BIBIE IN LINIE

Abdie

Introduzion

Il libri di Abdie

Al è il plui curt di dute la colezion profetiche e di dut il V.T. Dal autôr no si cognòs nuie. Probabilmentri al à vivût e profetât tal VI-V sec. p.d.C., sul finî dal esili di Gjude in Babilonie.

La sô profezie e à un sôl teme: il cjastic dai fîs di Edom, che a vevin gjoldût de tragjedie plombade sui lôr fradis gjudeus tal fruç di Gjerusalem dal 587 p.d.C. e de depuartazion di dut il popul e a vevin profitât de disgracie par fâur ogni sorte di malegraciis.

La profezie si slargje par cjapâ dentri il judizi di Diu cuintri i popui paians. L’ultime peraule e je la promesse di une ristaurazion trionfâl dal popul di Diu.

Une composizion là che il spirt nazionalist, fuart, no i impedìs al autôr di celebrâ la potence e la justizie dal unic Diu, paron e judiç no dome dal so popul ma di ducj i popui e di dute la storie.

In Abdie, a diference di altris profetis, la “zornade dal Signôr” no sarà cuintri dal popul elet ma il moment de sô rivincite storiche e spirtuâl.