Il libri dal Levitic
Il tierç libri dal Pentateuc al è stât clamât “Levitic” dai antîcs tradutors grêcs, parcè che al à dentri regulis di stamp gjuridic-sacerdotâl. I ebreus, invezit, lu clamin ancje in dì di vuê Wajiqrà (=E al clamà).
Nol è tant facil contâ, in struc, dut ce che al è scrit in chest libri, par vie des tantis svareadis leçs che al à dentri. Tant par dâ un telâr, si pò dî che tai prins siet cjapitui a vegnin lis leçs sui mûts diferents di fâ i sacrificis. I cjapitui che a vegnin dopo a ripuàrtin lis regulis pe consacrazion e pe inviestidure dai predis ebreus (Lv 8-10). Daspò e ven la part centrâl, ch’e trate des robis mondis e des robis socis (Lv 11-16). Cheste tierce part si siere cu la racolte des leçs che a rivuardin la zornade de espiazion. Dut il mac des leçs dal cjapitul 17 al cjapitul 26 al passe par “codiç o leç di santitât”: al ripuarte regulis pes funzions e pe vite civîl, compagnadis des benedizions par chei che lis metin in vore e des maludizions par chei che lis butin di bande. Il libri si siere cuntun cjapitul sui avôts.
Chestis leçs, tignudis cont dai predis e inmacadis di lôr intant dal esili, a vevin l’intent di dâur ai ebreus lontans de patrie une racolte di tradizions civîls e religjosis par cuant che a saressin tornâts in tiere di Canaan. Il Levitic, duncje, cun dute la sô ariditât gjuridiche, al è un at di fede e di sperance che Diu al metarà la sô man par liberâju.
L’idee teologjiche che i fâs di glagn a dut il libri e je chê dal pat: chel fat sul Sinai al à di lâ indenant te storie cui dissendents di chei che a jerin stâts liberâts dal Egjit. Chest al jere pussibil dome cuntune religjon vivude seont lis regulis cultuâls voludis e metudis di Diu. Dongje di cheste idee centrâl, si à di zontânt une seconde: la santitât di Diu e dal om. Diu al ripet di un continui, tal libri dal Levitic: “Viodêt di jessi sants, parcè che jo o soi sant”. Al è un mût concret di fâ deventâ vive e vere la grande afermazion teologjiche de Gjenesi, che l’om al è “sul stamp di Diu e i semee” (Gjen 1,26-27).