La letare ai Ebreus
L’ultime vore dal cjanul cristian cul non di Pauli e je la “letare ai Ebreus”. Chest titul jal àn dât za tal secont secul a di un scrit di Alessandrie d’Egjit, ma za sul scomençâ de storie cristiane a àn metût in forsit ch’e fos propit di Pauli e vuê ducj si conven tal dî di no. E rissint però de influence teologjiche di Pauli, ancje se le à componude un cristian che al à a man la lenghe greche e lis tradizions ebraichis e ch’al lei la Bibie a mût des scuelis rabinichis e des sinagoghis de emigrazion greche-elenistiche (diaspore).
L’autôr stes al presente la sô vore tant che une “peraule di racomandazion” (13,22-25). E di fat al mancje il solit telâr de letare, cu la direzion e cul salût, ancje se dapît e je une note a usance bilgjet, là che si dà cualchi informazion e si salude (13,22-25). Il stîl e il mût di lâ indenant al è chel de predicje o omelie, ch’e disvuluce cheste cuistion: “La sostance di ce ch’o stin disint e je cheste: o vin un prin predi cussì grant che si è sentât a la gjestre de maiestât intai cîi, servidôr dal santuari e de vere tende che le à fate il Signôr e no un om” (8,12). Gjesù, sicu Fi di Diu, al è il predi grant e unic che, dant vie la sô vite, al à puartade une volte par dutis la redenzie dai pecjâts a pro di ducj i oms. E l’autôr lu dimostre cuntun resonament ben inmaneât. Al tache il teme cuntune sorte di cjante (1,1-4), po al spieghe la sô idee cuntune schirie di confronts jenfri ce ch’e dîs la Scriture e la realtât cristiane, e al siere cu lis racomandazions pratichis.
1. Confront fra il puest di Gjesù, il Fi, e chel dai agnui in merit a la salvece dai oms (1,5-14; 2,5-18). Al conclût che Gjesù al è predi fedêl daprûf di Diu e plen di boncûr cui oms siei fradis (2,17-18). Al met jenfri vie ancje une piçule racomandazion di jessi fedêi e di no molâ (2,1-4).
2. Confront fra Mosè, servidôr di Diu, e Gjesù, il Fi fedêl (3,1-6). Sot forme di racomandazion al fâs un confront cu la storie dal popul di Diu in viaç viers la Tiere de promesse o lûc de polse (3,7-4,13).
3. Gjesù al è il grant predi plen di boncûr, che Diu lu à metût sul stamp di Melchisedek (4,14-5,10). E chest al è il cûr de letare. Podopo al met un mac di racomandazions sui pericui de infedeltât e de apostasie e al presente la sperance cristiane ch’e à la fonde sun Gjesù (5,11-6,20).
4. Gjesù al è predi sul stamp di Melchisedek, perfet e par simpri (7,1-28).
5. Confront jenfri il santuari dai cîi e il sacrifici unic e perfet dal gnûf pat e chei de prime e viere aleance (8,1-10,18). Dopo di chest lunc sclariment, al racomande di vê fede e di restâ salts in Crist (10,19-39).
6. Laut pe fede dai vons e invît a lâi daûr a Gjesù, fonde e puart de fede cristiane. Dome lui al pò mediâ pal gnûf pat (11,1-12,29).
7. Ultimis racomandazions a vivi te fede e tal amôr la gnove religjon screade cun Crist (13,1-19). Une benedizion, cul struc de cuistion centrâl, e siere la letare (13,20-21).
Cui le àial scrite cheste letare? Di dulà? A di cui le àial mandade? Studiant a font il test, si pò rigjavâ fûr alc in merit di chei che ur e à distinade. Si trate di une comunitât di cristians ch’a stan vivint un moment grivi pe fede e pe perseverance, par colpe di chei difûr, contraris, e di chei di dentri, flaps e sflacjons e ch’a volaressin une religjon rude funzions e regulis. Stant al mût di scrivi par grêc e al mût di lei la Bibie, si pò scrupulâ che la letare le vedi scrite un cristian de scuele di Pauli, tor i agns 80 d.d.C., ch’al à colegance cuntun grop di cristians di riunde taliane (13,24).
La letare ai ebreus e je un piçul tratât sun Crist predi e vitime che nus salve. E je impuartant par sclarî il puest che i compet a Crist sicu predi: cu la sô fedeltât a Diu, tant che Fi ch’al à vivût te solidarietât fint a la muart, lui al fâs la mediazion uniche e definitive e al puarte al colm ce che, te prime aleance, al jere dome lumât.