Notiziis e avîs

Al è stât publicât “Cjantis di glesie dal Popul Furlan” un dopli CD cun valôr didatic. Un supuart par ogni comunitât, parochie, plevan o laic adet a sostignî il cjant liturgjic. Une vuide e esempli par imparâ e insegnâ il patrimoni musicâl corâl dal cjant liturgjic di ande furlane e no dome.

La racuelte e cjape dentri i cjants, a struture semplice e corâl, par ducj i timps liturgjics e par ogni celebrazion.

Al è l'esit finâl di une lungje ricercje dai cjants de tradizion patriarcjine di Aquilee che pre ‘Sef Cargnello al à fat, ancjemô tai agns 60 dal secul passât.

Une ricercje minuziose e la regjistrazion, vocâl, ator pai paîs dal Friûl di ducj chei cjants che i vecjos cantôrs di glesie a conservavin ancjemò te lôr memorie. Un patrimoni orâl, duncje no scrit, che al riscjave di murî insieme cantôrs, e che Iis riformis liturgjichis a vevin butât vie di corse, cun masse premure. Pre ‘Sef al à salvât in timp tesaurs e perlis che se no a saressin pierdudis par simpri.

Di chescj cjants antîcs e je stade fate la trasliterazion: la traduzion par furlan, cu la stesse metriche dai tescj liturgjics latins, e permet di cjantâ ancjemò chestis melodiis al dì di vuê che il latin nissun no tu mastie plui.

In cheste maniere, recuperant la melodie e ancje il test liturgjic te lenghe vive dal popul, si rive a dâ ancjemò dignitât e misticitât a lis nestris liturgjiis masse spes massacradis di conzonetis e di banalitâts.