BIBIE IN LINIE

Cjapitul 1

LIBRI I

Il just, l’om propit furtunât

1 1 Furtunât l’om che nol va daûr dal consei de int triste,

che no si ferme su la strade dai pecjadôrs

e che te congrèghe de int cence sintiment no si sente,

2 ma te leç dal Signôr si console

e la sô leç dì e gnot al rumie.

3 Al è come un arbul plantât ad ôr des aghis,

cjamât di pomis te stagjon juste

e lis sôs fueis no colaran par mai;

a laran in puart dutis lis sôs voris.

4 No cussì ve, no cussì pe int triste:

a son come il stranc che l’aiar lu sparnice.

5 Par chel i triscj no rezaran intal judizi

e nancje te cunvigne dai juscj i pecjadôrs.

6 Parcè che il Signôr al cognòs ben il troi de int juste,

ma la strade dai triscj e va in ruvine.

Notis:

  • 1,1 - La “furtune” dal om just e je tipiche de leteradure sapienziâl (Pr 3,10; Jp 7,17).
  • 1,2 - La leç (par ebraic Torà) e je une istruzion, un insegnament soredut morâl che Diu i à dât al so popul midiant des Scrituris.
  • 1,3 - Il paragon dal arbul plantât ad ôr da l’aghe si lu capìs cetant miôr in Orient. Un paragon doprât ancje in Gjer 17,7-8.
  • 1,5 - Come in altris bandis de Bibie no si trate di une “cognossince” inteletuâl, astrate, ma di chê plui complene dal amôr, de stime e dal premi.
Cjapitui:

Chest sît al dopre dai cookie, continuant a navigâ tu acetis di doprâju. Plui informazions.

Questo sito utilizza i cookie per fornire la migliore esperienza di navigazione possibile. Continuando a utilizzare questo sito senza modificare le impostazioni dei cookie o cliccando su "Accetta" permetti il loro utilizzo.

Chiudi