BIBIE IN LINIE

Res 1

Introduzion

I libris dai Rês

I libris dai Rês (par vieri al jere un libri sôl) a contin la storie dal popul ebraic cjapant la glagn lassade di Samuel. La version greche ju clame “tierç e cuart dai Reams”; la Volgade “tierç e cuart dai Rês”.

Come division naturâl si pò fevelâ di trê parts o sezions: a) storie dal ream unît (1 Re 1-11); b) storie dai doi reams separâts (1 Re 12-2 Re 17); c) storie dal ream di Gjude, unic restât (2 Re 18-25).

La prime part e trate di un sôl re, Salomon. La seconde e cjape dentri un trat di timp une vore plui lunc, de muart di Salomon a la fin dal ream setentrionâl o di Israel. I profîi dai Rês a àn un scheme fis: trops agns ch’al veve cuant che al è montât sù, cui ch’al jere re in chel altri ream, trop ch’al à durât, judizi morâl, muart e sepulture, non dal sucessôr. Pal rest si rimande al libri dai Anâi dai Rês di Gjude o di Israel. In jenfri a son lis storiis di Elie e di Liseu. La tierce part e trate di un sôl ream, cul stes edentic scheme.

Come cronologjie, il ream di Israel al va di Gjeroboam I (931-910) al ream di Osee (732-722) e il ream di Gjude al va di Roboam (931-913) a Sedecie (597-587).

Rivuart al materiâl doprât dal autôr, o savìn pôc, parcè che no cognossìn ni i Anâi dai Rês di Israel o di Gjude ni il libri dai Ats di Salomon. Al veve di tratâsi di une sorte di storie uficiâl, come che le cognòs la leterature assire e itite. E ancje se ju vessin, si trate simpri di robe componude plui par dâur onôr ai grancj che par onorâ la veretât.

Ce ch’al è clâr al è l’intent dal autôr, ch’al à di provâ une tesi: no lâ daûr de leç di Mosè, soredut par chel ch’al rivuarde l’aspiet cultuâl, al è mâl e un re al va misurât cul provin de sô fedeltât o infedeltât a la leç e a la religjon. Di chi la furtune di un e la disgracie di un altri. E je la tesi che le clamin deuteronomistiche, vadì une vision stretamentri religjose de storie. O sin tune prospetive juste contrarie dal materialisim storic cussì di mode tai nestris timps.

Si puedial fevelâ di “storie” cun chescj principis? No vin di sigûr la storie come che le viodìn vuê, te sô complessitât. O vin pluitost une schirie di fats e duncje une storie parziâl, a tesi, ma fondade su fats sucedûts. Di plui no vin di nissune bande de antichitât e nancje no si podeve pratindi.

Chest libri cui lu àial scrit e cuant? Pal autôr no si sa nuie di precîs. I antîcs a fasevin il non di Gjeremie. Si sa dome ch’al jere un ebreu di Gjerusalem, infogât di passion pal templi e pe riforme religjose inviade di Ezechie e di Gjosie tai ultins timps. Par componi la sô vore al à doprât documents uficiâi e robe di archîf une vore antighe. Stant che l’ultin fat contât al è dal 561 p.d.C. (2 Re 25,27-30), nol pò jessi plui vieli e nol varès di vignî plui in ca dal 538, cuant che Ciro al à cjapade Babilonie e ur à dât ai ebreus il permès di tornâ dongje (2 Cr 36,22-23). Un fat cussì grant nol varès propit podût tasêlu.