la SAPIENCE e i siei conseis
Bogns conseis di un pari
3 1 Fî gno, no sta dismenteâ il gno insegnament
e il to cûr ch’al tegni cont dai miei precets,
2 parcè che cu la lungjece dai dîs e dai agns de vite
ti puàrtin furtune.
3 L’amôr e la fedeltât che no ti bandònin mai!
Peiju tor dal to cuel,
scriviju su la breute dal tô cûr.
4 Tu cjatarâs gracie e furtune
denant di Diu e dal om.
5 Fiditi dal Signôr cun dut il cûr
e no sta pojâti sul to sintiment.
6 Tenlu denant di te in dutis lis tôs stradis
e lui al splanarà i tiei trois.
7 No sta crodi par mai di jessi savi!
Viôt di vê timôr dal Signôr e sta lontan dal mâl.
8 Al sarà une midisine pal to cuarp,
un racreâsi pai tiei vues.
9 Onore il Signôr cui tiei bens
e cu lis primissiis di dut ce che tu às.
10 I tiei cjasc’ a saran incolms di forment,
i tiei brantiei a stranfaran di most.
11 No sta spreseâ la corezion dal Signôr
e cuanche ti rimprovere no sta metiti cuintri,
12 parcè che lui al rimprovere chel che j ûl ben
come un pari cul fi ch’al preferis.
Lis furtunis dal savi
13 Furtunât l’om ch’al à cjatade la sapience,
l’om che si è intivât tal sintiment.
14 Parcè che il so vuadagn al è miôr di chel dal arint
e ce ch’al bute al vâl plui che no l’aur.
15 E je plui pressiose che no lis perlis
e dut ce che tu puedis bramâ no j sta a pâr.
16 Lungjece di dîs e je te sô gjestre
e te sô çampe ricjece e onôr.
17 Lis sôs stradis a son gjoldibilis
e duc’ i siei trois a son di pâs.
18 Arbul di vite par chel che le à grampade
e chei che le tègnin strente a son furtunâçs.
19 Il Signôr al à fondade la tiere cu la sapience
e al ten sù i cîi cu l’inteligjence.
20 Midiant dal so savê si son spalancâts i abis
e i nûi a àn lassade gotâ la rosade.
Altris bens de sapience
21 Fî gno, che no si slontànin mai dai tiei vôi,
ma ten cont de prudence e dal sintiment.
22 A saran vite pe tô anime,
furniment pal to cuel.
23 Alore tu larâs indenant sigûr pe tô strade
e il to pît nol cloparà.
24 Cuanche tu ti distirarâs no tu varâs pore;
tu larâs a durmî e il to sium al sarà dolç.
25 No sta vê pore di un spavent ch’al rive a colp,
ni dal burlaç dai trisc’ cuanche si sdongje;
26 parcè che il Signôr al sarà il to ripâr,
al vuardarà il to pît dal laç.
Dovês viers dal prossim
27 No sta dineâj un plasê a di chel che t’al domande,
cuanche la tô man e à la pussibilitât di fâlu.
28 No sta dîj al to prossim: “Va e torne a passâ!
T’al darai doman!”, cuanche tu lu às.
29 No sta furducjâ par fâj mâl al to prossim
cuanche lui si sint sigûr cun te.
30 No sta cavilâ cun tun altri cence un parcè,
co no ti à fat nuie di mâl.
31 No sta vê invidie dal prepotent
e no sta sielgi nissun dai siei trois.
32 Parcè che il Signôr al à riviel dal trist
ma ai oms onesc’ lui ur fâs plait.
33 La maludizion dal Signôr su la cjase dal trist,
e invessit al benedis la cjase dai jusc’.
34 Ai malcustumâts ur rispuint cun rabie,
ai puars invessit ur dà la gracie.
35 I savis a varan simpri onôr,
cu la cuâl che i matucei a varan vergogne.