Il secont gustâ di Ester: la disgracie di Aman
7 1 Il re e Aman a lerin duncje a gustâ cu la regjine Ester. 2 Ancje in cheste seconde zornade, intant ch’al jere daûr a bevi il vin, il re i disè a Ester: “Ce robe vûstu domandâmi mo, regjine Ester? Ti sarà dade. Ce bramistu? S’al fos magari mieç dal gno ream, al sarà fat!”. 3 Alore la regjine Ester i rispuindè: “Se i tiei vôi mi àn a grât, re, e se cussì i pâr al re, o domandi che mi sedi lassade la vite e o brami ch’al sedi sparagnât il gno popul. 4 Parcè che jo e il gno popul o sin stâts vendûts par jessi fruçâts, copâts, svinidrîts. S’o fossin stâts vendûts par deventâ sclâfs e sclavis, o varès tasût; ma il nestri nemì nol è plui in stât di comedâ il dam ch’al varà il re”. 5 Alore il re Assuero i domandà a la regjine Ester: “Cui isal e dulà isal chel ch’al à pensât di fâ un at di cheste sorte?”. 6 I rispuindè Ester: “L’aversari, il nemì al è chel delincuent di Aman”. Viodint il re e la regjine, Aman si voltà di sanc pal terôr. 7 Il re, fûr di sè, al jevà sù de taule e al jessì tal zardin dal palaç, biel che Aman al restà li par domandâi la gracie de vite a la regjine Ester, parcè che al viodeve benon che de part dal re la sô fin e jere segnade. 8 Po il re al tornà dal zardin te sale che si gustave; intant Aman si jere butât cu la muse par tiere denant dal jet là ch’e jere poiade la regjine Ester. Alore il re al berlà: “Àial forsit chê di doprâ la regjine sot i miei vôi, in cjase mê?”. A pene che cheste peraule e saltà fûr de bocje dal re, a Aman i meterin un vêl parsore de muse. 9 Carbonà, un dai cjastrâts, al disè presince dal re: “Ve, a àn parfìn plantât un pâl di cincuante comedons in cjase di Aman, fat prontâ di Aman par Mardocheu, ch’al veve fevelât pal ben dal re”. Dissal il re: “Picjaitlu lui!”. 10 E cussì Aman al fo picjât tor dal pâl ch’al veve prontât par Mardocheu. E la fumate dal re si bonà.