Notiziis e avîs

Il tierç libri de “Opare Omnia” di pre Antoni Beline “Riflessions di un predi cjargnel” al è stât mandât ancje al vescul di Rome il Pape Benedet XVI par che i dedi une man te Sô opare pastorâl.

Cussì o sin contents che ancje il vescul di Rome, Joseph Ratzinger, al vedi mût di lei chestis pagjinis e di cognossi, almancul un freghenin, un predi, fi dal Friûl e de Glesie di Aquilee, che al à lassât e al lassarà a dilunc il segno de sô presince te storie de nestre Glesie e dal nestri popul.

O crodìn che chest librut, scrit ai 29 di setembar dal 1974 che o vin publicât te version furlane e ta chê origjinâl taliane, cuntune grampute di articuluts sul stes argoment come zonte, nol à pierdût il so valôr in tune situazion come chê che o vivin tant in certis analisis che al faseve, che tai tentatîfs di soluzion che al proponeve.

Cheste la letare di ringraziament.