vuardeans de memorie

01 di Zenâr 2006

L’ultim regâl di Mosè ai fîs dal so popul che al sta par jentrâ te tiere de promesse, là che lui nol metarà pît par un cjastic sevêr di Diu o par chê regule savie che e proviôt oms diferents par compits diferents, al è il Deuteronomi, il libri de memorie.
Al sa che, apene sistemâts, a dismentearan dutis lis tribulazions e i pericui e i spiei che Diu al à operât par restâ fedêl a la sô aleance. Di fat il prin efiet de bondance al è di rimovi la puaretât parcè che la massepassudèrie, prime di alçâ la pression, e fâs calâ la memorie. I passûts a son ducj vitimis dal Altzheimer. A dismentein dut, tacant di ce che no varessin.
Alore Mosè, in struc, al torne a rivivi chê esperience traumatiche e magnifiche, mostrant la provedence e la fedeltât di Diu. Une fedeltât e une provedence che no mancjaran se i fîs di Israel a savaran vuardeâ e passâ ai fîs e ai nevôts come un ben primarûl il tesaur de memorie. Ricuardant i beneficis di Diu ancje inte tiere dai lôr vons, a savaran fâ un paragon fra il ben di dopo e il mâl di prime e chest ur permetarà di gjoldi di plui. Memorie no come une cjadene che ti pee al mûr di une preson ma come lidrîs che si insede simpri plui in sot inte tiere par permeti al arbul di cressi plui fuart e vivarôs. Parcè che la tiere cu lis sôs stagjons, il cîl cul cors dal soreli e de stelis, il mâr cu lis sôs ondadis e mareis, il fûc cu lis sôs flamis a son memorie, vadì une novitât che e ven fûr de continuitât. La vite e je e e domande armonie, colegance, e no sopuarte slambris o traumis.
Il legjisladôr sant e sapient di Israel adiriture al fâs de memorie une sorte di santitât: “Cheste e sarà la vuestre justizie: tignî aments e meti in pratiche” (Dt 6, 25). Un tignî aments che al va passât ai fîs par che ancje lôr a vedin vite e furtune. “Tu lis ripetarâs ai tiei fîs” (6, 7). “Insegnaitlis ai vuestris fîs e tornaitlis a ripeti tant s’o sês sentâts in cjase, che cjaminant pe strade, pognets o ben in pîts” (19, 11).
Parcè contâ? Parcè che certis robis si po capîlis dome se si lis prove e ancje il provâlis e po jessi une gracie, une ricjece. “O sês vualtris ch’o vês provât dut chest e no i vuestris fîs. Lôr no àn vude l’esperience e no àn gjoldudis lis lezions dal Signôr vuestri Diu, la sô grandece, la sô man fuarte e il so braç tindût, i siei spiei e lis oparis” (11, 2-3). Ce sano i nestris zovins di fan, che a son ipernudrîts, di emigrazion, che a girin il mont di turiscj, di miserie di bêçs, ch’a àn la domenie, par strassâju, plui di ce che lis nestris fameis a vevin vie pe setemane par cjolisi la bocjade? Se po o lin ai bens spirtuâi e culturâi, la robe e je plui serie. Nô o vin vivût tun clime di religjositât, cu la glesie cûr dal paîs e de vite; o vin tetât, cul lat, ancje la lenghe de mari o dal cûr. O vin sintût lis nonis a contâ, la int a cjantâ, o vin viodût lis cjasis, lis stalis, l’ort, i prâts, lis monts. Là ese lade a finî dute cheste ricjece? Parcè no le vino contade, passade, regalade ai fîs e ai nevôts, par judâju a vivi ben e timorâts, sans e temperâts? Cjonçant la cjadene, o vin crevade l’armonie e la condizion pe vite. Nô no vin dissendence e lôr no àn paternitât. Lis nestris lidrîs si stan secjant tal soreli e lis lôr fueis, cence sostance, a saran strissinadis vie dal prin gherbin.
No ur vin dât masse. No ur vin dât ce che ur coventave par vivi. Sore dut ur vin dilapidât il tesaur de memorie e de sapience. A puedin fânus cause cuant che a vuelin.