BIBIE IN LINIE

Gjeremie

Introduzion

Il libri di Gjeremie

Il non dal profete di Anatot al è leât cu la fin dal ream di Gjude. Pôcs profetis a àn vivude su la lôr piel la tragjedie dal lôr popul come Gjeremie. Se Isaie al dopre ducj i regjistris de fantasie e de vivarositât, Gjeremie al cognòs dutis lis sfumaduris dal dolôr. Se il prin si pò piturâlu cui colôrs de lûs, il secont al pò jessi figurât dome cui colôrs scûrs de passion.

A diference di chei altris profetis, chi a àn une part di prin plan l’element biografic e la presince di “confessions” che a metin a rût la tragjedie personâl di un mandât di Diu che si sint a sfracaiâ sot il pês di une realtât masse crude.

Di riunde sacerdotâl, Gjeremie al à vivût e profetât tal ream di Gjude dal 622 p.d.C. fintremai a dopo dal 587 p.d.C., an de distruzion di Gjerusalem, dal templi e des istituzions che a regevin il popul di Diu.

Perseguitât, metût in preson, pacât come traditôr e disfatist par vie dai siei mes che no si cumbinavin cu lis trainis dai governants, lui al reste fedêl a la sô mission, e cheste fedeltât le pae cun sacrificis e amarecis ininmagjinabilis, lui che par naturâl al jere timit e bon.

Gjeremie stes, tal c. 36, nus dà cualchi indicazion su la storie dal so libri, scrit in part almancul dôs voltis. Chest si pò verificâlu soredut inte antighe version greche, un otâf plui curte dal test ebraic.

Plui che di libri si varès di fevelâ di une racolte di scrits cence un ordin cronologjic o logjic. Cheste racolte si pò dividile in cinc parts cuntune introduzion e dôs zontis.

Introduzion, cu la clamade (c. 1); I part: sentencis cuintri di Gjude (cc. 2-29); II part: la ete messianiche (cc. 30-33); III part: sentencis intant che i nemîs a sidiavin Gjerusalem (cc. 34,1-40,6); IV part: sentencis dopo cjapade Gjerusalem (cc. 40,7-44,30); zonte: sentence a rivuart di Baruc (45,1-5); V part: sentencis cuintri dai forescj (cc. 46-51); zonte: fin di Gjerusalem e scarcerazion di Joiachin (c. 52).

La novitât di Gjeremie no sta te origjinalitât dal mes ma te profonde umanitât e te partecipazion passionade dal profete al distin dal so popul. Al bat fuart su la interioritât dal rapuart fra Diu e l’om e su la responsabilitât tremende ch’e à la istituzion religjose ogni volte ch’e fâs lâ fûr di strade il popul o, ch’al è compagn, no lu jude a lâ pe strade juste. Pai siei patiments Gjeremie al è deventât une anticipazion e une figure dal Messie.

Ducj i libris profetics a àn une fuarce che ti gafe l’anime. Ma nissun come chest nol rive a dismovi tal letôr une simpatie straordenarie no dome pal distin dal popul ma ancje pe liende personâl dal profete, ch’al pae e al vîf in prime persone ce ch’al fâs e al dîs. Leint Gjeremie si à une idee di ce ch’al vûl dî colâ tes mans dal Diu vivent. Si disarès ch’al à scrit il libri intengint il penâl tal so sanc. Dome cussì si pò capî il so berli disperât: “Maledete la dì che o soi nassût” (20,14).

Chest sît al dopre dai cookie, continuant a navigâ tu acetis di doprâju. Plui informazions.

Questo sito utilizza i cookie per fornire la migliore esperienza di navigazione possibile. Continuando a utilizzare questo sito senza modificare le impostazioni dei cookie o cliccando su "Accetta" permetti il loro utilizzo.

Chiudi