“Glesie Furlane” e je un grop di cristians e furlans che a cirin di lâ a font des lôr lidrîs culturâls e religjosis, par podê conciliâ in maniere armoniche la proprie fede cu la proprie identitât culturâl. Vuê si fevelarès di "inculturazion de fede" o di "vanzelizazion de culture".

Nassût viers i agns '70, sul sburt dal Concili Vatican II (1962-1965), dai prins pas de Teologjie de liberazion e tal contest politic-culturâl de cussience autonomistiche furlane, al à come figure carismatiche iniziâl il professôr pre Checo Placerean (1920-1986).
Pôcs agns daspò dal Concili e jere nassude la dibisugne di cognossi miôr la storie e la vite dal nestri popul par che la glesie e sedi plui incjarnade, par che il Vanzeli e la fede a vedin il savôr de nestre tiere; par che la nestre lenghe, il nestri cjant, la nestre vite a jentrin a plen dirit te liturgjie.

Obietîf de Associazion al è chel di cognossi, studiâ, promovi, valorizâ cun ricercjis, publicazions, incuintris dut ce che al rivuarde la dimension religjose te culture furlane cirint tant traviers lis fonts storichis che la realtât contemporanie.

Di cheste gnove cussience de propie origjinalitât e dignitât, e nas l'esigjence di "dâi a la nestre fede il savôr de nestre tiere". Midiant dal studi des risultivis, dai aprofondiments, de traduzion dai tescj biblics, de lenghe furlane inte liturgjie e de valorizazion dal patrimoni musicâl.

Moments impuartants a son la Semblee dai predis (1975), dai Cristians (1977) e i agns de ricostruzion dopo dal taramot dal 1976. Il grop di “Glesie Furlane” al à produsût la traduzion de Bibie (1997), il Lezionari (2001) e al à prontât ancje il Messâl Roman (2006, in spiete di jessi aprovât ancjemò vuê che o sin tal 2017). Al à al so atîf une produzion letterarie cualificade, oltri a tancj e puntuâi documents e pronunciaments. Di vincj agns in ca al organize a Vençon cors di studi e di aprofondiment a scjandence mensîl.
1974 ai 28 di avost bons. Battisti arcivescul e bons. Pizzoni ausiliâr e titolâr di San Pieri di Cjargne a invidin ducj i predis de Cjargne a celebrâ une Messe te plêf mari di San Pieri. Un trop di predis a domandin la Messe par furlan. I vescui no acetin. Dîs predis a firmin un document che a lassin sul altâr prime di messe e a jessin di glesie. E je scomençade la lungje marce di “Glesie Furlane”.

Responsabii de Associazion a son:

• bons. Roberto Bertossi, president
• pre Romano Michelotti, vice president
• Christian Romanini, segretari

Glesie Furlane di Pre Checo Placerean

CONTRIBÛTS RICEVÛTS (ex lege del 04/08/2017, n. 124, art. 1, comma 125)

AN 2018: Glesie Furlane e à ricevût chescj contribûts de bande di: RAFVG (20.000 euros), Provincie di Udin (2.000 euros), Agjenzie des Jentradis 5x1000 (352,74 euros)

AN 2017: Glesie Furlane e à ricevût chescj contribûts de bande di: RAFVG (25.000 euros) e Comun di Basilian (3.000 euros)

SEDE LEGÂL: via Zara 10 - 33038 Villanova di San Daniele del Friuli (UD)

C.F.: 94035000309 | P.I.: 02351650300

IBAN: IT35Y0863763790000023015162