BIBIE IN LINIE

Cjapitul 1

IL POPUL DI DIU IN PERICUL

Nabucodonosor paron espotic dal Orient

1 1 Si jere tal dodicesim an di Nabucodonosor, ch’al regnà sui assirians a Ninive, la grande citât. Arpacsad, in chel fratimp, al regnave sui medians a Ecbatane. 2 Al cerclà cheste citât cuntun mûr torator dut in clapons larcs trê comedons e luncs sîs, puartant lis muris a une altece di setante comedons e a une largjece di cincuante. 3 Tes puartis al fasè fâ sù toratis di cent comedons di altece par sessante di largjece tes fondis, 4 e ancje lis puartis a rivavin a setante comedons par corante di largjece, che i permeteve di molâ fûr dibot dut l’esercit e la sfilade des sôs fantariis. 5 Propit in chel fratimp, il re Nabucodonosor al tacà vuere cuintri dal re Arpacsad te grande plane ch’e je des bandis di Ragau. 6 De sô bande si jerin metûts in schirie dute la int des monts, ducj chei dal Eufrât, dal Tigri, dal Idaspe, e chei des planis ch’a jerin sot dal re dai elamits, Arioc. Sicheduncje un disordin di int si derin cunvigne par dâ une man ai fîs di Cheleud che si batevin. 7 Nabucodonosor, re dai assirians, al mandà un befel a dute la int de Persie, a ducj chei ch’a jerin a soreli a mont, a chei de Cilicie, di Damasc, dal Liban e dal Antiliban, a ducj chei de cueste, 8 a la int dal Carmêl, di Galaad, de alte Galilee, de grande plane di Esdrelon, 9 a la int di Samarie e des citâts sot di jê, a chei di là dal Gjordan fint a Gjerusalem, Batane, Chelus, Cades, il flum dal Egjit, Tafni, Ramses, dute la tiere di Gjessen, 10 di là di Tanis e di Menfi, e a ducj i abitants dal Egjit fint ai confins cu l’Etiopie. 11 Ma la int di dutis chestis regjons no lerin daûr di ce ch’al diseve Nabucodonosor re dai assirians e no si meterin cun lui a fâ vuere. No vevin nissune pôre di lui parcè che, seont lôr, al jere come s’al fos stât dibessôl. Sicheduncje a tornarin a mandâ indaûr i mes cu lis mans scjassant e cjamâts di ofesis. 12 Alore Nabucodonosor si inrabià a muart cuintri di dutis chestis regjons. Al fasè zurament su la sô sente e sul so ream che si sarès svindicât e ch’al varès fat il fisc cu la spade in dutis lis regjons de Cilicie, di Damasc, de Sirie, come ancje a Moab, cui amonits, in dute la Gjudee e in dut l’Egjit, fint ai confins dai doi mârs.

13 Cu lis fuarcis ch’al veve, al tacà il re Arpacsad tal disesietesim an e, in cheste batae, lu vincè. Al fiscà dut il so esercit, dute la sô cjavalarie e ducj i siei cjars, 14 si cjapà lis sôs citâts e al rivà fint a Ecbatane, dulà ch’al cjapà toratis, al fiscà placis, ridusint a une vergogne dute chê ch’e jere stade la sô braure. 15 Daspò al brincà Arpacsad su lis monts di Ragau, lu passà fûr par fûr cu lis sôs lancis e lu finì dal dut in chê dì stesse. 16 Po al tornà indaûr cui siei soldâts e une fulugne di int che no finive altri, che ur leve daûr, tancj di chei soldâts di no rivâ a contâju. E cussì, si butarin su la baldorie, lui e i siei soldâts, par cent e vincj zornadis.

Notis:

  • 1,1 - Par chel ch’al rivuarde i nons storics, il libri di Gjudite al dà pôc o nissun afidament. Plui di une volte al va a cirî nons convenzionâi, come Nabucodonosor re di Babilonie (604-563 p.d.C.) che nol è mai stat re di Assur e nol à regnât a Ninive, fiscade dal 612 di Nabopalassar, so pari. Al è simbul dal re prepotent e nemì dal popul di Diu. La storie no cognòs nissun Arpacsad.
  • 1,6 - La int des monts: a son lis monts dal Iran ocidentâl.
  • 1,10 - Il test al à ripuartade la liste di ducj i vassâi o amîs di Nabucodonosor.
  • 1,11 - “Al jere dibessôl” e duncje al scugnive pitocâ jutori di ogni bande. A pat che il test nol vueli dî ch’al jere “un om di nuie”.
  • 1,12 - “In dutis lis regjons”.
Cjapitui: