Progjet «Pre Antoni Beline: un profete pal Friûl di doman». Presentât domenie ai 26 di avrîl 2008 a Vençon, in ocasion de Messe pe ricorence dal secont aniversari de muart, il prin scrit de OPERA OMNIA di pre Toni: «De Senectute» inedit. Al’ere presint il president de Provincie di Udin, on. Pieri Fontanini.
Ai 23 di Avrîl passâts, a Palaç Belgrât a Udin, al è stât fat bon un protocol di intese jenfri la Provincie di Udin e Glesie Furlane par meti adun une racuelte complete dai scrits di pre Antoni Beline. Il progjet al è di Glesie furlane, e la Provincie di Udin i vignarà incuintri cuntun contribût di cinc agns pe realizazion di «Pre Antoni Beline: un profete pal Friûl di doman». Vâl a dî, la racuelte e la publicazion dal patrimoni leterari di Pre Antoni Beline intune edizion complete e organiche. Limpegn, fat bon dal President de Provincie Pieri Fontanini e sotscrit dal president di Glesie Furlane Zuan Pieri Biasatti, al sarà di 80 mil euros pe publicazion di nûf oparis di Pre Antoni Beline: «Sul at di voltâ pagjine», «Par amôr o par fuarce?», «Eutanasie di un Patriarcjât», «Amôr di patrie», «Fortunât il popul che il Signôr al è il so Diu», «Rogazions», «Cirint lis olmis di Diu – V», «Trilogjie» e «De Senectute».
Propit chest ultin scrit, inedit, al è stât presentât domenie ai 26 di avrîl a Vençon.
A doi agns de muart di pre Antoni Beline, domenie 26 di avrîl, as sîs sore sere in domo a Vençon si cjatìn pe presentazion de opare inedite De senectute e pe Messe di anniversari.
Di plui bandis si sburte par che lis oparis di pre Antoni, massime chês plui impuartantis, a vegnin voltadis par talian. Par cumò, cence volê condizionâ il timp e lavignî, la posizion di Glesie Furlane e di Patrie dal Friûl e je cheste:
Letare dal plevan di Vilegnove di Motta di Livence, diocesi di Ceneda (Vittorio Veneto), pre Vittorio Battistuzzi, che al domande di no ricevi plui la pueste di Glesie Furlane parceche Lui al è «italiano, nato in Veneto da famiglia di profonde radici venete, le cui generazioni si perdono nella bella storia d’Italia… perchè sono fiero di essere italiano e parlare la nostra bella lingua».
Slargjant lis iniziativis par che la culture e la lenghe furlane e flurissin simpri miôr, il libri Cjant Patriarcjin de tradizion orâl di pre ‘Sef Cjargnel al è stât mandât ancje al vescul di Rome il Pape Benedet XVI e al Segretari di Stât Gardenâl Tarcisio Bertone. Chestis 2 letaris nus ringraziin pal lavôr che o stin fasint e nus sburtin a continuâ su la strade de valorizazion dal patrimoni culturâl, religjôs e lenghistic de Patrie.
Relazion tal incuintri dât dongje dal Istitût Ladin Furlan pre Checo Placerean
a Codêr ai 5 di dicembar dal 2008.
Si cjatin a Vençon domenie 7 di dicembar. A lis 3.00 dopo misdì, Gjespui cjantât in Domo.
Subit dopo inte Sale Patriarcje Bertrant: PUEDIE NASSI UNE GNOVE SORNADE PE GLESIE?
Riflessions a 20 agns di un document censurât.
Intervents: pre Tonin Cappellari, prof. Maria Cristina Bartolomei, pre Nicolino Borgo e Federico dai Ros.
Si cjatin a Vençon domenie 19 di otubar. A lis 3.00 dopo misdì, Gjespui cjantât in Domo. Subit dopo inte Sale Patriarcje Bertrant: FRA FEDE E STORIE: LA NASSITE DI UNE GRANDE RELIGJON Presentazion dal libri di C. Augias – R. Cacitti
Plui il timp al passe e plui la vôs di pre Antoni e cjape fuarce. La ultime biele gnove e ven di Palaç Belgrât, sede de Provincie di Udin, li che ai 24 di Setembar il president on. Pieri Fontanini al à ricevût une delegazion di Glesie Furlane, vuidade di Zuan Pieri Biasat, dean de associazion. Cun lui a jerin ancje il vicepresident bons. Roberto Bertossi, pre Roman Michelot, president de clape di culture “La Patrie dal Friûl”, Christian Romanini, in rapresentance de redazion de riviste e pre Tonin Cjapielâr, segretari di Glesie Furlane.
Dopo une prime presentazion gjenerâl su la ativitât resinte dai doi sodalizis che pre Antoni Beline al è stât la vuide carismatiche, il dean di Glesie furlane al è jentrât tal detai dal progjet di realizazion de Opera Omnia dal predi e inteletuâl furlanist, specificant che il progjet al viodarâ une racuelte sistematiche e complete di siei scrits, intervents, riflessions, omeliis, intervistis. “No je une iniziative che e ponte a une museificazion de memorie di pre Antoni” al è stât specificât “ma la intenzion di proponi il pinsîr di un om che al à simpri cirût di atualizâ il so messaç, rivant adore simpri a fevelâ al om di vuê”. E je stade ancje riclamade cun fuarce ancje la sielte di continuâ, pal moment, a publicâ i scrits di pre Antoni dome par furlan, par onorâlu e continuâ la sô vore tal so spirt, come che al jere stât za declarât tal comunicât di Glesie furlane, jessût ai 14 di Lui dal 2008 (viôt il comunicât intîr su La Patrie dal Friûl – n. 7 Lui 2008, n.d.r.).
“Al è un dovê pe Provincie di Udin” al à confermât il President Fontanini “La opare di pre Antoni e merte atenzion e cheste iniziative e varà la poie di cheste aministrazion”.
Cumò Glesie furlane e reste in spiete di jessi tornade a contatâ di bande dai Uficis provinciâi par formalizâ l’acuardi plurienâl che al sarà a la fonde di chest progjet di racuelte di dute la produzion di pre Antoni Beline.
Si cjatin domenie ai 13 di lui a lis 7 sore sere te Basiliche Mari di Aquilee.
La liturgjie e sarà compagnade dal Coro Vôs di Vilegnove.
Dopo Messe si cjatisi un moment par un ghiringhel.
Intervent di pre Romano Michelotti al Centro Balducci di Çuian tignût ai 18 di jungn dal 2008 sul cantin “RICONOSCIAMO I NOSTRI PROFETI E CAMMINIAMO CON LORO” Presentâde la figure di pre Antoni come predi, om di glesie, di vanzeli, di fede, pastôr, tant a dî te sô funzion primarie.
Memorie pe Honoris causa tignude a Udin te sede de Universitat dal Friûl Facoltât di Siencis de Formazion ai 22 di mai dal 2008 – Pierantoni BELINE, predi e inteletuâl furlan. Memoreazion de vite e des oparis.
UNIVERSITÂT DAL FRIÛL – FACOLTÂT DI SIENCIS DE FORMAZION
in colaborazion cun
GLESIE FURLANE
La divulgazion culturâl e linguistiche realizade a mieç di une largje opare leterarie, massime il test biblic voltât par furlan, e la ativitât di insegnat che al à intuît il valôr di une scuele in armonie cul teritori a àn motivât la propuete di conferî la lauree onoris causa a Pierantoni Beline. A un an de sô muart, la cunvigne e intint meti in lûs cierts aspiets che a rivuardin la figure dal predi e dal inteletuâl furlan e cun di plui il so impegn inte societât civîl e religjose dal Friûl.
Joibe, ai 22 di Mai 2008, aes 9,30 inte Sale des Cunvignis di Palaç Antonini vie Petracco 8, a Udin
Salût dal Preside de facoltât Franco Fabbro
Roberto Dapit – Parcè une lauree honoris causa a Pierantoni Beline
Remo Cacitti – De Plêf a la paroikia: l’itinerari cristian di pre Antoni Beline
Rinaldo Fabris – Pa peraule di Diu inte lenghe dai oms
Federico Rossi – Autonomie: percors di libertât
Interviste a Pierantoni Beline (videoproiezion)
Coordinât di
Roberto Bertossi
Roberto Dapit
Franco Fabbro
Si cjatin domenie ai 27 di avrîl a lis 6 sore sere tal domo di Vençon
MEMORIE DI PRE ANTONI BELINE A UN AN DE SÔ MUART
– Testemoneancis: la famee, il paîs, il Friûl, la glesie
– S. Messe
GLESIE FURLANE Patriarcjât di Aquilee
in colaborazion cun
UFICI CATECHISTIC DIOCESAN DI UDIN
A organizin un incuintri par joibe ai 13 di Març dal 2008 a lis 6 sore sere te sale Pauli Diacun dal Centri Paulin di Aquilee in vie Trep, 3 a Udin pe presentazion dal libri
STORIE SACRE
di Antoni Beline
a intervignaran:
bons. Lucio Soravitto vescul di Adria-Rovigo
prof.e Silvana Schiavi Fachin esperte di educazion plurilengâl
Manuela Riccioni autore des ilustrazions
Si cjatin domenie ai 24 di Fevrâr a Vençon a lis 3.00 daspò misdì
Gjespui cjantât in Domo; subit dopo l’incuintri te sale Patriarcje Bertrant.
Ricuardant pre Antoni Beline: SCRITS INEDITS
Subit dopo Matilde Caltabiano, docent di storie dal Tart-antic a l’Universitât dai Studis di Milan, nus cjacararà sul teme: Il compit dal vescul te societât tart-antighe
Si cjatin domenie ai 13 di genâr a Vençon: a lis 3.00 dasapò misdì Gjespui cjantât in Domo;
subit dopo l’incuinri te sale Patriarcje Bertrant.
Ricuardant pre Antoni Beline: Scrits inedits
Prof. Renato Jacumin: Aquilee tal IV secul tra ortodossie e eresie: il Vescul Fortunazian
Si tornìn a cjatâ domenie 02 di dicembar a Vençon a lis 3.00 daspò misdì
Gjespui cjantât in Domo;
subit dopo l’incuintri te sale Patriarcje Bertrant.
Bons. Roberto Bertossi al presentarà:
SCRITS INEDITS
di pre Antoni Beline a Vençon
Remo Cacitti de Universitât dai Studis di Milan:
FRA TRADIZIONE E INNOVAZIONE Cromazio di Aquileia nel dibattito teologico del IV secolo.
Glesie Furlane, la associazion di predis e laics che di agns si impegne par puartâ ancje te glesie la lenghe furlane, e ricuarde i Sants Ermacure e Fortunât, patrons dal Friûl.Lu fasarà domenie ai 15 di Lui te Basiliche Mari di Aquilee aes 7 sore sere. La funzion e sarà celebrade di bonsignôr Adelchi Cabass vicjari gjenerâl de Diocesi di Gurize.E sarà la ocasion no dome par memoreâ i doi martars aquileiês, ma ancje par fâ il pont de situazion de glesie furlane in gjenerâl e ricuardâ pre Antoni Beline, mancjât ai 23 di Avrîl dal 2007.Si cjatarìn chest an cence pre Antoni, savint però che il so spirt nus cjale a declarin chei di Glesie Furlane Nus à lassâts prin di viodi autorizât il Messâl Roman par furlan e nô o vin la ereditât e il dovê di bati su cheste strade: ai fedêi o darìn fûr il so testement spirtuâl.Di fat pre Antoni Beline e Glesie Furlane al è di doi agns che a spietin la autorizazion par podê doprâ il Messâl Roman voltât par furlan daûr de Editio typica III. La traduzion però inmò no je stade autorizade di bande de Conference episcopâl taliane Parcè che i Vescui nus àn dit che prime al à di jessi finît di voltâ chel dal latin al talian: une motivazion banâl e dispotiche! e denuncie Glesie Furlane E pensâ che ducj i problemis a podaressin jessi risolts ancje dai nestris Vescui dal Friûl Brollo, DAntoni e Poletto che a àn dute la autoritât par permeti aes lôr Diocesis di podê doprâ il test furlan: invezit nuie! A spietin Rome e dut ce che al è stât fat al è stât regalâi une copie al Pape, ma cheste no je une cuestion che e rivuarde il Pape: dome la Cei o i nestris Vescui furlans a puedin dâ la autorizazion. Cheste situazion e je vergognose e injustificade: si viete al popul furlan di vê la peraule dal Signôr te nestre Marilenghe!.Ma intant che i Vescui de Regjon a rivaran a mans scjassant, cence vê mantignût l’impegn, i predis di Glesie Furlane a puartaran chel distès il Messâl Roman par furlan a Aquilee, par condividi in comunion cu la int furlane i tescj che pre Toni al veve tant lavorât par puartâju dal latin al furlan.Cheste situazion inacetabile e ven amplificade inmò di plui de notizie resinte che Pape Benedet XVI al à dât la autorizazion a recuperâ il rît tridentin di Pio V (secul XVI), tornant cussì al ûs dal latin tes funzions. Une contradizion temporâl e teologjiche che e conferme che e je vite dure pe lenghe furlane: intant che il latin al cjape la strade principâl, puartant l’orloi indaûr di cuatri secui prime dal Concili Vatican II che al veve puartât la funzion intune dimension di condivision comunitarie cul popul, al popul stes i ven dineât il dirit di podê preâ il Signôr te sô Marilenghe Cuasi che la religjon no fos part de vite cuotidiane, ma un moment par gjavassi de realtât di ogni dì e doprâ une lenghe foreste tant che il latin e no il furlan a sierin chei di Glesie Furlane pre Antoni tal so testement nus à lassât cheste racomandazion che o intindìn rispietâ fin sul ultin: Vivêt di furlans, vivêt pal vuestri ben, vivêt pal ben de glesie, vivêt pal ben dal nestri Friûl.
Aes audizions, tal daspomisdì di martars ai 26 di Jugn dal 2007, a son stadis scoltadis lis vot associazions a cjapitul (Colonos, Glesie Furlane,
La Grame, La Patrie dal Friûl, Informazion Furlane, Radio Spazio 103, Kappa Vu, ILF Pre Checo Placerean) e a cuatri realtâts associativis dal
Friûl ocidentâl (Centri Studi PP Pasolini, Circul culturâl Menocchio, La barca di Babele-circul culturâl di Midun, Grup Majakoskij).
Articul tirat fûr dal mensîl “La Patrie dal Friûl” n. 5 dal mês di Mai dal 2007
Il Friûl si è fermât par saludâ pre Toni.
Un mâr di int al è rivât a Visepente ai 25 di Avrîl par dâi l’ultin salût a pre Antoni Beline, che li al jere rivât ai 22 di Jugn dal 1982, dopo vê tignût par 14 agns li parochiis di Val, Rualp e Treli in Cjargne, che tant al amave.
Pre Toni Beline al è mancjât denant de glesie di Visepente vie pe gnot tra i 22 e i 23 di Avrîl par une crisi respiratorie. Al jere nassût ai 11 di Fevrâr dal 1941 a Vençon.
Vuê in Patrie si sintìn ducj vuarfins e il Friûl al è plui puar.
O vin pierdût une grande persone, une inteligjence fine, un furlanist che cun passion al à puartât indevant la lote par un Friûl plui furlan.
Joibe ai 19 di Avrîl o vevin stât a cjatâlu a cjase sô: al jere di pôc tornât a cjase dal ospedâl…
Al jere strac, ma nol veve voie di fermâsi: simpri a pensâ a progjets, ideis, il numar di Mai de Patrie ancje se chel di Avrîl al jere a pene stât stampât.
Ma chest colp al à scugnût rindisi ancje lui: spirt libar, spirt fuart, spirt sclet, spirt furlan.
Musis cognossudis e mancul cognossudis, i amîs di simpri, che no lu àn mai lassât bessôl nancje cuant che lis gjerarchiis a àn cirût di incjantonâlu, ma soredut tante tante int e à jemplât la glesie e la place di Visepente pal so funerâl.
E duncj cuntun grop tal cuel, un grop grant come che a jerin grancj pre Toni e la sô sapience.
Al à celebrât il vescul emerit bons. Alfredo Battisti che al à ricuardât la sô figure «pre Toni al à savût disferenciâsi dentri de glesie e de culture furlane».
Te predicje, bons Battisti al à puartât la sô testemoneance «I disevin discomut come che discomuts a son i oms cun dotis gjeniâls e ecezionâls che mâl si adatin dentri dai confins de normalitât». Al à ricuardât ancje l’om di culture «Paron de lenghe furlane come che indi è pôcs» e la sô ativitât par puartâ la lenghe furlane ancje dentri de Glesie cu la traduzion par furlan dal Lezionari, dal Messâl e de Bibie «il so passâpuart pal paradîs» come che al à vût dit ancje il vescul bons. Pieri Brollo intune interviste a pene savût de muart di pre Toni. Ma significatîf al è stât il riferiment al libri di pre Toni che plui di ducj al à scjassât la gjerarchie eclesiastiche: «La fabriche dai predis», une critiche fuarte al ‘seminari dai siei timps. «Un libri» al à dit il vescul Battisti «che al à provocât tantis tension e reazions duris dentri dal mont de Glesie. Dopo che al jere stât publicât, cuant che o soi stât a cjatâlu mi à saludât cun Pacificusne ingressus tuus? e o ai capît che il so stîl polemic e jere la risulte di un amôr deludût». E pre Toni, che al veve une idee alte de glesie e de veretât, lu ritirà cuntune nobile letare scrite al consei prebiterâl, ma mai publicade, li che al motivave cheste decision «parcè che al veve constatât di vê fat patî cualchidun» al à ricuardât Bons. Battisti.
E cumò no nus reste che tirâ drets sul troi che nus à segnât, cirint di no pierdi la lûs dal so ferâl che nus mostrave la strade. Si sin domandâts ce fâ cun chest numar, stant che o jerin daûr a preparâlu cuant o vin savût de sô muart. Fermâsi? Butâ par aiar dut? No! Pre Toni al à vût fin sul ultin la fuarce di puartâ indevant «la barache» e duncje o vin decidût che par onorâ il nestri diretôr o vevin di puartâ insom ce che lui al veve progjetât ancje cheste volte.
La miôr maniere par ricuardâlu al è continuâ a lei lis sôs peraulis: propit «Ferâl» e sarès stade la sô gnove rubriche e che us metìn achì in bande. Cheste riflession e l’editoriâl che al à viert chest numar a son i ultins regâi che pre Toni nus à fat prin di lâ incuintri al Signôr.
Mandi pre Toni, predi a to mût par fortune dal Friûl. Grazie di dut.
COSA CI LASCIA PRE ANTONI? Note su La fatica di esser prete di pre Federico GROSSO
Signôr, ti berli dal font che mi cjati: Signôr, scolte la mê vôs. (Salm 130)
Il grop di Glesie Furlane al à plasê di vivi cun te un moment di riflession e di preiere ricuardant pre Antoni.
Si cjatarìn Domenie ai 27 di chest mês – Pentecostis – a lis 7.00 sore sere tal Domo di Vençon
Che no nus mancji mai, tal nestri vinars sant, il lusôr e il calôr di Pasche, la fede te resurezion.
Ma cirin ancje di anticipâ cheste resurezion puartant segnâi di vite e di sperance là che mancul and è e plui a coventin.
Il vanzeli al dîs: “parcè cirîso framieç dai muarts chel ch’al vîf?. Nol è culì, ma al è resussitât”.
Ognun di nô al à tante int muarte; cualchidun al à ancjemò lis feridis di une pierdite tremende. Che il Signôr de consolazion e de sperance nus dedi la furce di lâ denant des tombis dai nestris muarts convints par fede che no son li, che a vivin, che dopo la resurezion di Crist no podìn plui lâ a cirî muarts percè che lui al vîf e al fâs vivi.
Disvuedìn i nestris cimiteris di muarts!
Disvuedìn il nestri Friûl di cimiteris!, vadi di paîs cence vite e di int cence sperance. Berlìn la resurezion cu la fede e cu la vite!
pre Antoni Beline
«Storie sacre», struc de Biblie in poesie di Pre Antoni Beline, publicât par cure de associazion Glesie Furlane
Bons. Lucio Soravito, vescul di Adrie-Rovigo: «Mi plasarès che, leint la Storie Sacre, a tante int i vignìs la gole mate di tornâ a cjapâ in man la Biblie, parcè che la Biblie e je peraule di Diu»
Articui gjavâts fûr de: LA VITA CATTOLICA dal 31 di Març dal 2007
Nus fâs plasê la sô presince al prossim incuintri di Glesie Furlane di domenie ai 25 di març dal 2007 a Vençon.
LA POLASE DI GJONE TAL MOSAIC DE BASILICHE DI AQUILEE: parcè sot des cocis e no sot de elare?
Al intervignarà
Giovanni Bazzana
de Universitât dai Studis di Milan
A lis trê dopo di misdì cjant dal Gjespui in Domo;
subit dopo la relazion te Sale Patriarcje Bertrant, dongje dal Domo.
Il Dean di Glesie Furlane
Zuan Pieri Biasatti
In spiete de aprovazion uficiâl dal Messâl roman voltât par furlan, Glesie Furlane e propon un incuintri su:IL RÎT AQUILEIÊS FRA STORIE E PROSPETIVIS PAL AVIGNÍ
DOMENIE 28 DI ZENâR A VENçON.
A lis trê daspò di misdì cjant dai gjespui in Domo e, subit dopo, lis relazions de sale Patriarcje Bertrant.
Intervents:
pre Sef Gjargnel, musicolic
ORIGJINALITÂT DE LITURGJIE DE GLESIE DI AQUILEE
pre Josef Peressotti, curadôr dal Missale aquileiensis Ecclesiae
STORIE DAL MESSÂL AQUILEIÊS
bons. Duilio Corgnali, president de Comission interediocesane pal Messâl
IL MESSÂL ROMAN VOLTÂT PAR FURLAN: NOTIS DI CRONACHE
DE CUNVIGNE INMANEADE DAL GRUP DI GLESIE FURLANE
UNE PROPUESTE DI LETURE GNOVE PAR CAPÎ MIÔR CEMÛT
CHE IL CRISTIANISIM SI È SLARGJÂT TES TIERIS DI AQUILEE
Pai cristians dal Friûl, al à dit bons. Schiff, la glesie
mari di Aquilee e reste un pont di riferiment
unic e insostituibil te pastorâl diocesane
LA CUNVIGNE di studi su Aquilee dade dongje dal grup di Glesie Furlane e tignude a Udin sabide ai 2 di Dicembar te sale Pauli Diacun e à lassât intai partecipants il gust di tornâsi a cjatâ. A son chei incuintris che ti sticin il gust de tô storie, ti madurin, ti dan dignitât umane e cristiane. Lincuintri su «Metodo e fonti per la ricostruzione della propagazione del Cristianesimo ad Aquileia» al à inmaneât une leture gnove de archeologjie, de iconografie e de agjografie de Basiliche par capî miôr cemût che il cristianisim si è slargjât tes tieris di Aquilee. Si à començât cul salût dal dean di Glesie Furlane, Zuan Pieri Biasatti, che al à presentât spirt e iniziativis dal grup. Bons. Igino Schiff, vicjari pe pastorâl de Arcidiocesi di Udin, al à puartât il salût dal Arcivescul, bons. Pietro Brollo, e al à laudade lazion di Glesie Furlane. Pai cristians dal Friûl, al à continuât bons. Schiff, la glesie mari di Aquilee e reste une risultive e un pont di riferiment unics e insostituibii te pastorâl diocesane e tal mont globalizât di vuê. Al à daspò puartât il so salût Arnaldo Becci, dean de Fondazion «Società per la conservazione della Basilica di Aquileia ». Prime di dâ la peraule ai relatôrs il pinsîr al è lât aes personis che nô vuê o gjoldìn dai lôr studis: in mût particolâr pre Bepo Marchet, bons. Guglielmo Biasutti, pre Checo Placerean, pre Gilberto Pressacco e pre Vigji Marcuç, za plevan di Aquilee. Lis relazions de cunvigne a son stadis une vore interessantis. Remo Cacitti, de Universitât dai studis di Milan, al à fat un excursus li che partint des origjinis dal cristianisim al à metût in lûs i grancj oms che a àn dade une interpretazion storiche ai aveniments de Glesie di Aquilee dal inizi fin in zornade di vuê. Aurora Cagnana, de Sorintendence archeologjiche di Gjenue e che e à lavorât par agns in Friûl, nus à presentade une cerce di ce che i sgjâfs, un muret, i claps a tramandin dai
prins insediaments dal cristianisim: tesaurs sparniçâts des monts fint al mâr e che la nestre tiere ancjemò tancj indi plate e e custodìs. Intant al è rivât misdì: un moment di soste, un ghiringhel insieme, e po la seconde part de cunvigne. Gabriele Pelizzari, de Universitât dai studis di Milan, un zovin che di agns in ca al scrutine laule sud de glesie di Aquilee, nus à presentade midiant diapositivis la Sale teodoriane e nus à dade une olme di une sô prossime publicazion sul mosaic de Basiliche. Alessio Persic de Universitât catoliche di Milan al à cjacarât dai martars aquileiês, de «rusticitas » e di Aquilee pont di riferiment dal monachisim in Ocident. E steve rivant aromai la gnot e si sin saludâts. Tornant cjase tancj pinsîrs mi balinavin in cûr: o riviodevi i grancj oms de Glesie di Aquilee e cussì, intant che lAn liturgjic si sfantave tal scûr (tal doman e jere la prime domenie di Avent), la glesie mari cuasi e riviveve no viele e lontane, ma creature gnove, frescje, biele, che e plâs e che inamore in zornade di vuê. Aquilee e continue a restâ segnâl pes grandis domandis che a compagnin la nestre religjon: il misteri dal Profete di Nazaret, lidentitât de proprie glesie, il valôr des piçulis comunitâts, levangjelizazion… Tes croseris dal mont di vuê, jê nus da la direzion, nus segne la strade di fâ. Un grazie ai relatôrs e a chei che a àn organizade la cunvigne. In chest incuintri forsit o vin fate ancje nô lesperience dai «rustics» di mil e sietcent agns fa. Lôr, partîts de campagne a jentravin te Aule teodoriane e a restavin cence flât in tant sflandôr. Jessûts, dopo di vê contemplâts tal mosaic dal paviment i misteris cristians, a tornavin cjase cun alc di grant in cûr. Cussì al è stât e al reste ancje par nô. No sai se lant vuê te glesie di Aquilee o prearès o no, parcè che lambient, cemût che al è stât ridusût, no mi invide plui a preâ. Dut in chel lûc al cjacare di art e di storie ma jentrant no mi cjati plui tal misteri, no ai plui un puest dulà inzenoglâmi a contemplâ. Par chest cumò, cjalant a la cunvigne, o preferìs pensâ a Rufin, Jeroni, Valerian, Atanasi e in chest svicinâsi dal Nadâl a Cromazi che nus dîs ancje vuê: «Crist al à cjapât sù di noaltris ce che al è nestri, par podênus regalâ ce che lui al è».
Articul gjavât fûr dal: IL FRIULI an XII – numar 44 – 24/11/2006
La Patrie dal Friûl, il mensîl dut par furlan nassût tal 1946, al à fat fieste pai siei prins 60 agns. Il 2006 al è stât un an impuartant e par viodi di fâ un belanç di cheste lungje ativitât o vin stât a fevelâ cun pre Toni Beline, diretôr de riviste.
– Pre Toni, che nus conti alc di se.
O soi nassût a Vençon ai 11 di Fevrâr dal 1941 e o soi deventât predi dal 1965. O ai tacade la mê cariere (a cessecûl) a Codroip, considerât in chei agns un puest di sigûr avignî. Po o soi lât a sierâmi insom des monts, a Sant Martin di Rualp e Val, in comun di Darte, e li o ai vude come une seconde nassite culturâl e spirtuâl, parcè che o ai tacât a volêi ben e a spindi la mê vite pal popul e pe glesie furlane. Par custions di salût, dopo 14 agns mi soi sbassât a Visepente, là che o lavori di 24 agns. O fâs prin di dut il predi, ma o scrîf libris, o partecipi a la vite culturâl dal Friûl. O speri di jessi ricuardât pe traduzion de Bibie par furlan.
– Pre Toni, 60 agns par une persone a son za un travuart che le puarte viers la pension, ma par un mieç di informazion, soredut in lenghe, a son un sucès no di pôc. Ce significhial chest par lui?
Il paragon cuntune persone fisiche al ten e nol ten. La persone fisiche e à un so timp plui o mancul lunc ma limitât, biel che un sfuei al à di compagnâ il timp di une comunitât, che no devente mai viele, ma si modifiche saldo. Par chel si pues dî che ancje pal gjornâl i agns a passin, ma si è simpri come a la prime dì. Il sucès nol è tant te durade, ma tal interpretâ cun fedeltât e libertât il moment che tu vivis. Un gjornalist seri nol varès di contentâsi di fâ di nodâr o di cronist, ma al varès di fâ di profete, anticipant i timps e judant a lâ de bande juste. Il sucès po nol sta tal vê ducj de tô bande, ma di jessi tu de bande de libertât, paiant il presit che al covente.
– Ricuardìn i trê personâçs che a àn fondade tal 1946 la Patrie dal Friûl
Pre Bepo Marchet e Feliç Marchi a son dôs grandis personalitâts, che si completin in maniere positive e armoniche. Marchet al à une preparazion culturâl di prin ordin e un penâl, soredut te part polemiche, che nol à confronts. Marchi al è lanarchic che al cjale la realtât di là e fûr dal sisteme e soredut al à intuizions origjinâls e grant fiât. Lui al da la idee o la cuintriidee e pre Bepo le documente cui fats de storie e le vivifiche cu la sô passion e passionalitât. Marchi, cence Marchet, nol varès podût esternâ lis sôs ideis autonomistichis e Marchet, cence Marchi, nol varès vude dute chê sgrimie. Marie Del Fabbro, femine di Marchi, e faseve la sô part cirint di pasâ i doi leons e metint chel fregul di feminilitât, di umanitât e di sintiment che al coventave par no colâ tal ecès.
– La Patrie dal Friûl e à compagnât la seconde metât dal Secul curt dal Friûl: cuâl isal stât il moment plui esaltant di chescj 60 agns?
Di sigûr tai prins agns, dal 1946 al 1950. Il Friûl al jere par tiere e si veve une dibisugne tremende di sperance, di stimul, di spirt. La autonomie e jere la strade plui induvinade e la int le sintive come il moment providenziâl pal riscat di une tiere eternementri sotane. Al varès podût deventâ, cun plui serietât e inteligjence di chel talian, il nestri resuriment.
– E invezit lis dificoltâts plui significativis?
Di ordin nazionâl e internazionâl. La nestre tiere (no ancjemò regjon) e jere a cunfin cul mont comunist, cu la cente di fier, che nus incjantonave. Tocjave jessi talianons e catolicons, che al è juste il contrari de autonomie. Po a àn cjapât pît i partîts, soredut la Democrazie cristiane e il partît comunist che, par resons contrariis, a jerin insensibii e contraris a ogni discors di lenghe, culture, autonomie furlane. E il Friûl nol contave nuie a confront cun Triest, la citât martare di salvâle a ogni cost.
– Chestis dificoltâts sono stadis superadis? Cemût staie la Patrie dal Friûl vuê?
Se o sin ancjemò a contâse al vûl dî che no son stadis superadis. A dî la veretât il concet di autonomie nol sarà mai superât, parcè che al è un concet dinamic, no static. La Patrie e sta vonde ben ma e à di stâ miôr parcè che il lavôr al è tant.
– E il mont de informazion?
Nol è interessât a la cuistion parcè che nol è interessât il paron. O intint soredut il paron politic, tant a nivel centralistic che di periferie.
– Ce vuelial dî fâ informazion in lenghe minoritarie (che però in Friûl, minoritarie no je) intun mont che al fevele parsore i confins midiant dai mieçs di comunicazion modernis come internet e vie indevant?
Al vûl dî fedeltât a la idee di fonde e grande libertât e creativitât tal doprâ lis possibilitâts tecnologjichis di vuê. O vin di promovi la idee di un Friûl che nol cîr di salvâsi a ducj i coscj de modernitât, ma che al sa frontâ e confrontâsi ancje cu la globalitât. Tignìn a ments che la globalitât cence il localisim e je une scjatule vueide. Cussì come linglês cence lis lenghis e lis culturis locâls.
– Dopo chescj prins 60 agns, ce prospetivis pal avignî de Patrie?
Mi sint di dî che il discors de autonomie, de autocussience dai furlans nol è finît. Al à ancjemò di scomençâ. No sin duncje a la fin di une stagjon culturâl, ma al inizi. Nus sta a nô interpretâ e madressi cheste dibisugne magari subcussient di identitât, cirint di vierzi stradis gnovis, plui che salvâ robis validis, ma passadis.
– E ce si spietial pal Friûl tal 2007?
O spieti che e cjapi pît la Assemblee des Pronviciis Furlanis e che la regjon e vedi la onestât e il coragjo di dânus un statût che al ricognòs la divierse condizion e vocazion dal Friûl e di Triest e nol sacrifichi simpri une regjon par une citât, ancje se metropolitane. Ma chest nus sta soredut a nô furlans, che no vin plui nissun alibi.
In acuardi cul Ufici scule diocesan e cu l’Arcidiocesi di Udin
In colaborazion cun:
Fondazion “Società per la conservazione della Basilica di Aquileia” di Aquilee
La Vita Cattolica di Udin
Voce Isontina di Gurize
Radio Spazio 103 di Udin
Une leture gnove de archeologjie, de iconografie e de agjografie de Basiliche par capî miôr cemût che il Cristianesim si è slargjât tes tieris di Aquilee
Sabide ai 2 di Dicembar des 10,00 di matine fintremai a lis 4 e mieze dopo di misdì a Udin te Sale Pauli Diacun in vie Trep, 5 – cun parchegjo
A puartin i salûts
bons. Igino Schiff, vicjari pe pastorâl de Arcidiocesi di Udin
Arnaldo Becci, dean de Fondazion “Società per la conservazione della Basilica di Aquileia”
Intervents:
Remo Cacitti, de Universitât dai Studis di Milan, al fasarà l’introduzion gjenerâl
Aurora Cagnana, de Sorintendence archeologjiche di Gjenue, e presentarà lis risultivis archeologjichis
Gabriele Pelizzari, de Universitât dai Studis di Milan, al relazionarà su aspiets inedits des risultivis iconografichis
Alessio Persic, de Universitât Catoliche di Milan, al tratarà des risultivis agjografichis
Coordenadôr:
pre Tonin Cappellari, plevan di Ruvigne
Ai insegnats di religjon ur vignarà consegnât un atestât di partecipazion
Stant il numar sierât dai partecipants, si domande la conferme
Tel. 0432/904572 – 0432/956010 – 0432/414514
e-mail: info@glesiefurlane.org
