I libris storics
Inte Bibie ebraiche, i libris di Gjosuè, dai Judiçs, di Samuel e dai Rês a son clamâts profetics anteriôrs, in cuintriposizion ai profetis posteriôrs, ven a stâi Isaie, Gjeremie, Ezechiel e i dodis profetis minôrs. Cheste designazion e jere saltade fûr par vie di une tradizion che e voleve un “profete” come autôr: Gjosuè pal libri che al puarte il so non, Samuel pai Judiçs e Samuel, Gjeremie pai Rês.
Cheste tradizion e à une sô fonde tal caratar religjôs di chescj libris, che nô ju clamìn storics ma che a tratin in realtât dai rapuarts fra Israel e il Signôr, fra la fedeltât e la infedeltât (soredut chê) tai confronts de peraule di Diu che e veve tai profetis il so imprest di trasmission.
Di fat i profetis a intervegnin dispès: Samuel, Gad, Natan, Elie, Liseo, Isaie, Gjeremie, cence contâ chei minôrs. In plui i libris dai Rês a dan la suage là che a àn operât i profetis scritôrs prin dal esili.
In cheste maniere chescj libris a son peâts a ce che al ven dopo dal Pentateuc. A la fin dal Deuteronomi, Gjosuè al è nomenât sucessôr di Mosè e il so libri al scomence cu la muart di Mosè.
Cheste continuitât e à fat scrupulâ che tal libri di Gjosuè, plui che no in chei altris, al fos stât doprât il stes “document” o “scrit”, magari ipotizant un “Esateuc”, che si sprolungjave fint a la fin dai Rês. Di sigûr al è che, in chescj libris, la storie e ven lete cul spirt dal Deuteronomi.
Cheste clâf di leture nus permet di dî che il Deuteronomi al met la fonde storiche e teologjiche de elezion di Israel; Gjosuè al conte cemût che il popul si è sistemât te tiere de promesse; i Judiçs a tratin di chest scjampâ e tornâ seguitîf dal popul al so Diu; Samuel, dopo dal grant riscjo corût cu la istituzion de monarchie, che e meteve in pericul l’ideâl teocratic, al conte cemût che chest ideâl al è lât in puart cun David; i Rês a contin de decadence scomençade cun Salomon e de condane che il Signôr al fâs dal popul ebraic par vie des sôs masse infedeltâts. Di dut chest grant implant, il Deuteronomi al sarès stât distacât cuant che si à volût meti adun la grande vore storiche e legjislative fate di Mosè.
Cheste ipotesi e va però completade cun doi corolaris.
Di une bande, la tradizion deuteronomistiche e dopre tradizions orâls e documents scrits une vore diferents fra di lôr par timp e par caratar. Di chê altre, la stesse redazion deuteronomistiche no je stade componude tun medesim timp, e ogni libri al à fruçons di plui edizions. Cui libris dai Rês, o vin almancul dôs redazions: la prime subit dopo de riforme di Gjosie e la seconde intant dal esili.
Te lôr forme definitive duncje chescj libris a son stâts metûts adun di une scuele di oms une vore religjôs, travanâts des ideis dal Deuteronomi, che a meditin sul passât dal lôr popul par rigjavânt une lezion religjose. Tal medesim timp a àn conservât ancje tradizions e tescj de ete eroiche de concuiste, cui fats plui impuartants de storie di Israel.
Il fat che cheste e sedi presentade come “storie sacre” al à doi vantaçs: no piert il so interès pal apassionât di storie e e cuiste valôr par chel che al à il don de fede. Leint chescj libris si impararà a scuviergi la man di Diu in ducj i fats dal mont e l’amôr esigjent di Diu pal so popul al devente un spieli dal grant progjet di Diu che, lavorant la storie de umanitât, al prepare la grande comunitât di ducj i siei fîs, ebreus e paians.
Il libri di Gjosuè
Se la ricjerce bibliche moderne e tint a peâ chest libri cul Pentateuc, fevelant adiriture di un “Esateuc” (= sîs fodris), i ebreus a preferissin peâlu cun chei che a vegnin dopo, clamâts ancje “profetis anteriôrs”.
Il libri si pò dividilu in trê sezions:
1) ocupazion de tiere promesse (cc. 1-12), ch’e cjape dentri cuatri grandis azions militârs: une cuintri di Gjeric, dôs viers il centri de regjon (ocupazion di Ai e di Betel e difese di Gabaon) e une te alte Galilee (batae dongje des aghis di Merom);
2) distribuzion de tiere (cc. 13-21) in doi timps: il prin in Galgale, pes tribûs di Gjude, di Efraim e di Manasse, e il secont a Silo, par chês altris tribûs e un piçul toc a Gjosuè;
3) ultimis disposizions di Gjosuè (cc. 22-24), cuntun discors-esortazion e la muart dal sucessôr di Mosè.
Lis grandis analogjiis fra Mosè e il so colaboradôr a vevin sburtât i antîcs a pensâ che lôr doi a vessin componût insieme lis lôr voris: Mosè al varès scrit il Pentateuc e Gjosuè une sorte di diari di ce che al jere sucedût sot di lui. Une analisi plui profonde però nus puarte, come ete di composizion, al sec. VII p.d.C. e salacor ancje dopo. Chest nol vûl dî che si trati di une ricostruzion fantasiose che i ebreus a fasin su la concuiste de lôr tiere, ancje parcè che a doprin matereâl di tradizions un grum vieris. No si pò dineâ un cert schematisim artificiâl, come che e je clare la concezion religjose de storie. Chest nol impedìs che i fats contâts no sedin sucedûts e che no sedin contâts cuntune certe fedeltât.
Cuant sono sucedûts chescj fats? La rispueste e dipent de impinion che si à tal stabilî la ete di Mosè. Stant a l’idee plui acetade, o sin sul finî dal sec. XIII p.d.C.
Il valôr religjôs dal libri di Gjosuè al sta tal mût di viodi i fats come tancj anei di une “storie di salvece” scomençade cu la aleance fate fra Diu e Abram e tornade a fâ tal timp di Mosè. E il libri al documente cheste fedeltât di Diu a la sô peraule tal dâur ai ebreus, vignûts fûr dal Egjit, la tiere imprometude ai vons. Cheste fedeltât di Diu e domande une condote fedêl ancje de bande dal popul. E il concet de aleance al cjape pengece soredut tai ultins cjapitui, là che al ven presentât come l’uniche fonde pal svilup e pe furtune di Israel.
I Paris de glesie, partint de identitât dal non (Gjosuè = Gjesù), a àn viodût tal sucessôr di Mosè une figure dal Redentôr e te sô vore un spieli dal svilup de glesie e dal ream di Diu.